《台語荒漠甘泉（全羅版）》

 | | | 轉寄

"Khó͘-pue"

作者 陳清俊 翻譯 2009.07.19

listen


Tshit ge̍h tsa̍p-káu (Tshit ge̍h tsa̍p-káu ji̍t)

"Pē só͘ hō͘ guá ê pue, guá kiám bô beh lim mah?" (Iok-hān 18:11)

“Lim Pē só͘ hō͘ guá ê pue” pí hō͘ hong-íng pîng-tsīng, pí hō͘ sí-lâng koh-ua̍h koh-khah tuā ê sū. Sian-ti, sù-tô͘ uē kiâⁿ sîn-jiah, tsóng-sī in pīng bô siông-siông tsiàu Siōng-tè ê tsí-ì kiâⁿ, khì sîng-siū khó͘-lān. Tsiàu Siōng-tè ê tsí-ì tsuè, kam-sim siū khó͘, sī sìn-sim siōng ko-hong, ki-tok-tô͘ siōng îng-kng ê sîng-tsiū.

Siàu-liân sî-tāi ê tuā tsì-khì í-king phuà-tshuì, ji̍t-ji̍t siū tāng-tàⁿ teh, lóng bô hioh tshuán ê sî-tsūn, sui-jiân ū-sim ǹg-bāng tuì pa̍t-lâng tsuè hó-sū, uī só͘ thiàⁿ ê lâng hō͘ in ū hó ji̍t-tsí kè, tān-sī pún-sin hō͘ pîn-khùn kau-tîⁿ, sin-thé hō͘ pīⁿ-thiàⁿ só͘ pa̍k, uân-tsuân ko͘-tuaⁿ, kap só͘ thiàⁿ ê lâng pun-lī, tan-to̍k bīn-tuì sìⁿ-miā ê tá-kik. Sui-jiân huat-sing tse it-tshè, siū tsiah tuā tsiah kan-khó͘ ê thuàn-liān, lí iáu uē kóng, “Pē só͘ hō͘ guá ê pue, guá kiám bô beh lim mah?” Tse sī sìn-sim ê tsuè ko-hong, sī sim-lîng sîng-kong ta̍t kàu ki̍k-tiám.

Tuā sìn-sim ài tī siū-khó͘ ê sî tsiah uē tshiong-hun piáu-hiān tshut-lâi. --- Tsarles Parkhurst

Ài ū siū-khó͘ ê Kiù-tsú, tsiah ū lîn-bín lâng ê Siōng-tè. Tsin-tsiàⁿ ê tông-tsîng sī tuì ū siū-tio̍h siâng-khuán thòng-khó͘ ê lâng lâi. Khó͘-thàng sī hō͘ lán ū li̍k-liōng khì tông-tsîng pa̍t-lâng ê tāi-kè. Kìⁿ-nā guān-ì pang-tsān pa̍t-lâng ê, pit-su ka-kī sing siū-khó͘. Lán nā hi-bāng pang-tsān pa̍t-lâng, su-iàu sing bīn-tuì si̍p-jī-kè. Bô lim Iâ-so͘ só͘ lim ê khó͘-pue ê lâng, bô tshin-tshiūⁿ I, hiah-nih guān-ì khiam-pi siū Iok-hān sué-lé ê lâng, tsua̍t-tuì thé-giām buē tio̍h tuì ho̍k-sāi lâng lâi tit tio̍h hit tsióng tuā bô pí ê khuài-lo̍k.

Tāi-pi̍t ông siōng an-uì ê si-phian sī tī i ê sìⁿ-miā king-kè siū khó͘-lān ê sî só͘ ap tshut lâi ê. Sù-tô͘ Pó-lô sin-tsiūⁿ nā bô “hit ki tshì”, (Ṳ Ko-lîm-to 12:7) lán kin-á-ji̍t tsiū buē tit-tio̍h hiah tsuē tī i ê phue-sìn só͘ piáu-ta̍t un-jiû an-uì ê sim-siaⁿ.

Nā-sī lí í-king tsiong pún-sin kau-thài Tsú, bo̍k-tsîng lí ê khuân-kíng tú-tio̍h tāng-tàⁿ teh-tio̍h, sī beh tī Thiⁿ-pē ê tshiú tiong kā lí tiau-khik tsuè íng-ua̍h hîng-thé bí-hó ê tsok-phín. Só͘-í siong-sìn I, íng-uán bô sak-khui I tú-teh tī lí sin tsiūⁿ sú-iōng ê kang-kū, bô sit-khì I beh tī lí sìⁿ-miā tiong kiat-tshut hó ké-tsí.

Ū hián-hiān khak-si̍t kî-kuài kap khùn-lân,
Tsóng-sī tè tī āu-bīn sī sù-hok kap pîng-an.

Khó͘-lān ha̍k-hāu só͘ pit-gia̍p ê sī kia̍t-tshut ê ha̍k-tsiá.

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com