《台語荒漠甘泉（全羅版）》

 | | | 轉寄

"Sìn-khò sūn-ho̍k"

作者 陳清俊 翻譯 2010.01.24

listen



Tsiaⁿ ge̍h jī-sì (It ge̍h jī-tsa̍p-sì ji̍t)

"Tsóng-sī tsíⁿ-á tshē bô hioh-kha ê só͘-tsāi, tsiū tò-tńg lâi tuā-tsûn Ná-a hia; ..... Kàu ē-hng tsíⁿ-á tò-lâi i hia, tshuì kā tsi̍t-hio̍h sin ê kaⁿ-ná-hio̍h." (Tshòng-sè-kì 8:9,11)

Siōng-tè tsai sím-mi̍h sî beh pàng, á-sī bô beh pàng bîng-hián ê sìn-hō lâi ke-thiⁿ lán ê ióng-khì. Put-kuán sī ū á-sī bô sìn-hō lán lóng sìn-khò I, sī juā-tsiâⁿ suí ê sū. Koh khah suí ê, sī tī lóng-tsóng bô bîng-hián ê sìn-hō, lán ia̍h sī uân-tsuân sìn-khò I. I ài hō͘ lán bîng-pi̍k I ê uē, I ê ìng-ún sī tsin-si̍t, sī khó-khò, pí ū khuàⁿ-tio̍h jīm-hô sìn-hō khah iàu-kín. I sàng-tshut sìn-hō sī tsin hó, tsóng-sī lán beh sìn-khò I, bô su-iàu in-uī ū siu tio̍h sìn-hō, koh khah hó. Tsí-iàu in-uī I ê uē, bô jīm-hô ê sìn-hō tsiū siong-sìn Siōng-tè ê uē tit-tio̍h I siōng tsuē ê thiàⁿ-thàng. --- Tsarles Gallaudet Trumbull

Siong-sìn I; po̍k-hong ba̍t-hûn lâi-lîm,
Liân só͘-ū ê thiⁿ iā bô huê-im,
Iáu beh siong-sìn I?
I thiaⁿ muí tsi̍t ê kî-tó siaⁿ-im,
Tshik-tsiáu-á pua̍h-lo̍h, I iā kuan-sim.

O-ló I; tng pi-siong, iu-tshiû, khó͘-thàng kūn-uá,
Liân siōng sim-ài ê mi̍h iā sit-khì, tsiah-nih tuā,
Iáu beh o-ló I?
Lán ê sún-sit sī beh tit khah khuah,
Só͘-ū sī lán ê, nā-sī I kap lán tuà.

Tio̍h buán-tsiok; tng muí tiâu lō͘ siū tsó͘-tsí,
Bô koh hióng-siū sè-kan hó mi̍h,
Iáu beh buán-tsiok?
Siong-sìn, an-jiân, sìn-khò I,
I lâi kap lán khiā-khí.

Kî-tó, iân-tshiân ê huê-ìng, m̄-sī kū-tsua̍t. Tsuē-tsuē ê kî-tó lóng siu-tio̍h koh kì-lio̍k khí-lâi, pīng-tshiáⁿ tsù-bîng, "Sî iáu buē kàu." Siōng-tè ū I ê sî-kan kap tīng-hó ê bo̍k-tik. Tsit-uī kuat-tīng lán sìⁿ-miā tn̂g-té ê Siōng-tè, iā sī kuat-tīng lán sím-mi̍h sî tit-tio̍h kiù ê Siōng-tè.
附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com