《台語荒漠甘泉（全羅版）》

 | | | 轉寄

"Siōng-tè ê pîng-iú"

作者 陳清俊 翻譯 2010.05.09

listen


Gō͘ ge̍h tshue-káu (Gō͘ ge̍h káu ji̍t)

"A-pik-la̍h-hán iáu khiā tī Iâ-hô-hua ê bīn-tsîng." (Tshòng-sè-kì 18:22)

Tī tsit tsiuⁿ, A-pik-la̍h-hán uī kî-thaⁿ ê lâng ê sìⁿ-miā kiû. Lán tsuè Siōng-tè ê pîng-iú iā uē-thang án-ni tsuè. Put-kò lí beh siūⁿ ka-kī ê sìn-sim bô A-pik-la̍h-hán hiah tuā, kap Siōng-tè ê kau-puê iā bô hiah tshim. Tsóng-sī m̄-bián hue-sim. A-pik-la̍h-hán ê sìn-sim mā m̄-sī tsi̍t-pō͘ ting-thian, sī tsi̍t-pō͘ tsi̍t-pō͘ kiâⁿ tshut-lâi, lán iā uē-thang án-ni lâi tsuè.

Ū sìn-sim king-kè khó-giām tik-sìng ê lâng, iáu ū khah tuā ê khó-giām uē lâi. Siōng hó ê pó-tsio̍h sī king-kè siōng iōng-sim ê tshiat, kuah, buâ. Siōng kuì-tiōng ê kim-sio̍k sī king-kè siōng bíng-lia̍t ê hé ê thuàn-liān. Lí thang khak-tīng, A-pik-la̍h-hán nā bô king-kè siōng giâm-keh ê khó-giām, íng buē-thang tshing tsuè "sìn-sim ê pē."

Khuàⁿ Tshòng-sè-kì jī-tsa̍p-jī tsiuⁿ, tī tē jī tsat, Siōng-tè tuì A-pik-la̍h-hán kóng, "Lí tuà lí ê kiáⁿ, tsiū-sī lí to̍k-siⁿ ê kiáⁿ, lí só͘ thiàⁿ ê Í-sat, khì Mô͘-lī-a ê tuē, Guá só͘ beh tsí-sī lí ê suaⁿ; tī-hia tsiong i hiàn-tsuè sio-tsè." Suà lo̍h-khì, khuàⁿ i sim-tsîng tîm-tāng, tuà-tio̍h khat-bōng koh khiam-pi sūn-ho̍k khì tsiūⁿ Mô͘-lī-a suaⁿ. I tsiàu i tiong-sim só͘ thiàⁿ só͘ sū-hōng ê Siōng-tè ê bīng-līng tuà Í-sat khì.

Lán nā huâi-gî Siōng-tè tī lán sìⁿ-miā ê tsok-uî ê sî, tī tsia thang ha̍k-si̍p kà-sī! Tuì tsit ê huâi-gî kiaⁿ-lâng ê tsîng-hóng, bô-lūn īng sím-mi̍h kái-sueh lóng bô lō͘-īng, in-uī tse sī īng sū-si̍t ê lē hō͘ kó͘-kim ê lâng ê kà-sī. Liân thiⁿ-sài iā kìng-uì tī piⁿ-á khuàⁿ. A-pik-la̍h-hán ê sìn-sim sī-m̄-sī khiā uē tiâu, beh tsiâⁿ-tsuè tuì Siōng-tè só͘ ū ê tsú-bîn ê tsi̍t tsióng li̍k-liōng kap pang-tsān? I siū ê khó-giām sī-m̄-sī uē tsìng-bîng īng bô iô-tāng ê sìn-sim, thang khuàⁿ tshut Siōng-tè íng-uán sī sìn-si̍t?

Tap-àn sī "sī". A-pik-la̍h-hán ê sìn-sim thong-kè tsit ê siōng-tuā ê khó-giām. Tsú ê thiⁿ-sài lán ê Tsú Iâ-so͘, Iâ-hô-hua kap I, tī I ê ìng-ún, bô-lūn juā tsuē, lóng sī "sī" kap "si̍t-tsāi" (tsham-khó Ṳ Ko-lîm-to 1:20) tuì A-pik-la̍h-hán kóng, "guá taⁿ tsai lí sī kìng-uì Siōng-tè," (Tshòng-sè-kì 22:12). Tsú si̍t-tsè-siōng sī tuì i kóng, in-uī king-kè tsit ê uí-tāi ê khó-giām, lí siong-sìn guá, guá iā siong-sìn lí, lí thang íng-uán tsuè "guá ê pîng-iú." (Í-sài-a 41:8) Tsú ìng-ún A-pik-la̍h-hán "Guá sù-hok beh sù-hok lí, ... bān-pang beh in-uī lí ê hō͘-è tit-tio̍h hok-khì; in-uī lí thiaⁿ-thàn Guá ê uē." (Tshòng-sè-kì 22:17,18)

"Khó-kiàn kìⁿ-nā sìn ê lâng kap ū sìn ê A-pik-la̍h-hán tâng tit-tio̍h hok-khì." (Ka-lia̍p-thài 3:9) tsit kù uē sī tsin, sī íng-uán tsin ê.

Tsuè Siōng-tè ê pîng-iú m̄-sī sió-khuá sū.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com