《台語荒漠甘泉（全羅版）》

 | | | 轉寄

"Tsú koh-lâi"

作者 陳清俊 翻譯 2009.12.06

listen

Tsa̍p-jī ge̍h tshue-la̍k (Tsa̍p-jī ge̍h la̍k ji̍t)

"Guá kín-kín kàu; lí só͘-ū ê tio̍h tshî-siú i, bián-tit ū lâng tshiúⁿ lí ê bián-liû." (Khé-sī-liok 3:11)

Plymooth hiaⁿ-tī-huē tsi̍t ê líng-tō-jîn George Mueller bat án-ni kiàn-tsìng kóng, "Tī Tsú-āu 1829 nî tshit ge̍h Siōng-tè khé-sī Tsú Iâ-so͘ koh-lâi ê tsin-lí hō͘ guá khuàⁿ, tsí-tshut guá ê tuā tshò-gō͘: tsē teh thìng-hāu sè-jîn ê uân-tsuân hué-kái. Hō͘ guá lîng-hûn siū tshim-tshim ê kám-tōng. Guá tsú-tōng khì tông-tsîng teh tîm-lûn ê tsuē-jîn, kap siū siâ-ok, tuì-ti̍k tāng-bîn ê sè-kài. Guá khai-sí siūⁿ, guá kiám bô ing-kai tsīn guá ê li̍k-liōng, tī I koh-lâi í-tsîng, huàn-khí, kiò-tshíⁿ teh tāng-bîn ê kàu-huē mah?"

Tī I koh-lâi si̍t-hiān tsîng, khó-lîng iáu-ū tsin tsuē khùn-lân nî thang phah-piàⁿ kang-tsok. Hiān-kim I koh-lâi ê tiāu-thâu hō͘ lâng tsin hing-hùn kó͘-bú. Sū-si̍t-siōng nā-sī kin-á-ji̍t tī ji̍t-lo̍h í-tsîng, ū thiⁿ-sài tián-khui in ê si̍t, sìng-lī teh pe lâi, guá mā buē kám-kak kî-kuài. Ká-sú bîng-á-tsá-khí, sin-bûn suan-pò͘ kiaⁿ lâng tuā siau-sit kóng, Tsú Iâ-so͘ í-king kàng-lîm tī Kaⁿ-ná-suaⁿ á-sī tī Kok-kok-thaⁿ suaⁿ, suan-kò thóng-tī tsiáng-kuán tsuân sè-kài, guá iā buē tio̍h-kiaⁿ.

Ah, Sí-sí bô ua̍h-khì ê kàu-huē, tshíⁿ khí-lâi ah! Ki-tok ah, tshiáⁿ kàng-lîm! Tài siong ê thâu, tì lí ê kuan-bián! Siū siong ê siang-tshiú the̍h khí lí kuân-pìng ê kuáiⁿ! Siū siong ê siang-kha, kiâⁿ kàu Lí ê pó-tsō! "In-uī kok lóng sī Lí ê." (Má-thài 6:13)

Tng lí tsi̍t ji̍t ê kang tsuè uân, khó-lîng tī àm-sî,
Lí ū îng, ū sî-kan khuàⁿ ji̍t-thâu tîm-lo̍h khì,
Ji̍t-kng tsiām-tsiām siau-sit tī hái nih,
Pîng-tsīng sîn-sìng ê sî, su-siúⁿ Guá ê sî,
Thiaⁿ tio̍h gín-ná tī kue-lō͘ tsáu-lâi tsáu-khì. ---

Kiâⁿ kè ê kha-pō͘, khó-lîng ū Guá ê kha-pō͘-siaⁿ,
Guá kā lí kóng, tio̍h kíng-síng! Khuàⁿ àm-mî thiⁿ-tshiⁿ ê iáⁿ.
Pâng-king ná lâi ná àm, ná hûn hn̄g-hn̄g bô si̍t-tsāi.
Kuaiⁿ mn̂g tshuàⁿ hó, tán tī tshù-lāi,
khó-lîng kim-mî Guá beh lâi.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com