《台語荒漠甘泉（全羅版）》

 | | | 轉寄

"I hō͘ lâng an-tsīng"

作者 陳清俊 翻譯 2010.01.31

listen


Tsiaⁿ ge̍h sam-it (It ge̍h saⁿ-tsa̍p-it ji̍t)

Tī kiông-lia̍t ê po̍k-hong tiong, I hō͘ lâng an-tsīng. Guán kap I tâng tsûn, beh tō͘ kè khì ô͘ ê tuì pîng huāⁿ. Tsûn sái kàu ô͘ tiong-sim, tshim ê só͘-tsāi, koh sī puàⁿ-mî, hut-jiân kông-hong tuā khí, sàu-tio̍h tsûn, tsûn iô kah tsin lī-hāi, kiông-kiông beh tîm lo̍h-khì. Tsú Ki-tok tī tsûn ni̍h khùn-tshíⁿ, tsik-pī hong kap íng, I tsi̍t ē ia̍t-tshiú, hong, íng tsiū tiāⁿ, thiⁿ-tē koh huê-hok pîng-tsīng. Tī kông-hong hù-hù háu ê siaⁿ, tī tuā-íng lòng-lòng kiò ê siaⁿ, Iâ-so͘ kóng, "tio̍h tsīng-tsīng." (Má-khó 4:39). Lí kiám bô thiaⁿ tio̍h mah? I ê siaⁿ tsi̍t ē kóng, tuā tē tùn-jiân an-tsīng. "I hō͘ lâng an-tsīng." Tī lán sit-khì lāi-sim ê li̍k-liōng kap an-ia̍t ê hióng-siū, sim lāi luān-luān put-an ê sî, I hō͘ lán an-tsīng. Ū-sî in-uī lán siuⁿ tsù-tiōng sè-kan ê sū-bū, I tsiah the̍h khì tsiah ê. Lán ài sè-kan ê huaⁿ-hí, iàn-lo̍k, kám-tsîng, lán ê bāng, tsū-ngó͘ buán-tsiok, in-uī I ê thiàⁿ-thàng, I the̍h khì tsiah ê, kà-sī lán sím-mi̍h sī khah tiōng-iàu ê sū, sī sè-kan tsiām-sî ê hióng-siū, á-sī tī Ki-tok lāi-bīn íng-uán ê îng-kng. Ài tsiong Ki-tok khuàⁿ tē-it. I suè-suè ê siaⁿ tuì lán kóng, "guá tī lí sin piⁿ, sù lí sim-lîng ê an-tsīng. "I hō͘ lâng an-tsīng."

"I hō͘ lâng an-tsīng", guá ê Tsú, guá ê hiaⁿ-ko,
I ê kha ap-pîⁿ thàng-thiàⁿ ê lō͘,
I ê tshiú the̍h khì lán ê thòng-khó͘,
Kóng sī sún-sit, kî-si̍t sī tit hok tsi tō.

Lí un-sù kap bû-tsīn ê thiàⁿ.
Guá beh kiû tsi̍t hāng, tī muí pái ê guî-kíng,
Thiaⁿ tio̍h Lí ê siaⁿ,
Tuì Lí líng-tsīng ê tuā-lîng tit an-tsīng.

Guá lîng tuà tī sìn-sim an-lîng khì-hun,
Huân-ló kiaⁿ-hiâⁿ tsiū bô hūn.
Kap Lí tâng-kiâⁿ, iu-siong buē siong-hāi,
Ū Lí khan-tshiú, o͘-àm lō͘ iā tsū-tsāi.

Tsá-khí, lê-bîng siā kng-suàⁿ,
O͘-àm, im-iáⁿ lóng siau-suàⁿ,
Thìng-hāu tshing-tsá sim ho͘-huan,
Ū lí pîng-an, buē koh huân.

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com