《台語荒漠甘泉（全羅版）》

 | | | 轉寄

Thuàn-liān

作者 陳清俊 翻譯 2007.03.04

listen








Saⁿ ge̍h sì ji̍t

"Tsiū-sī o̍h hiah ê tuì sìn kap thun-lún lâi sîng-tsiap tsiah ê ìng-ún ê lâng." (Hi-pik-lâi 6:12)

Sìng-king tiong sìn-sim ê uí-jîn, tuì in sìng-lī ê kuan-tiám ǹg lán ho͘-kiò, kó͘-lē lán kóng, "í-tsîng ê lâng tsuè uē kàu ê, hiān-tsāi ê lâng iā it-tīng tsuè uē lâi." In ê thê-tshíⁿ, m̄-nā ài ū sìn-sim, iā ài ū jím-nāi, thun-lún tsiah uē tsiong kang-tiâⁿ tsuè uân-siān. Lán tio̍h tsù-ì, m̄-thang in-uī lán ut-tsut koh giâu-gî, siūⁿ beh thuat-lī Siōng-tè ê tshiú, á-sī the-sî I só͘ hō͘ lán tsi̍t pái kà-sī ê ki-huē.

Tsi̍t ê lāu thih-tshiūⁿ kóng liáu tsin tio̍h, "Guá siōng kiaⁿ ê sū, sī hông hiat-lo̍h tī pháiⁿ-thih tui lāi-bīn. Lí tsai, uī-tio̍h beh ū tsi̍t-tè hó kǹg, guá tsiū thuàn-liān i, tsiong i ka jia̍t, tuî, kòng, jiân-āu khǹg ji̍p-khì líng-tsuí lāi. Tsin-kín guá tsiū tsai tsit tè thih sī-m̄-sī tòng-uē-tiâu tsit tsióng ê thuàn-liān. Tshì nn̄g saⁿ pái tsiū tsai. Nā-sī i tòng-buē-kè thuàn-liān, suah tshuì-khì, tsiū hiat i tī pháiⁿ-thih tui lāi, sio̍k-sio̍k buē hō͘ siu pháiⁿ-thih-á ê lâng."

"Guá tsai Siōng-tè iā īng siâng hong-sik lâi thuàn-liān guá, īng hé, īng tsuí kap I ê tāng-thuî tuî, phah. Nā-sī guá m̄-guān siū khó-giām á-sī tsìng-bîng put-phuè siū thuàn-liān, khióng-kiaⁿ I iā uē kā guá hiat tī pháiⁿ-thih-á tui ni̍h."

Tī sìⁿ-miā ê hé tng jia̍t teh sio lí ê sî, ài kian-tīng khiā tiâu-tiâu, in-uī "nā-sī āu-lâi, tsiū tī hiah-ê tuì kíng-kài lâi liān-ta̍t ê lâng, kiat pîng-an ê ké-tsí, tsiū-sī gī ê ké-tsí." (Hi-pik-lâi 12:11)

Thong-kè khó͘-tshó͘ tsiah uē tit tsiâⁿ-sìng. Lí tsai, Kǹg-khîm ê hiân sī su-iàu tsa̍p-it tùn ê ap-li̍k tsō-sîng, tsiah lâi tiâu-im, lí nā siū uē khí hit-tsióng ê ap-li̍k, Tsú beh tsiong lí ê khîm-im tiâu-tsíng kap thiⁿ-tíng ê ga̍k-ūn uân-tsuân hô-ha̍p.

Siū-siong, sún-hāi ê sū-piàn,
Hō͘ lâng tsiâⁿ-tsuè khah kìng-khiân.
Tshiⁿ-kiaⁿ, kín-tiuⁿ kap piàn-tshian,
Pí tshiò-tshiò kè-ji̍t khah iú-siān.

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw