《台語荒漠甘泉（全羅版）》

 | | | 轉寄

"Siōng-tè só͘ tiāⁿ-tio̍h ê sî"

作者 陳清俊 翻譯 2009.05.24

listen

Gō͘ ge̍h jī-sì (Gō͘ ge̍h jī-tsa̍p-sì ji̍t)

"A-pik-la̍h-hán nî-lāu ê sî, Sat-la̍h huâi-īn; kàu Siōng-tè tuì i kóng ê ji̍t-kî, tsiū kā i siⁿ tsi̍t ê kiáⁿ." (Tshòng-sè-kì 21:2)

"Iâ-hô-hua ê kè-i̍k íng-uán khiā-tsāi, I ê sim só͘ siūⁿ ê kàu bān sè-tāi." (Si-phian 33:11) Lán pit-su tsún-pī tng-tán Siōng-tè ê sî-kan. I ê sî-kan sī tsin tsún, tsiū tī I só͘ tiāⁿ-tio̍h ê sî, "hit ê sî" tsuè tāi-tsì. Bô su-iàu lán tsai "hit ê sî", si̍t-tsè-siōng lán iā m̄-tsai "hit ê sî." Lán tsí-ū tán-thāi "hit ê sî."

Ká-sú tng A-pik-la̍h-hán iáu tī Ha̍p-lân ê sî, Siōng-tè kā i kóng i su-iàu tán saⁿ-tsa̍p nî tsiah tap-ìng hō͘ i tsi̍t ê kiáⁿ, tsin khó-lîng i uē hue-sim, Tsóng-sī tsû-ài ê Siōng-tè bô kóng tshut tsit ê tn̂g-tn̂g ê nî-sò͘, tsí tán kàu tshun kuí kò-ge̍h ê sî, tsiah kóng tshut. "Kàu-kî, mê-nî tsit-sî, Guá beh koh lâi lí tsia, Sat-la̍h beh siⁿ tsi̍t ê kiáⁿ." (Tshòng-sè-kì 18:14) Kàu só͘ tiāⁿ-tio̍h ê ji̍t, huaⁿ-hí tshiong-muá tī tsit ê tso̍k-tiúⁿ ê ke, in iā buē kì-tit kú-tn̂g thìng-hāu ê iu-lū.

Só͘-í, suè-kiáⁿ ah, tng Siōng-tè ài lí tán-thāi, I buē hō͘ lí sit-bōng. I ê sî-kan sī tsún-sî, liân gō͘ hun-tsing ian-tshiân iā bô khó-lîng. Bô-kú, "Lín ê iu-būn beh pìⁿ-tsuè huaⁿ-hí." (Iok-hān 16:20)

Ah, Siōng-tè tuà hō͘ lán ū khuài-lo̍k ê lîng sī juā-tsiâⁿ huaⁿ-hí! Iu-siong thî-khàu beh íng-uán bô khì, ná tshin-tshiūⁿ thàu-tsá thiⁿ-kng ê sî, o͘-àm tsiū bô khì tsi̍t-iūⁿ.

Tsûn tíng ê lú-kheh m̄ thang khì kan-sia̍p hái-hîng-tô͘ kap lô-puâⁿ (khong-phá-sú, tsí-lâm-tsiam), tio̍h hō͘ ū king-giām ê tsûn-tiúⁿ, i pún-sin tsuè tsit ê tāi-tsì. --- Robert Hall

Tsin tsuē sū buē tsi̍t kang tsiū uân-sîng. Siōng-tè iā bô hō͘ îng-kng ê si̍k-iông tsi̍t sùn-kan tsō-sîng. I ài īng sî-kan tī sai-pîng ê thian-khong tsún-pī po̍h-po̍h ê bū-khì tsiah uē ū.

Tshàn-lē ê tsá-sî, tang-sî? Siáⁿ kóng? Tó-uī?
Kuâiⁿ-suaⁿ piàn pîⁿ-iûⁿ, koh puî-suí,
Ta-tē tshiong-muá hō͘-tsuí.
Tâng-mn̂g thih-tshuàⁿ lông pháiⁿ huí,
Piàn-tsuè thong-thiⁿ ê thui.
Khi-khu-tē tshòng pîⁿ, uan-khiau piàn ti̍t
Lóng huat-sing tī Siōng-tè só͘ tiāⁿ-tio̍h ê ji̍t,
Khó-lîng sī tī āu-ji̍t, iā khó-lîng sī kin-á-ji̍t.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com