《台語荒漠甘泉（全羅版）》

 | | | 轉寄

"Siōng sik-tòng ê si̍p-jī-kè"

作者 陳清俊 翻譯 2010.08.29

listen

Pueh ge̍h jī-káu (Pueh ge̍h jī-tsa̍p-káu ji̍t)

"Ka-kī giâ I ê si̍p-jī-kè." (Iok-hān 19:17)

“Uāⁿ si̍p-jī-kè” sī tsi̍t siú si, kóng-khí ū tsi̍t ê ià-siān ê hū-lú, i siūⁿ i só͘ pē ê si̍p-jī-kè pí pa̍t-lâng khah tāng, só͘-í hi-bōng uē thang suán līng-guā pa̍t-lâng ê si̍p-jī-kè. Tng i khùn ê sî, bāng-kìⁿ hō͘ lâng tshuā kàu ū tsin-tsuē bô siâng-khuán ê si̍p-jī-kè ê só͘-tsāi, thang lâi suán. In ê hîng bô siâng, tuā-suè bô siâng, kî-tiong ū tsi̍t ki siuⁿ pó-tsio̍h, an n̂g-kim ê si̍p-jī-kè. I kóng, “guá thang sóng-khuài lâi pē tsit ki.” Tsiū giâ tsit ki si̍p-jī-kè khí-lâi, bô phah-sǹg, tsit ki siong-tong tāng, īng i ê sin-thé giâ tsit-ki tsiū khiā bô hó-sè, kiông-kiông beh pua̍h-tó. Pó-tsio̍h kim-kim sih-sih si̍t-tsāi tsin suí, tsóng-sī tuì i siuⁿ tāng lah.

Suà lo̍h-khì khuàⁿ tio̍h tsi̍t-ki tsin suí ê si̍p-jī-kè, ū khik tô͘-iūⁿ, koh ū tshiⁿ hue tńg-se̍h tī tíng-bīn. I siūⁿ tse it-tīng tsin sik-ha̍p i. I tsi̍t ē the̍h khí-lâi, hue ê ē-bīn ū tshì, tsha̍k phuà i ê phê-hu lâu-huih.

Tsuè-āu i khuàⁿ-tio̍h tsit ê tsin phok-sò͘ ê si̍p-jī-kè, bô pó-tsio̍h, bô tiau-khik, tíng-bīn tsí-ū siá kuí jī piáu-sī thiàⁿ ê jī, i kā i the̍h khí-lâi, khak-si̍t pí kî-thaⁿ só͘-ū ê si̍p-jī-kè khah hó, iā iông-ī pē. I tsi̍t ē khuàⁿ, huat-hiān he sī tsìm kè tī thiⁿ-tíng ê kong-hui lāi uē huat kng. Koh khuàⁿ, guân-lâi sī i ka-kī hit ki si̍p-jī-kè. I hiān-tsāi tsiah tsai, tse sī tuì i siōng-hó ê tsi̍t ki, tuì i sī siōng khin-sang, sik-ha̍p ê.

Lí khuàⁿ, Siōng-tè siōng tshing-tshó lán só͘ su-iàu sī tó tsit tsióng ê si̍p-jī-kè. Lán buē liáu-kái pa̍t-lâng ê si̍p-jī-kè sī juā tāng. Lán khuàⁿ pa̍t-lâng sing-ua̍h ná tsin an-ia̍t tsū-tsāi, i ê si̍p-jī-kè ū hue tsng-thāⁿ, tsóng-sī lán nā uē it-it tsiong lán só͘ jīm-uî pí ka-kī khah khin ê si̍p-jī-kè lâi tshì-giām, tsiū beh huat-hiān bô tsi̍t ki pí lán pún-lâi ê, khah sik-tòng. --- tuì “Sing-ua̍h ê thang-á”

Nā-sī lí kín-kín hòng-khì lí ê si̍p-jī-kè,
Tī sè-kan á-sī pa̍t só͘-tsāi lí lóng bô huat-tō͘ koh tshē.
Tī tsia, lí uī Siōng-tè ê iân-kò͘ siū-khó͘ tsí-ū tī hiān-sè,
Tī bī-lâi sè-kài, lán beh thiàⁿ I, sū-hōng I,o-ló Thiⁿ-pē.
Huaⁿ-hí ná lâi ná tsiap-kūn Tsó͘-ke.
Hit sî, lán bô koh siū-tiàu lâi siū-khó͘ uàn-tsheh.
Siū-khó͘ tsí-sī tsit-sî ê khang-khè.
Tsi̍t nn̄g tiám-tsing ê siū-khó͘ kiám buē tàng jím neh?
Nā-sī I kim-ji̍t tiàu lí thuat-lī lí ê si̍p-jī-kè,
“Tsiàu lí kî-tó hō͘ lí thuat-lī kan-khó͘ ê si̍p-jī-kè.”
Lí beh kám-kak uî-hām koh pháiⁿ-sè,
“Tsiah-nih kín tsiū beh tiàu guá tńg-khì thiⁿ-ke?
Guá ài koh tiap-á-kú, in-uī guá iáu buē o-ló Siōng-tè.”
Só͘-í lán teh tán ê, beh kín-kín lâi, kín-kín kè,
Pá-ak hiān-tsāi, tī lán sin-tsiūⁿ lâi îng-kng Thiⁿ-pē.

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org