《台語荒漠甘泉（全羅版）》

 | | | 轉寄

"Thun-lún thìng-hāu"

作者 陳清俊 翻譯 2009.08.16

listen

Pueh ge̍h tsa̍p-la̍k (Pueh ge̍h tsa̍p-la̍k ji̍t)

"Guá bat thun-lún thìng-hāu Iâ-hô-hua." (Si-phian 40:1)

Thìng-hāu pí kiâⁿ-lō͘ khah oh, in-uī thìng-hāu su-iàu nāi-sim, thun-lún. Jím-nāi sī lân-tit ū ê bí-tik. Siōng-tè uî lî-pa lâi pó-hō͘ I ê tsú-bîn, tuì pó-hō͘ ê kak-tō͘ khuàⁿ sī hó. Tsóng-sī nā-sī lî-pa ná khí ná kuâiⁿ, kàu lî-pa guā lóng khuàⁿ buē-tio̍h, lán tsiū beh huâi-gî, lán ê it-sing sī-m̄-sī lóng hān-tsè tī tsit ê khuân-kíng, kiám iáu ū ki-huē lī-khui tsit ê sió huān-uî kap ho̍k-bū. Ū-sî lán buē thang liáu-kái, uī-sím-mi̍h bô khah tuā ê huān-uî lâi ho̍k-bū, sū-hōng, uī-sím-mi̍h buē thang lī-khui tsit ê tsin oh ua̍h-tāng khí-lâi ê só͘-tsāi. Put-kò, Siōng-tè ê iân-tshiân ū I ê ì-sù, “Gī-lâng ê kha-pō͘ sī Iâ-hô-hua só͘ an-tì.” (Si-phian 37:23).

George Mueller tī tsit ê king-bûn piⁿ-á ū tsù-kái siá, “m̄-nā sī kiâⁿ ê kha-pō͘, iā pau-hâm thîng ê kha-pō͘”. Ū lâng siūⁿ beh tshiong-phuà Siōng-tè ê lî-pa, tse sī tuā-tuā ê tshò-gō͘. Tsú hō͘ ki-tok-tô͘ siōng tuā ê tsún-tsîn, tsiū-sī bô lī-khui Siōng-tè só͘ kā i an-tùn ê só͘-tsāi, ti̍t-kàu “hûn-thiāu” (Tshut-ai-ki̍p-kì 13:21) khai-sí hiòng-tsîng khí-kiâⁿ. --- tuì “Tsú-ji̍t-o̍h sî-pò”

Lán nā it-tān o̍h uē-hiáu it-tshè tāi-tsì lóng thìng-hāu Tsú ê ín-tshuā, lán beh tsai, lán ê lîng-li̍k beh tī pîng-hîng kiâⁿ-tsuè tiong ta̍t-kàu tsuè ko-tiám. Lán ê tiong-kan tsin tsuē lâng lóng khiàm-kheh siūⁿ ài ū ê li̍k-liōng, tsóng-sī Siōng-tè tiàu lán khì tsuè muí tsi̍t hāng ê kang-tsok, lóng beh sù hō͘ lán ū kàu-gia̍h uân-tsuân ê li̍k-liōng. Pó-tshî sìn-sim thìng-hāu I ê ín-tshuā tsiū-sī tit li̍k-liōng ê pì-kuat. Huân-nā bô tsiàu I ê tō-lō͘ kiâⁿ ê, lóng sī lōng-huì sî-kan kap tsing-sîn. Liû-sim thìng-hāu I ê ín-tshuā. --- Samuel Dickey Gorden

Ká-sú tsi̍t ê lâng siū-pik tsīng-tsīng bô tshái-tshú jīm-hô ê hîng-tōng, tsí khiā tī huāⁿ-tíng khuàⁿ sìⁿ-miā ê tuā-íng tshiâng-tshiâng kún, i ê sìⁿ-miā kiám kóng sī sit-pāi ê mah? Tsua̍t-tuì m̄-sī, in-uī sìng-lī sī ài khò khiā-tsāi, an-tsīng thìng-hāu khì tik-sìng. Án-ni tsuè, khó-lîng pí lí í-tsîng bô-îng tshih-tshih, phah-piàⁿ sing-ua̍h khah oh kuí tshing pē. Khiā-tsāi, thìng-hāu, bô hue-sim, bô sit-bōng, sūn-thàn Siōng-tè tsí-ì, tsiong kang-tsok ê ki-huē kap îng-iāu lâu hō͘ pa̍t-lâng, tī tsìng-lâng bô-îng khuài-lo̍k tsìn-hîng ê sî, lí pún-sin uē-thang pó-tshî an-tsīng, ū tsū-sìn koh khuài-lo̍k, sī hô-tíng ê hó ah.

Siōng uí-tāi ê jîn-sing tsiū-sī “Kàu lín í-king tsuè-tsiâⁿ lóng-tsóng ê sū, iā iû-guân khiā-tsāi.” (Í-hut-só͘ 6:13) --- J.R.Miller

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com