《台語荒漠甘泉（全羅版）》

 | | | 轉寄

"Hong ê só-sî"

作者 陳清俊 翻譯 2010.05.02

listen


Gō͘ ge̍h tshue-jī (Gō͘ ge̍h jī ji̍t)

"Iâ-hô-hua tī thiⁿ-tíng siat-li̍p I ê pó-tsō, I ê kok-kuân kuán-hat bān-hāng-ū." (Si-phian 103:19)

Tī tsi̍t ê tsá tshun, guá tshut-mn̂g ê sî, ū tsi̍t-tsūn tang-hong bô-tsîng teh sàu lâi, kiông koh ta-sò, tshe khí-lâi tsin-tsuē thô͘-hún. Tng guá kā só-sî tuì mn̂g-ni̍h the̍h khí-lâi ê sî, tsin bū-nāi teh kóng, "Hi-bōng tsit-tsūn hong uē..." Hut-jiân-kan guá ê su-sióng thîng-tsí, hong-hiòng tsuán-piàn, tsit kù uē bô koh kè-sio̍k suà lo̍h-khì lah.

Guá kè-sio̍k kiâⁿ, tsit ê sū piàn-tsuè guá tsi̍t ê gū-giân kò͘-sū. Guá sióng-siōng ū tsi̍t ê thiⁿ-sài hō͘ guá tsi̍t ki só-sî kóng, "Guá ê tsú-lâng sàng lí i ê thiàⁿ, ài guá hō͘ lí tsit ê." Guá hò͘ⁿ-kî mn̄g kóng "Tse sī sím-mi̍h?" "Sī hong ê só-sî." Thiⁿ-sài huê-tap liáu, tsiū siau-sit khì.

Guá khí-tsho͘ siūⁿ, "tse it-tīng sī uē hō͘ guá hīng-hok." Guá beh kàu suaⁿ-tíng hong-guân ê só͘-tsāi suan-pò͘ kóng, "guá beh siau-bia̍t tsit ê thó-ià ê tang-hong, bô koh tsok-lōng!" Tsiong hit ê bô iú-siān ê hong tshe lâi, kuaiⁿ khí-lâi, tsin tik-ì kā i só-khí-lâi, kā i siu-si̍p khí-lâi."

Jiân-āu guá khuàⁿ tsiu-uî, mn̄g ka-kī, "Guá beh īng sím-mi̍h lâi tāi-thè i ah?" Guá siūⁿ un-luán ê lâm-hong. Sóng-khuài ê lâm-hong tuà tshut-lâi tú tshut-sì ê iûⁿ-ko, sin-khui ê hue-luí kap kok-tsióng ê tsháu-ba̍k. Tsóng-sī tng guá tsiong só-sî tshah ji̍p-khì mn̂g-khang ê sî, só-sî suah uē thǹg guá ê tshiú. Guá tuā kiò kóng, "Guá teh tsuè sím-mi̍h?" Sáng tsai guá ín-khí juā-tuā ê sún-sit? Guá thái-uē tsai tshân-iá sī su-iàu sím-mi̍h? Guá tsit ê gōng-siūⁿ uē ín-khí tshing-tshing bān-bān ê būn-thê tshut-lâi!"

Guá ka-kī kiàn-siàu, giâ thâu tshíng-kiû Tsú tshe thiⁿ-sài tsiong tsit ki só-sî the̍h tò-tńg. Í-āu guá lóng bô ài koh ū tse só-sî. Liāu-sióng bô kàu, kìng-jiân Tsú tshin-sin kàu guá sin-piⁿ, I tshun-tshiú the̍h só-sî, guá khǹg tī I ê tshiú ê sî, khuàⁿ-tio̍h só-sî tsiap-tshiok tio̍h hit ê sîn-sìng ê ting-hûn.

Guá muá-sim àu-náu, I tuà hit-ê sîn-sìng koh thiàⁿ-thàng ê ting-hûn, guá kìng-jiân iáu hiâm I ê tshiú só͘ tsuè ê sū. I tsiong só-sî hē tī io-tuà ê tíng-bīn, guá mn̄g kóng, "Lí pó-kuán hong ê só-sî mah?" "Sī, guá ê kiáⁿ," I an-siông huê-tap. I kóng-uē ê sî, guá tsù-ì tio̍h guá ê it-sing ê só-sî iā lóng kuà tī hia. I khuàⁿ guá tio̍h tsi̍t kiaⁿ ê khuán, mn̄g kóng, "Kiáⁿ ah, lí kiám m̄-tsai, guá ê kuân-pìng kuán-lí bān-hāng-ū mah?"

Guá mn̄g, "Lí thóng-tī bān-mi̍h, guá hiâm tsi̍t nn̄g kù uē, kiám ū iàu-kín mah?" I un-jiû tshun tshiú hē tī guá sin tsiūⁿ kóng, "Kiáⁿ ah, tī it-tshè ê sū, thiàⁿ guá, sìn guá, o-ló guá sī siōng an-tsuân pîng-an." --- Mark Guy Pearse


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com