《台語荒漠甘泉（全羅版）》

 | | | 轉寄

''Ki-tok ê pîng-an''

作者 陳清俊 翻譯 2010.06.13

listen

La̍k ge̍h tsa̍p-saⁿ (La̍k ge̍h tsa̍p-saⁿ ji̍t)

"Guá tsiong guá ê pîng-an siúⁿ-sù lín." (Iok-hān 14:27)

Ū nn̄g ê bí-su̍t-ka, uē-tô͘-ka beh uē in só͘ siūⁿ an-hioh, pîng-an ê tô͘. Tsi̍t ê sī uē tshim-suaⁿ lāi pîng-tsīng ê ô͘, līng-guā tsi̍t ê uē tuā tsuí-tshiâng, tsuí-tsiâng ē ū tsi̍t tsâng lám-lám ê tshiū, suî tī phùn khí-lâi tsuí-pho ê tíng-bīn, tshiū-ki hō͘ tsuí-pho phùn tâm-tâm, an-jiân siⁿ tī hia.

Tē it pak tô͘ sī piáu-hiān tshut pîng-pîng tsīng-tsīng bô ua̍h-khì ê an-hioh. Tē jī pak tô͘ khiok biô-siá tshut ū ua̍h-khì tsin-tsiàⁿ ê an-hioh, pîng-an.

Piáu-bīn khuàⁿ, Ki-tok só͘ siū ê, sī to-tsai to-lān ê it-sing. Hong-po̍k, khùn-lân, tsi̍t-pho koh tsi̍t-pho suà-tsiap lâi, ti̍t kàu I ià-siān ê sin-thé hông khǹg tī hûn-bōng lāi. Tsóng-sī I lāi-sim ê sing-ua̍h khiok sī pîng-tsīng ná kiàⁿ tsi̍t iūⁿ, sī hui-siông pîng-tsīng.

Jīm-hô lâng jīm-hô sî-tsūn, lâi kàu I bīn-tsîng, lóng beh tit-tio̍h pîng-an. Liân jîn-kan ê ing-khián (tsáu-káu) tī Iâ-lō͘-sat-líng ê kue-lō͘ teh tng-tán, teh tshē beh lia̍h I ê sî, I iáu tuì I ê ha̍k-sing kóng, sù in "guá ê pîng-an."

Pîng-an m̄-sī tī lé-pài-tn̂g lāi hit-tsióng sîn-sìng tsong-giâm ê kám-kak, sī tuì lāi-sim khiā-tsāi tī Siōng-tè hit-tsióng ê tiām-tsīng ê sim-kíng. --- Henry Drummond

Guá sù pîng-an, tng lí pi-siong huân-ló,
Hō͘ lí pîng-tsīng, an-uì kap sìn-khò.

Guá sù pîng-an, tng kî-tó ná tshin-tshiūⁿ bô thiaⁿ-kìⁿ,
Tsai guá ê ìng-ún, guá ê uē, it-tīng uē si̍t-si.

Guá sù pîng-an, tng lí ko͘-to̍k,
Iā-ing àm-mî ê kua-siaⁿ siōng suí siōng khuài-lo̍k..

Guá sù pîng-an, tng sí-sit king-kè,
Uì kng-bîng ê lō͘ thàng kàu si̍p-jī-kè.

Guá sù pîng-an, tī tuì-ti̍k kong-kik, ki-tshì,
Thong-kè bû-tsîng bú-jio̍k, kap Tsú kau-puê ná kam-tiⁿ.

Guá sù pîng-an, tng sin-khó͘ kang-tsok lâu-kuāⁿ,
In-uī guá ê thâu-hia̍h iā ū huih-tsuí teh tsuāⁿ.

Guá sù pîng-an, tī hó-pîng-iú tshut-buē,
Pîng-an, thiàⁿ-thàng, teh uī in kî-tó, sià-tsuē.

Guá sù pîng-an, tng tsí-ū sí-lō͘ tsi̍t tiâu,
Si̍p-jī-kè lō͘ thong-kàu Guá tsia liáu.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277 begin_of_the_skype_highlighting              06-235-6277      end_of_the_skype_highlighting分機(122~124) ， e-mail:bo͘k@pctpress.org