《台語荒漠甘泉（全羅版）》

 | | | 轉寄

"Siōng-tè ê iân-tshiân"

作者 陳清俊 翻譯 2010.07.04

listen


Tshit ge̍h tshue-sì (Tshit ge̍h sì ji̍t)

"In-uī tsit ê bi̍k-sī iáu-ū tiāⁿ-tio̍h ê kî, sui-jiân iân-tshiân, iáu-kú tio̍h thìng-hāu, in-uī tik-khak uē kàu bô koh iân-tshiân." (Hap-pa-kok 2:3)

Ū tsi̍t pún sió-tsheh, kiò tsuè “Kî-thāi-pâng” (Expectation Corner), lāi-bīn biô-siá tsi̍t ê jîn-bu̍t Su-lō͘-bān A-tong, (Adam Slowman) siū tshuā khì khuàⁿ Siōng-tè ê pó-khò͘. Tī hit lāi-té ū tsin-tsuē kî-biāu ê sū-bu̍t, koh ū tsi̍t ê só͘-tsāi sī “Iân-tshiân sù-hok tshù”. Tī hia Siōng-tè tsûn tsin tsuē kî-tó ê tap-hok, thìng-hāu sik-tòng ê sî tsiah uē huat tshut.

Tuì hiah ê kî-tó tsiū ǹg-bāng ū tap-hok ê lâng lâi kóng, ài king-kè tsin kú ê sî-kan tsiah uē liáu-kái tio̍h, “Iân-tshiân huê-hok pīng m̄-sī kū-tsua̍t.” Sū-si̍t-siōng, tī tsit ê “Iân-tshiân sù-hok tshù” khǹg tsin tsuē lán só͘ siūⁿ-buē-tio̍h iú-kuan thiàⁿ kap tì-huī ê ò-pì! Lâng só͘ huaⁿ-hí ê sù-hok tshin-tshiūⁿ tuì tshiū-tíng bán tsuí-kó, ké-tsí iáu tshiⁿ-tshiⁿ tsiū siūⁿ beh bán, tsóng-sī Siōng-tè ài lán tán kàu ké-tsí sîng-sio̍k tsiah lâi bán.

“Iâ-hô-hua in-uī án-ni beh thìng-hāu lâi si un-huī hō͘ lín; … huān-nā thìng-hāu I ê, lóng ū hok-khì.” (Í-sài-a 30:18) Tsú tī lán it-tshè khùn-lân tiong khuàⁿ-kò͘ lán, bô hō͘ lán tú-tio̍h tshiau-kè lán só͘ uē tam-tng ê. I īng lia̍t-hé sio khì lán lāi-bīn put-sûn ê tsa̍p-tsit, jiân-āu huaⁿ-huaⁿ hí-hí tsín-kiù lán.

Bo̍h-tit huâi-gî I ê thiàⁿ, hō͘ I siong-sim. Huán-tńg tsiong ba̍k-tsiu giâ kuâiⁿ khuàⁿ tshing-tshó͘, o-ló I ê tsín-kiù. Siōng-tè ê iân-tshiân í-king khó-giām lí ê sìn-sim, I ê pò-siúⁿ sī hong-hù bô-pí.

Sió sìn ê lâng,
Siōng-tè buē bat hō͘ lí sit-bāng!
Tng it-tshè khuàⁿ sī àm, tîm-tāng,
Tsin-kín lí beh buē-kì-tit muí-tsi̍t hāng, ---

Buē-kì-tit I tshuā lí,
Buē-kì-tit I tsiong lō͘ sàu tshing-khì,
Tī hûn tiong tshut thài-iông,
Hō͘ àm-mî piàn ji̍t-sî.

I tshuā lí kàu tse tē-pō͘,
I buē pàng lí bô kò͘,
Khuàⁿ lí iu-thâu kat-bīn hiah tshim,
Uē siong tio̍h I thiàⁿ-thàng ê sim.

Ah! Bô koh giâu-gî,
Tsiong pún-sin kau-thok I,
Sìn-khò I tī kè-khì,
Kim-ji̍t iā tio̍h án-ni.



附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com