《台語荒漠甘泉（全羅版）》

 | | | 轉寄

"Siōng-tè ê an-uì"

作者 陳清俊 翻譯 2009.08.09

listen



Pueh ge̍h tshue-káu (Pueh ge̍h káu ji̍t)

"I ê la̍t tsāi-tī Lí, … hit-hō lâng ū hok-khì. In king-kè Lâu-ba̍k-sái ê suaⁿ-kok, hō͘ I pìⁿ-tsuè tsuí-tsuâⁿ ê só͘-tsāi." (Si-phian 84:5-6)

Sim-tsîng khin-sang huaⁿ-hí ê sî, buē hō͘ lâng an-uì. An-uì sī Siōng-tè siōng pó-kuì ê lé-mi̍h, beh hióng-siū á-sī tit-tio̍h tse an-uì ê un-sù, pit-su king-li̍k jîn-sing kám-tsîng tshim ê suaⁿ-kok, thé-giām tio̍h an-uì, jiân-āu pit-su tsún-pī kap Siōng-tè tâng-kang.

Àm-mî, jîn-sing só͘ su-iàu ê mî, tng i ê im-iáⁿ tà tī lán lîng-hûn hn̂g ê tíng-bīn, hn̂g tiong ê hio̍h kńg-khí-lâi, hue ha̍p khí-lâi, bô koh huán-siā ji̍t-kng. Tng lán tú-tio̍h siōng o͘-àm ê sî, uē-kì-tit, lán kuat-tuàn buē kám-kak khuat-hua̍t, thiⁿ-tíng lūn-ti̍k ê kam-lō͘ tsí ū tī ji̍t-thâu lo̍h suaⁿ liáu-āu tsiah uē kàng lo̍h-lâi.

King-kè lâu-ba̍k-sái ê kok-té,
Siong-pi thàng-thiàⁿ ê tē,
An-uì ê Siōng-tè kap guá tī-teh,
Suî-sî hû-tshî, pó-pì hó-sè.

Thó͘-tē su-iàu hûn kap thài-iông,
Lán ê lîng iā su-iàu hí-lo̍k kap pi-siong,
I khǹg lán tī hé-lô͘ tiong,
Thuàn-liān tsuè tsing-kim sûn-liông.

I ín-tshuā lán kiâⁿ tī iu-būn ê lō͘,
Lán kun-suî I ê kha-pō͘,
I hō͘ lán tshì-giām kap thòng-khó͘,
Lóng sī un-tián ê tsi̍t pō͘-sò͘.

Lán siông-siông siám-pī siu-tsíng kap tsián,
Buē kì-tit tsuè-sit-lâng ê Siōng-tè tsai it-tshè,
Ài tsai, siu-tsíng ná tshim,
Siⁿ tshut ê hue-pha ná bō͘-sīng bí-lē.

Tshim tsai pit-su khó͘-lān hong-sik,
I sim-tiong tsûn bo̍k-tik,
Tī iu-kok tiong I khin siaⁿ kóng khí,
Bô-kú lí beh tsai guá ê iōng-ì.

Lán king-kè jîn-sing iu-kok,
Ū I thiàⁿ ê tshing-tsuâⁿ lâi uì-lo̍k,
Hō͘ lán tshíⁿ-gō͘ thòng-khó͘ lô-lo̍k,
Si̍t-tsāi sī I ê sù-hok.

Só͘-í lán kun-tè I ín-tshuā,
Sui-jiân tō-lō͘ o͘-àm koh ko͘-tuaⁿ,
In-uī lán khak-si̍t tsai I tsuè phuāⁿ,
Hō͘ lán tī o͘-àm mî iā beh tshiùⁿ kua.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com