《台語荒漠甘泉（全羅版）》

 | | | 轉寄

"Thiⁿ-mn̂g khui"

作者 陳清俊 翻譯 2009.06.28

listen


La̍k ge̍h jī-pueh (La̍k ge̍h jī-tsa̍p-pueh ji̍t)

"Tī thiⁿ-ni̍h ū mn̂g khui." (Khé-sī-lio̍k 4:1)

Lán tsai, Iok-hān siá tsiah ê uē, sī tng i siū kuaiⁿ-kaⁿ tī Pua̍t-mô͘ sió tó ni̍h. I tī hia sī “uī-tio̍h Siōng-tè ê tō, kap Iâ-so͘ ê kan-tsìng.” (Khé-sī-lio̍k 1:9) Tsit ê tó-sū sī tsio̍h-thâu, bô sik-ha̍p lâng khiā-khí ê kaⁿ-ga̍k tó. Tī ki̍k khùn-lân ê khuân-kíng, lī-khui Í-hut-só͘ tsìng kìng-thiàⁿ ê hiaⁿ-tī, buē thang tī kàu-huē saⁿ-kap kìng-pài, sī kap bô huaⁿ-hí ê siû-huān tsuè-hé siū kuaiⁿ kaⁿ. Siōng-tè hō͘ i ū ti̍k-pia̍t ê un-tián, tī i tsuè siû-huān ê sî, khuàⁿ-kìⁿ thiⁿ ê mn̂g khui.

Lán iā kì-tit, Ngá-kok lī-khui lāu-pē ê ke, tī sua-bô͘ tiong khùn, “Bāng-kìⁿ ū thui khiā tī tuē-ni̍h, thui-tíng tú-thiⁿ; … Iâ-hô-hua khiā tī thui-tíng” (Tshòng-sè-kì 28:12-13)

Thiⁿ mn̂g m̄-nā tuì tsit nn̄g lâng khui, iā tuì tsin tsuē kî-thaⁿ ê lâng khui. Tī sè-jîn ê khuàⁿ-huat, in bô khó-lîng tit-tio̍h tsit-tsióng ê khé-sī. Tsóng-sī, tng siū lia̍h, kuaiⁿ-kaⁿ, hō͘ só-liān pa̍k-teh, phuà-pīⁿ tó-tī kaⁿ-tshn̂g, tī tē-tsiūⁿ ko͘-to̍k, lī-khui Siōng-tè ê tuā-ka-tîng, thang khuàⁿ tio̍h “thiⁿ-ni̍h ê mn̂g khui” lah.

Put-kò beh khuàⁿ thiⁿ-mn̂g khui sī ū tiâu-kiāⁿ, lán pit-su tsai án-tsuáⁿ sī “siū sìng-sîn kám-tōng,” (Khé-sī-lio̍k 1:10) lán pit-su sī tshing-khì sim-kuaⁿ ê lâng, (Má-thài 5:8) koh uē tsun-hîng Siōng-tè tsí-ì. Lán pit-su guān-ì “khuàⁿ bān sū tsuè sún-hāi, in-uī guá lia̍h bat guá ê Tsú Ki-tok Iâ-so͘ tsuè tē it hó.” (Hui-li̍p-pí 3:8) Liáu-āu it-tàn tuì lán Siōng-tè sī it-tshè, sī tsuân-pō͘, “lán tiàm-tī I lâi ua̍h, lâi tín-tāng, lâi tī-teh;” (Sù-tô͘ hīng-tuān 17:28) Thiⁿ mn̂g iā uē tī lán bīn-tsîng phah khui. --- tuì Muí-ji̍t lîng-siu

Hong-bû thut-thâu suaⁿ,
I tshuā lán kàu hia tuà,
Tī suaⁿ-gâi suh sin-sian khong-khì bô suah,
Thàu-tsá ū ko͘-hong ê tshiò-bīn tsuè phuāⁿ.

N̂g-n̂g kóng-khuah sua-bô͘,
Tsi̍t phiàn sua, tsi̍t phiàn hong-po͘,
Tī hia, I pàng lo̍h thiⁿ bō͘,
Hō͘ thiⁿ-siōng hián-lō͘.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com