《台語荒漠甘泉（全羅版）》

 | | | 轉寄

"Siu-tsián"

作者 陳清俊 翻譯 2010.09.19

listen

Káu ge̍h tsa̍p-káu (Káu ge̍h tsa̍p-káu ji̍t)

"Guá ê Pē sī tsoh-hn̂g ê lâng." (Iok-hān 15:1)

Tse sī tsi̍t ê an-uì ê siūⁿ-huat: Lán siū ê khó͘-lān bô-lūn sī tó tsi̍t khuán, lóng sī Siōng-tè tshe lâi ê thiⁿ-sài. Tuì piáu-bīn khuàⁿ, khó͘-lān sán-sing thàng-thiàⁿ, sīm-tsì phò-huāi, lāi-sim khuàⁿ, khiok sī lîng-sìng ê kang-tsok tuà lâi tsiok-hok. Lán só͘ tit ê hok-khì, tsin tsuē lóng sī tuì iu-siong, thàng-thiàⁿ ê kiat-kó. Lán íng-uán m̄-thang buē-kì-tit, sè-kan siōng tuā ê tsiok-hok tsiū-sī lâng tit-tio̍h kiù-sio̍k, tse sī tuì sè-tsiūⁿ siōng-tuā ê iu-siong só͘ kiat ê ké-tsí. Ké-tsí-tshiū su-iàu siu-tsián, ka-to tsián tsin tshim tsin lī-hāi, siū tshòng-siong tsin tāng, nā tsai "Guá ê Pē sī tsoh-hn̂g ê lâng" sī juā-tsiâⁿ ê an-uì ah!

Tsa̍p-káu sè-kí bé, jī-tsa̍p sè-kí tsho͘ Bí-kok Uī-lí Kong-huē tsú-kàu Bûn-sing Iok-hān (John Vincent) tuà-niá Tsú-ji̍t-o̍h ūn-tōng. Ū tsi̍t-pái kóng tio̍h i khì tsi̍t ê tuā un-sik, lāi-bīn nn̄g-pîng siⁿ tshut tsin tuā-pha koh suí koh tsuē ê phû-tô. Un-sik ê tsú-lâng tuì i kóng, "Kì-tit hit nî sin ê tsoh-hn̂g lâng lâi ê sî, kóng, i nā bô tsiong phû-tô tîn tuā-tuā siu-tsián, i tsiū bô beh tshap-tshiú tī tsiah ê phû-tô ê tsai-puê. Guá sūn i ê ì hō͘ i hòng-sim khì tsuè, kiat-kó sui-jiân ū nn̄g-nî lóng bô siu-sîng, tsóng-sī hiān-tsāi lí khuàⁿ-tio̍h hit ê sîng-kó lah."

Tsit ê siu-tsián ê kò͘-sū ìng-iōng tī ki-tok-tô͘ sing-ua̍h sī tsin ū ì-sù. Siu-tsián, ná tshin-tshiūⁿ huí-bia̍t phû-tô-tîn, hn̂g-ting (tsoh-hn̂g lâng) ná tshin-tshiūⁿ beh lóng-tsóng tû-khì, tsóng-sī i khuàⁿ kàu bī-lâi, tsai phû-tô-tîn uē koh huat, koh tsin bō͘-sīng, siu-sîng koh-khah hong-hù.

Tsin tsuē ê hok-hūn tit buē tio̍h, tû-hui guān-ì hù-tshut thòng-khó͘ ê tāi-kè, in-uī khó͘-lān sī î-it tit-tio̍h tsiok-hok ê tō-lō͘. --- J.R. Miller

Kap Khuài-lo̍k tsuè-hé kiâⁿ,
I tsi̍t-lō͘ kóng-uē lóng buē tiāⁿ,
Kóng kah hiah tsuē kiāⁿ,
Bô tsing-ka tì-huī, tsin-tsiàⁿ.

Kap iu-siong tâng tsuè-hé,
Tsi̍t-lō͘ lóng bô kóng-uē,
Tuì i ê piáu-hiān lâi thé-huē,
Hō͘ guá o̍h tsin-tsuē.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org