《台語荒漠甘泉（全羅版）》

 | | | 轉寄

"Ki-tok-tô͘ kè-ta̍t-kuan"

作者 陳清俊 翻譯 2010.11.07

listen


Tsa̍p-it ge̍h tshue-tshit (Tsa̍p-it ge̍h tshit ji̍t)

"Nā-sī pîng-sò͘ tsuè guá ê lī-ik ê, guá uī-tio̍h Ki-tok í-king khuàⁿ i tsuè sún-hāi." (Hui-li̍p-pí 3:7)

So͘-keh-lân bông-jîn bo̍k-su, George Matheson sí, hā-tsòng ê sî, ū tsin tsuē âng ê muî-kuì hue hiat tī kuan-bo̍k tíng, piáu-sī tsin-tsuē lâng kì-liām i it-sing ê thiàⁿ lâng kap hi-sing ê tsing-sîn. I tī 1882 nî siá ē-bīn tsit siú si. Thiaⁿ-kóng tsí īng gō͘ hun-tsing lâi siá, sī tī i it-sing lāi-sim ki̍k thòng-khó͘ ê sî siá tshut, āu-lâi liû-thuân kàu sè-kài ta̍k kak-lo̍h.

Bô khì-sat guá ê Thiàⁿ,
Hō͘ guá an-hioh tī Lí hia,
Guá beh hiàn huê guá sìⁿ-miā,
Tsiah Lí bû-kiông hong-hù hái-iûⁿ lâu buē tiāⁿ.

Iân-lō͘ tsiò guá ê Kng,
Guá àm-àm ê hé-pé bô kú-tn̂g,
Khò Lí hue-hok guá sim-tn̂g,
Lí ê îng-iāu íng-uán buē tn̄g.

Tuì thòng-khó͘ tshē guá ê Huaⁿ-hí,
Guá sim kui-ǹg Lí,
Tī hō͘ tiong khuàⁿ tio̍h tshái-khīng,
Tshim-sìn Tsú ê ìng-ún, ba̍k-sái siū tshit tshing.

Guá só͘ gióng-bōng ê Si̍p-jī-kè,
Guá m̄-káⁿ tuì Lí ún-muâ kè,
Kam-guān tâi sè-kan îng-huâ tī thô͘-té,
Siⁿ-tshut íng-bô-thîng âng-hue ê bí-lē.

Ū tsi̍t ê uē-tô͘-ka i huat-kiàn kî-biāu âng-sik ê pì-bi̍t, sī pa̍t-ê uē-tô͘-ka só͘ bô thang bô͘-hóng ê. I tsiông-lâi m̄-bat lāu-siap tsit ê pì-bi̍t, ti̍t-kàu i kè-sin ê sî, lâng tsiah huat-hiān i ê sim-tsōng ū kū ê siong-hûn. Tsit ê siong-jiah tsiah kái-khui i tī uē-tô͘ só͘ buē-thang pí ê âng-sik sik-tshái ê lâi-guân.

Tsit ê thuân-suat kà-sī lán, tû-hui hù-tshut tsuân sim-sîn ê tāi-kè, tsiū bô khó-lîng ū uí-tāi ê sîng-tsiū, buē uân-sîng uán-tāi ê bo̍k-piau á-sī tuì sè-kài ū tuā ê kòng-hiàn.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org