《台語荒漠甘泉（全羅版）》

 | | | 轉寄

"Tsûn ǹg-bāng"

作者 陳清俊 翻譯 2010.09.05

listen

Káu ge̍h tshue-gō͘ (Káu ge̍h gō͘ ji̍t)

"huān-nā thìng-hāu I ê, lóng ū hok-khì." (Í-sài-a 30:18)

Lán siông-siông thiaⁿ kóng thìng-hāu Siōng-tè, si̍t-tsè-siōng sī teh thìng-hāu lán sī-m̄-sī í-king tsún-pī hó-sè. Līng-guā tsi̍t bīn, sī lán teh tán Siōng-tè, ti̍t-kàu I tsún-pī hó-sè.

Ū-ê kóng, iā tsin-tsuē lâng án-ni siong-sìn, lán nā ha̍h tī I ê tiâu-kiāⁿ, Siōng-tè tsiū huê-tap lán ê kî-tó. In kà-sī lán kóng, Siōng-tè ua̍h tī íng-uán ê khong-kan, bô kè-khì, bô tsiong-lâi, tsí-ū hiān-tsāi. Lán nā sūn-ho̍k I ê tsí-ì uân-sîng I ê iau-kiû, lán ê su-iàu má-siōng tit kái-kuat, lán ê kî-tó tit ìng-ún.

Tsit khuán ê sìn-sim ū i ê tō-lí, tsóng-sī tsí ū kóng tshut i tsi̍t pō͘-hūn ê tō-lí. Siōng-tè sī ua̍h tī íng-uán ê hiān-tsāi nih, tān-sī I si̍t-hîng I ê tsí-ì su-iàu sî-kan. Lán ê tshíng-kiû tshin-tshiūⁿ tsi̍t-lia̍p be̍h, á-sī tsíng-tsí lo̍h tī thô͘-kha. Su-iàu tshiau-tshut lán lîng-li̍k tsin-tsuē í-guā ê li̍k-liōng, lâi ūn-tsok tī i tíng-bīn, ti̍t-kàu si̍t-tsè ê sîng-kó tshut-hiān. --- tuì "Bî-suè ê siaⁿ"

Guá kiû tī iông-ī ê lō͘ kiâⁿ,
Lī-khui huân-tsa̍p ke-lāi sū-kiāⁿ,
Siūⁿ tī pa̍t hong-bīn sū-hōng Siōng-tè,
Tān-sī Iâ-so͘ kóng, "sî-tsūn iáu-buē."

Guá kiû iā tsíng-tsí tī pa̍t só͘-tsāi,
Tsū-iû kang-tsok, tsin tsū-tsāi,
Kap pa̍t ê kang-lâng saⁿ-kap tsuè-hé,
Tān-sī Iâ-so͘ kóng, "Tse m̄-sī guá só͘ hun-phài lí ê."

Guá kiû lī-khui sua-bô͘ kang-tiâⁿ,
Kàu tsuē-ok kiàn-siàu lîng-hûn ê siâⁿ,
Kiám-tshái tit in ê lîng-hûn sìⁿ-miā,
Tān-sī Tsú kóng, "Bô tī hia, sī tī tsia suan-iông guá ê miâ."

Guá kiû uī guá Ông tsing-tsiàn,
Tsiong I ê kî tuā-tuā îng-hián,
Tān-sī Tuā Tsiong-kun ài guá thìng-hāu kap tshiùⁿ-kua,
Tī pîng-huân sing-ua̍h tiong tshiùⁿ I khái-suân ê kua.

Guá kiû lī-khui khùn-khó͘ kan-lân,
Tī hia tsí-ū bû-nāi, tsīng-tsīng, ko͘-tuaⁿ teh tán,
Hi-bāng ū lâng saⁿ pang-tsān,
Tān-sī Iâ-so͘ ài guá kò͘ mn̂g tan-tan.

Guá kiû lī-khui ji̍t-ji̍t ê huân-tsa̍p,
Ná tshin-tshiūⁿ bô lâng liáu-kái lâi tshap,
Tān-sī Ki-tok kóng, "Tsit ê tē tuì lí sī sik-ha̍p,
Hi-bāng kā guá tsìng hi-kî ê hue siū tsiap-la̍p."

Taⁿ guá bô koh kiû hí-tsún,
Tsí guān kiâⁿ I tsí-ì, bô-lūn hn̄g-kūn,
Uī I kang-tsok tsuē-tsió bô-lūn,
Án-ni kuat-ì bô suán-ti̍k, sī guá sim an-hūn.

Jím-nāi ê ì-gī tsiū-sī guān-ì thìng-hāu. --- tuì "Thian-lō͘ li̍k-thîng"


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org