《台語荒漠甘泉（全羅版）》

 | | | 轉寄

"Lîng-hûn ê phín-tsit"

作者 陳清俊 翻譯 2009.05.31

listen


Gō͘ ge̍h sam-it (Gō͘ ge̍h saⁿ-tsa̍p-it ji̍t)

"Lí beh hè-siū muá-tsiok tsiah kui bōng, tshin-tshiūⁿ tiū-khún kàu-sî siu-khǹg." (Iok-pik-kì 5:26)

Ū tuì kū bo̍k-tsûn lâi huê-siu i ê tshâ-liāu ê lâng kóng, tsing-ka tsûn ê bo̍k-liāu phín-tsit ê guân-in m̄-nā sī i ê sî-kan, iā ài ū hái-tsuí tuì i ê ap-li̍k, niú-tsuán-li̍k, tsûn-té tsuí ê huà-ha̍k tsok-iōng, kap só͘ tsài ê hè-bu̍t lâi kuat-tīng.

Kuí nî tsîng, tī Niú-iok Bu-ló͘-ué (New York, Bruadway, siōng nāu-jia̍t ê tsi̍t tiâu khue-lō͘) tsi̍t-king tshut-miâ ê ka-kū tiàm, tián-lám tshut pueh-tsa̍p nî kū-tsûn só͘ tshú lo̍h lâi ê siōng-ba̍k, hō͘ lâng tsù-ba̍k ê sī I ê sik-tì, bûn-lō͘ iu-bí koh hó-khuàⁿ. Siâng-khuán ū tsi̍t tè la̍k-tsa̍p-nî kiâⁿ-tsûn ê tuā-niû thô-hue-sim ba̍k, in-uī tn̂g-kî ê kiâⁿ-tsûn, hō͘ tsit tè bo̍k-liāu ê khì-khang piàn suè, sik-tì piàn tshim, khuàⁿ khí-lâi ná tshin-tshiūⁿ Tiong-kok hue-kan hiah-nih kng-ku̍t. Āu-lâi tsit tè bo̍k-liāu tsuè tsiâⁿ tsi̍t ê tû-kuī, khǹg tī tsi̍t ê hó-gia̍h lâng kheh-thiaⁿ siōng iáⁿ-ba̍k ê só͘-tsāi.

Ū ê lâng kè-liáu bô ì-gī, tsū-ngó͘ hòng-tshiòng, bô siáⁿ lō͘-īng ê sing-ua̍h, koh ū ê lâng kiâⁿ-tsûn king-kè tuā hong-lōng, ūn-puaⁿ hè-bu̍t, pē tāng-tàⁿ, sī Siōng-tè ê lô͘-po̍k, pa̍t-lâng ê pang-tsān-tsiá. Tsit nn̄g tsióng lâng ê sò͘-tsit tsiū ū tuā-tuā ê hun-pia̍t. Āu-bīn tsit tsióng lâng sui-jiân ū sing-ua̍h ê ap-li̍k, tsóng-sī in ê sìng-keh lāi, muí tsi̍t-ki mn̂g iā lóng suh-ji̍p khì hè-bu̍t ê phang-bī. --- Loois Albert Banks

Bûn-ha̍k-ka, Hu-gō (Victor Hugo) pueh-tsa̍p guā hè ê sî, tsiong I ê sìn-sim piáu-ta̍t kah tsiah-nih suí: “Tī guá ê lîng-hûn lāi, guá kám-kak tio̍h tsiong-lâi ê sìⁿ-miā ê tsìng-kù. Guá tshin-tshiūⁿ tsi̍t phìⁿ tshiū-nâ siū tshò put-tsí tsi̍t-pái, tsóng-sī sin huat-tshut ê pí kū-ê koh-khah ū ua̍h-la̍t. Ji̍t-thâu tuì tíng-bīn tsiò, guá ǹg tíng-bīn sing-tióng, huat-tián. Tē hō͘ guá îng-ióng-hun, thiⁿ-tíng ê kng kā guá tsiò-bîng buē-bat ê sè-kài.

“Lâng kóng lîng-hûn tsí put-kò sī jio̍k-thé li̍k-liōng ê tsok-iōng. Nā-sī án-ni, thài-uē guá ê sin-thé tsiām-tsiām sue-jio̍k, guá ê lîng-hûn huán-tńg lú ū kong-hui? Sui-jiân guá ê náu-li̍k tī tang-thiⁿ, tsóng-sī guá ê sim sing-khí ná tshun-thiⁿ. Tī guá nî-lāu tsit ê sî, guá phīⁿ tio̍h tsí-ting-hiong, tsí-sik-hue, muî-kuì ê phang-bī, kap guá tī jī-tsa̍p hè ê sî siâng-khuán. Guá ná tsiap-kūn lú-tô͘ ê bé-tsām, ná tshing-tshó, ná bîng-pi̍k íng-uán sè-kài ê kau-hióng-khik ê iau-tshiáⁿ. Tse sī thang kìng-uì koh tsin kán-bîng ê sū.”

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com