《台語荒漠甘泉（全羅版）》

 | | | 轉寄

"Thih-liān"

作者 陳清俊 翻譯 2009.12.27

listen


Tsa̍p-jī ge̍h jī-tshit (Tsa̍p-jī ge̍h jī-tsa̍p-tshit ji̍t)

"I siū thih-liān khún-pa̍k;" (Si-phian 105:18)

Siàu-liân ê sî, pē tāng-tàⁿ, siū iu-siong kap sit-bōng ê thih-liān, sim-lîng té-khòng tsuē-ok ê ín-iú, lóng sī huat-tián tshut tshin-tshiūⁿ thih tsi̍t-puaⁿ ê kian-tīng ì-tsì, ū jím-nāi, ū gē-li̍k. Tsiah ê sìng-tsit sī ko-tshiau sìng-keh só͘ buē thang bô ê ki-pún ki-tshó͘.

M̄-thang siám-pī khó͘-lān, ài tiām-tiām, nāi-sim, ho̍k-tsiông lâi bīn-tuì koh tsiap-siū. Khak-sìn tse sī Siōng-tè hùn-liān lí lîng-sìng kian-kò͘ ê hong-huat. Sè-kan su-iàu tshin-tshiūⁿ thih tsi̍t-puaⁿ ê kong-kiông líng-tō, thih tsi̍t-puaⁿ ê kun-tuī, thih-kha kǹg-tshiú ê khuì-la̍t. Siōng-tè só͘ su-iàu thih tsi̍t-puaⁿ ū ì-tsì ê sìng-tô͘, pīng m̄-sī tsiong kǹg-thih khǹg ji̍p khì i ê lāi-bīn, tsí ū sī tī khó͘-lān tiong thuàn-liān tshut-lâi ê, tsiū I iông-ún lâng tio̍h siū khó͘.

Lí ê it-sing sī-m̄-sī tī tan-tiāu sing-ua̍h tiong lōng-huì tiāu, liu kè-khì? Lí kiám bat siū lâng huán-tuì, siū lâng gō͘-huē, siū lâng tsik-pī mah? Lí ê khó͘-thàng kiám tshin-tshiūⁿ tī tshim-suaⁿ nâ-lāi, só͘ ta̍h ê tshiū-hio̍h tshiū-ki tsa̍p-tsháu hiah tshim, hiah pháiⁿ kiâⁿ, hiah pháiⁿ jím-siū mah? Nā-sī án-ni, m̄-thang hue-sim, ài iōng-sim, in-uī Siōng-tè tsiong lí hē tī thih-puaⁿ ê hùn-liān. Ài tsia̍h khó͘, tsiah uē tit îng-kng ê kim-bō. Khó͘-thàng tsìn-ji̍p lí ê lîng, piàn kǹg-thih, hō͘ lí kian-kiông ióng-kám. --- F.B. Meyer


Bô-hiâm lō͘ kuân-kē bô pîⁿ, bô-hiâm lō͘ tsin kiā,
Hân-líng ê thàu-tsá, á-sī iām-jia̍t ê tiong-tàu lóng m̄-kiaⁿ,
Bô phian tsó phian iū, iā bô ua̍t-tńg-sin kiâⁿ,
Hiòng tsîng kiâⁿ, put-kuán sī ji̍t-sî á-sī o͘-àm iā,
Tsit tiâu lō͘ sī thàu tńg-khì tshù --- thiⁿ-siâⁿ.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com