《台語荒漠甘泉（全羅版）》

 | | | 轉寄

"Tsûn ǹg-bāng lâi thìng-hāu"

作者 陳清俊 翻譯 2009.07.26

listen


Tshit ge̍h jī-la̍k (Tshit ge̍h jī-tsa̍p-la̍k ji̍t)

"In-uī lán uá-khò Sîn, tuì sìn teh thìng-hāu só͘ ǹg-bāng ê gī." (Ka-lia̍p-thài 5:5)

Ū-sî ta̍k-hāng lóng khuàⁿ lo̍h tsin àm, àm kàu guá su-iàu ǹg-bāng lâi thìng-hāu. Ǹg-bāng lâi thìng-hāu sī tsin lân ê, tān-sī tng lán pit-su ǹg-bāng lâi tán, tsiah tsai tsin-tsiàⁿ ê jím-nāi. Tng lán khuàⁿ buē tshut sîng-kong ê iáⁿ, khiok bô sit-bāng, tng lán tī àm-mî tuì thang-á khuàⁿ tshut bô sím-mi̍h mi̍h-kiāⁿ, khiok tsiong thang-á-liân phah-khui, in-uī tshiⁿ beh tshut-hiān tī thiⁿ-nih, tng lán ê sim khang-hu, khiok bô ài jīm-hô ê mi̍h lâi thiam-pó͘, tsí-ū ài Siōng-tè siōng hó ê mi̍h, --- tsiū-sī ú-tiū tiong, siōng tuā ê jím-nāi. Iok-pik tī po̍k-hong tiong, A-pik-la̍h-hán tī Mô͘-lī-a ê lō͘-tiong, Mô͘-se tī Bí-tiân ê sua-bô͘ tiong, Siōng-tè ê kiáⁿ tī Khik-se-má-lī hn̂g, lóng bô pa̍t-hāng pí tse khah kiông ê jím-nāi, thang jím-siū. Tshî-siú, in-uī lán khuàⁿ “só͘ buē khuàⁿ-kìⁿ ê Tsú.” (Hi-pik-lâi 11:27) Tse tsiū-sī khǹg ǹg-bāng lâi thìng-hāu.

Tshin-ài ê Tsú, Lí hō͘ thìng-hāu tsiâⁿ-tsuè bí-hó, hō͘ jím-nāi tsiâⁿ-tsuè sîn-sìng. Lí kà-sī guán ìng-tong tsiap-siū Lí ê tsí-ì, tsí in-uī tse sī Lí ê tsí-ì. Lí hō͘ guán tsai, khuàⁿ tsí-ū khó͘ ê pue, iā sī guān-ì lâi lim, in-uī tshim-sìn Lí ê ba̍k-tsiu khuàⁿ khah hn̄g.

Pē ah, tshiáⁿ sù guá Lí sìng ê li̍k-liōng, tsiū-sī Khik-se-má-lī ê li̍k-liōng. Sù guá tuà-tio̍h ǹg-bāng thìng-hāu ê ì-tsì lîng-li̍k, uē tī bô thiⁿ-tshiⁿ ê mî, khuàⁿ ǹg thang-á guā. Sīm-tsì guá ê hí-lo̍k bô-khì ê sî, hō͘ guá ū khuì-la̍t tī o͘-àm mî sìng-lī khiā-tsāi án-ni kóng, “Tuì guá ê Thiⁿ-pē khuàⁿ, ji̍t-thâu iáu sī teh tsiò.”

It-tàn guá o̍h-tio̍h ǹg-bāng ê thìng-hāu, guá ê li̍k-liōng ta̍t-kàu siōng kuâiⁿ tiám. --- George Matheson

Tī si̍t-tsè sing-ua̍h tiong, ló͘-li̍k khì tsuè hiah ê tsió-sò͘ lâng, in uē liáu-kái, uē bîng-pi̍k bô-lūn sī tsá-khí-sî, tiong-tàu-sî, á-sī àm-mî, só͘-ū khuàⁿ uē tio̍h ê sè-kài ê puē-āu ū tsi̍t uī khuàⁿ-buē-tio̍h ê “Thiⁿ”, á-sī “Siōng-tè” ê tsûn-tsāi.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com