《台語荒漠甘泉（全羅版）》

 | | | 轉寄

"Lâng khuàⁿ buē tio̍h ê uī kang-tsok"

作者 陳清俊 翻譯 2009.06.21

listen


La̍k ge̍h jī-it (La̍k ge̍h jī-tsa̍p-it ji̍t)

"lâng thiaⁿ-kìⁿ I tī tshù-lāi." (Má-khó 2:1)

Sian-ô͘ tī tsuí té khí-tsō sian-ô͘ tsio̍h, in lóng bô siūⁿ tio̍h sī uī-tio̍h tsi̍t ê tó-sū teh tsō tē-ki. Ū tsi̍t ji̍t, tsit ê tó-sū beh ū tōng-bu̍t, si̍t-bu̍t, iā sī Siōng-tè kiáⁿ-jî tshut-sì ê só͘-tsāi, beh hióng-siū kap Ki-tok saⁿ-tâng tsuè hō͘-sû (Lô-má 8:17) ê íng-uán îng-iāu.

Tshin-ài ê pîng-iú, ká-sú tī Siōng-tè ê tuā kun-tuī tiong, lí ê uī sī tī ún-ba̍t, bô bîng-hián ê só͘-tsāi, m̄-thang huat uàn-giân, sē-sē liām. M̄-thang uî-puē I ê tsí-ì, suî-piān lī-khui I só͘ kā lí hē ê só͘-tsāi. Ài-kì-tit, bô sian-ô͘, hit só͘-tsāi tsiū íng-uán buē hîng-sîng tsi̍t ê tó. Siōng-tè uē tiàu tsi̍t kuá lâng lâi tsuè sio̍k-lîng ê sian-ô͘. I tshē-kiû hiah-ê guān-ì tī lâng khuàⁿ buē tio̍h ê só͘-tsāi kang-tsok. Tsóng-sī in ê só͘ tsuè tī thiⁿ-tíng sī khuàⁿ tsin bîng, iā sī siū Sìng-lîng só͘ tsi-tshî ê.

Ū tsi̍t ji̍t Iâ-so͘ beh pan-tsióng, ū ê lâng kî-kuài lí ū tsu-keh tit tsióng, sui-jiân in lóng buē bat thiaⁿ-kìⁿ lí. Tān-sī ài-tsai, Siōng-tè sī buē m̄-tio̍h ê.

Tng lí khiā tī tshiong-thu̍t lāi, hia sī lí ê só͘-tsāi,
Lí siūⁿ kóng lí bô lō͘-īng, bián ng lí ê bīn, ióng-kám khiā-tsāi,
Siōng-tè hē lí tī hia ū bo̍k-ti̍k, put-kuán sím-mi̍h an-pâi,
I só͘ phài hō͘ lí ê, tiong-sim khì tsuè sī ing-kai. Sìn-khò I, tsong-pī lí ê tsiàn-kah, bô lūn kang-tsok á hioh-khùn,
Bô huâi-gî tī hia, Siōng-tè lō͘ siōng hó koh ún.
Bô-lūn sī tsiàn-tàu á siú-bōng, kian-tīng sîng-si̍t un-khûn,
Tse sī Tsú hō͘ lí só͘ tio̍h tsuè ê un.

Tng lán pîng-pîng an-an lī-khui tsìng sìn-tô͘ ueh-khueh ê só͘-tsāi, á-sī bi̍k-sióng tī suaⁿ-tíng ê thé-giām, á-sī lī-khui kap "tsiâu-tsn̂g ê gī-lâng" (Hi-pik-lâi 12:23) hó koh pang-tsān ê iú-gî kau-thong ê ki-huē, khì kàu lán hit ê sió-sió ê Í-má-ngó͘ ê tē-hng, á-sī khì kàu hō͘ lâng huân-ló ê Ko-lô-se kàu-huē, sīm-tsì kàu tī hn̄g-hn̄g ê Má-kî-tùn ê só͘-tsāi. Lán thang an-sim tit pó-tsìng, bô lūn Siōng-tè hē lán tī toh tsi̍t ê só͘-tsāi, I í-king tīng hō͘ lán kíng-kài, jīn-bīng lán tsuè hit só͘-tsāi thuân-tō kang-tiâⁿ, lán beh tī hia tit sìng-lī. --- Northcote Deck

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com