《台語荒漠甘泉（全羅版）》

 | | | 轉寄

"Tsó͘-gāi"

作者 陳清俊 翻譯 2007.02.04

listen












Jī ge̍h sì ji̍t

"Iâ-hô-hua beh hō͘ lí tsiūⁿ kàu tuē-tsiūⁿ kuâiⁿ ê só͘-tsāi;" (Í-sài-a 58:14)

Khì-thé tōng-li̍k-ha̍k, ū tsi̍t ê ki-pún tīng-lu̍t, bu̍t-thé nā-sī tsìⁿ hong pe, uē kín-kín hiòng siōng pe kuân. Hui-ki nn̄g ê si̍t nā tsìⁿ hong, tsiū tsing-ka hui-hîng ê kuân-tō͘. Tuì tó-uī tit tsit ê pó-kuì ê king-giām ah? Khuàⁿ tsiáu-á teh pe lâi o̍h. Tsiáu nā tsū-iû tsū-tsāi teh pe, sī sūn-tio̍h hong-sè, nā tú-tio̍h guî-hiám ê sî, tsiū tńg-se̍h tsìⁿ-hong pe, tsiū pe kuân khí-khì.

Jîn-sing ê gi̍k-kíng sī Thiⁿ-pē só͘ tsún-pī ê hong. Ū sî tuì bīn tshe lâi, kiông kah tòng buê tiâu. Tsit ê hong-thai sī I só͘ tsún-pī, ài lán thê-sing lán ê tsân-tshù, ǹg I ê thian-kok hia tsìn.

Lí uē kì-tit jua̍h-thiⁿ koh jua̍h, koh hip, hip kah khuì lóng tshuán buē hó-sè. Nā ū tsi̍t phìⁿ o͘-hûn lâi, khí tuā hong, lo̍h tsi̍t tsūn tuā hō͘, luî-kong tân bô thîng, sih-ná sih-sih-kiò. Hong-hō͘ āu khong-khì piàn tshing-sóng, ū sin ê ua̍h-khì, tsit ê sè-kài thu̍t-jiân kái-piàn tsuè sin ê iūⁿ.

Jîn-sing ê tso-gū piàn-huà iā sī án-ni. Sìⁿ-miā tiong tshut-hiān po̍k-hong-ú, khuân-kíng sán-sing kái-piàn, tit-tio̍h kiat-tsīng, tshiong-muá tsuán-ki, ná tshin-tshiūⁿ thian-tông kàng-lîm tī tē-tsiūⁿ.

Tú-tio̍h tsó͘-gāi, hō͘ lán uē tshiùⁿ-kua huaⁿ-hí. Hong tshe kè khòng-khuah ê hái tíng, pīng buē huat-tshut siaⁿ-im; nā tshe kè tshiū-ki, tshe kè khîm ê si-hiân ê sî, tsiū huat-tshut siaⁿ, sī bí-lē ū la̍t ê siaⁿ. Tng lí tsū-iû ê lîng-hûn sàu-kè jîn-sing ê tsó͘-gāi, tsîng-bīn ū tshiū-nâ hiah tsuē ê khó͘-thàng, á-sī suè-suè ê iu-lū kap huân-ló, tuì-hia kè lóng beh ū siaⁿ lâi o-ló, lâi gîm-si.

Tshin-tshiūⁿ tsiáu-á teh pe teh kiò,
Tī suè-suè ê tshiū-ki hio̍h,
I iáu teh tshiùⁿ, sui-bóng tshiū-ki tuā iô
In-uī i khò nn̄g-ki si̍t pó-sioh.

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw