《台語荒漠甘泉（全羅版）》

 | | | 轉寄

"Hô-hâi siaⁿ-im"

作者 陳清俊 翻譯 2007.01.28

listen











It ge̍h jī-tsa̍p-pueh ji̍t

"In-uī guá tsiong Siōng-tè ê jia̍t-sim, uī-tio̍h lín lâi jia̍t-sim;" (Ṳ Ko-lîm-to 11:2)

Ū king-giām ê khîm-tshiú, tuì i ê khîm sī juā-tsiâⁿ jia̍t-sim ài-hō͘, phō i, sioh i, ná tshīn-tshiūⁿ i ka-kī ê kiáⁿ tsi̍t-iūⁿ. Tsiong i ê it-sing siau-mô͘ tī khîm ê tíng-bīn. Khuàⁿ i án-tsuáⁿ teh tiâu khîm. Tsiong khîm lia̍h-tiâu, kín-kín tuâⁿ kî-tiong ê tsi̍t tiâu hiân, àⁿ hīⁿ jīn-tsin thiaⁿ, nā-sī só͘ tshut ê siaⁿ tsin thòng-khó͘, tsin tsha̍k hīⁿ, sī tsáu-im lah, i tsiū tsiong hit tiâu hiân ê lô͘-si ká khah ân, ân kah kah-ná beh tn̄g ê khuán, koh tuâⁿ khuàⁿ-māi, nā-sī só͘ huat ê siaⁿ hó thiaⁿ, ū tsún, i ê bīn tsiū tshut-hiān tshiò-iông.

Siōng-tè iā sī án-ni teh tiâu-tsìng lí. I thiàⁿ lí, pí khîm-tshiú ài khîm koh-khah tshim. Tī lí sin-tsiūⁿ só͘ thiaⁿ-tio̍h ê lóng sī tsha̍k-hīⁿ ê, I beh īng lí só͘ kám-kak thòng-khó͘ lâi tiâu-tsìng lí ê sim-hiân. Jiân-āu I un-jiû uan-io àⁿ-hīⁿ, tuâⁿ tsi̍t ē, siông-sè koh thiaⁿ, nā-sī thiaⁿ-tio̍h lóng sī uàn-giân, tsiū koh tiâu, koh tuâⁿ, tio̍h-kip lâi thiaⁿ lí ê huê-ìng, I ê sim ki̍k-kî ǹg-bāng thiaⁿ tio̍h lí ê sim kóng, "to̍k-to̍k m̄ sī guá ê ì-sù, sī lí ê ì-sù tio̍h tsiâⁿ." (Lō͘-ka 22:42) Tse sī I só͘ ài thiaⁿ-tio̍h ê im-ga̍k, tshin-tshiūⁿ thiⁿ-sài ê kua-siaⁿ tsi̍t-iūⁿ. I uē bô-thîng teh tiâu lí ê sim-hiân, ti̍t-kàu lí ê lîng khíng khiam-pi, sūn-ho̍k lo̍h-lâi, tshin-tshiūⁿ Thiⁿ-pē hit tsióng ê sûn-kiat, íng-uán hô-hâi tsi̍t-iūⁿ.

To-hiân ê khîm ê siaⁿ hiah nih khì-phài,
Muí tsi̍t tiâu hiân huat-tshut thiàⁿ koh hô-hâi.
Nā ū tsi̍t-tiâu tn̄g-khì, līng-khì, sún-hāi,
Tsiū piàn tshì-tsha̍k, tiâu khuàⁿ-māi.

Kông jia̍t thiàⁿ-thàng kap thòng-khó͘, kiaⁿ sit- lo̍h saⁿ liân,
The̍h tio̍h ông-bō ê tshiú, sī thong-kè si̍p-jī-kè ê khó͘-liān.
Nā bô tsing-tsiàn, pí-sài, tsiū bô sìng-lī hián-hiān.
King-kè lô-khó͘, tsiah tsai an-hioh, pîng-tsīng hô-siān.

Peh kuân-suaⁿ, kè po̍k-hong, tsiah uē him-sióng,
Thiⁿ tshing-khì, tshàn-lān, tē tshiⁿ-tshuì, bí-siōng.
Bô hûn, kong-hui tshut ji̍t thiⁿ,
Tîn-ai, ù-jiám piàn àm-khì.

Sáng ài suán-ti̍k, nn̄g-hāng lóng beh, á lóng buái,
Tsai-lān ê thòng-khó͘, kap siōng un-jiû ê khin-khuài,
Bô hui-siông ê thòng-khó͘, thài uē ū hui-siông ê hok-hūn,
Tūn ê sim-hiân buē huat-tshut hô ê siaⁿ-ūn.

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw