《台語荒漠甘泉（全羅版）》

 | | | 轉寄

“Siōng-tè teh tsiàu-kò͘ lí”

作者 陳清俊 翻譯 2010.01.03

listen



Tsiaⁿ ge̍h tshue saⁿ. (It ge̍h saⁿ ji̍t)


“Guá beh tsiàu tī guá bīn-tsîng kui-kûn tsing-siⁿ ê li̍k-liōng, ia̍h tsiàu gín-á ê li̍k-liōng, bān-bān tsìn-tsîng.” (Tshòng-sè-kì 33:14)


Tse sī tsi̍t-ê tsin tshù-bī ê tô͘-uē! Biô-siá Ngá-kok tuì tsing-siⁿ kap gín-á ê tsû-sim! I bô ài kuáⁿ kín-kín lâi kuáⁿ-lō͘, i bô ài tsiàu tuā-lâng ê li̍k-liōng lâi tshui-kuáⁿ in, sī tsiàu in gín-á ê khuì-la̍t bān-bān tshuā in kiâⁿ. I tsai i ê kiáⁿ-jî suè-hàn, iù-tsíⁿ, gû iûⁿ iā ū suè-tsiah ê teh tshī-ni. I tsai in tsi̍t-kang uē kiâⁿ guā-tsuē lō͘; i khó-lū liáu, tsiah an-pâi in ê hîng-tîng. Jî-tshiáⁿ tsi̍t-tiâu khòng-iá ê lō͘, í-tsîng i iā bat kiâⁿ-kè; ū khi-khu, ū guî-hiám, ū iâm-jia̍t, ū hân-líng, i ū king-giām kè. Só͘-í i tuì in kóng, “Guá beh bān-bān tshuā in kiâⁿ.”

“In-uī tsit-tiâu lō͘ lín m̄-bat kiâⁿ-kè.” (Iok-su-a 3:4)

Tsîng-bīn ê lō͘ lán lóng m̄-bat kiâⁿ-kè, tsóng-sī Tsú Iâ-so͘ bat kiâⁿ-kè. Lán ê tsiân-tô͘ tuì lán tsin-tsiàⁿ sī bông-bông biáu-biáu. Tsóng-sī Tsú lóng king-kè lah. Tsit-tsām hō͘ lán sim luān-tshau-tshau, hit-tsām hō͘ lán sin-thé nńg-sô-sô, līng-guā tsi̍t-tsām hō͘ lán tshuì-ta o͘-àm-hîn, koh tsi̍t-tsām hō͘ lán khuì lóng tshuán buē-kè-lâi; kî-si̍t tsiah-ê Tsú lóng bat king-li̍k kè, kiâⁿ kè. Sìng-king kóng, “Iâ-so͘ kiâⁿ-lō͘ siān.” (Iok-hān 4:6) Kiâⁿ-lō͘, hong-hō͘, tsai-lān, kuân-suaⁿ uē hō͘ I ià-siān, khiok buē thang bia̍t I ê jia̍t-tsîng. I só͘ tú-tio̍h ê khó͘-lān, hō͘ I tsiâⁿ-tsuè siōng-hó ê bo̍k-tsiá. “I tsai lán ê thé-tsit, siàu-liām lán sī thô͘ tsuè ê.” (Si-pian 103:14) I ta̍k-sî ta̍k-khik tài-liām lán, bô hō͘ lán kiâⁿ tī lán só͘ tam-tng buē-khí ê lō͘. (Frances Ridley Havergal)


“Tsi̍t ki tsháu, tsi̍t tiám lō͘, Thiⁿ bô tsua̍t lâng ê lō͘.”

Bô-it-tīng siông-siông tī tshiⁿ-tshuì ê tsháu-tiûⁿ,
I tsai I ê lóng-tsóng ê iûⁿ,
Īng tsû-ài tshuā in kè guî-hiám ê lō͘-tsiūⁿ,
O͘-àm tiong khan tī I ê tshiú-tsiúⁿ.

Bô-lūn sī tī hó-thiⁿ ê suaⁿ-tíng,
Á-sī tī bô ji̍t-thâu ê suaⁿ-kok, lō͘-kìng,
O͘-hûn, im-iáⁿ tîng-tîng,
Ū I ê tông-tsāi, hòng-sim an-lîng. (Barry)


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com