《台語荒漠甘泉（全羅版）》

 | | | 轉寄

"Îng-îng tsē"

作者 陳清俊 翻譯 2010.12.26

listen


Tsa̍p-jī ge̍h jī-la̍k (Tsa̍p-jī ge̍h jī-tsa̍p-la̍k ji̍t)


"Lín tsiah-ê tsē tsia, thìng-hāu guá khì hia kî-tó." (Má-thài 26:36)

Tī uî-ki̍p ê sî, pàng lâng îng-îng bô tāi-tsì sī tsin khùn-lân ê sū. Tī Khik-se-má-nî hn̂g ê kî-tó, Iâ-so͘ pún-sin khì thâu tsîng kî-tó, Pí-tik, Ngá-kok kap Iok-hān tè I teh kíng-síng, I tsiong pueh ê ha̍k-sing pàng tī piⁿ-á, îng-îng bô tāi-tsì. Guá siūⁿ tsiah ê ha̍k-sing it-tīng teh bâi-uàn. In iā sī tī hn̂g-nih, tsóng-sī bô hūn tī tsham-ka hn̂g-lāi hue-phûn ê tsai-puê, puê-ióng ê kang-tsok. Tse sī uî-ki ê sî, sī ki̍k kín-tiuⁿ ê sî, kìng-jiân bô hō͘ in tsham-ú.

Lí guá it-tīng iā ū tsit luī ê king-giām, kám-kak tsin sit-bāng. Khuàⁿ tio̍h tsi̍t ê ho̍k-sāi Ki-tok ê hó ki-huē, ū lâng má-siōng siū-phài khì kang-tsok, iā ū lâng siū hùn-liān tsún-pī siū tshe-khián, tsóng-sī pún-sin sī pī-pik îng-îng teh tán, bô tsuè sím-mi̍h. Khó-lîng sī tng-teh phuà-pīⁿ, khó-lîng sī sàn-tshiah bô la̍t thang tsuè, iā khó-lîng sī siū khó-phàⁿ ê bú-jio̍k. Put-kuán án-tsuáⁿ, lí bô hūn tī tse kang-tiâⁿ, lí buē bîng-pi̍k uī-sím-mi̍h siū pâi-thik tī tsit pō͘-hūn ê ki-tok-tô͘ sing-ua̍h ê guā-bīn. Kì-jiân lí sī tsìn-ji̍p tī hn̂g lāi, uī-hô bô kang thang tsuè, sī tsin bô kong-pîⁿ.

Tshin-ài ê pîng-iú, sim an tsi̍t ē, tāi-tsì m̄-sī lí só͘ khuàⁿ ê hit-khuán! Lí pīng bô siū pâi-thik tī jīm-hô ki-tok-tô͘ sing-ua̍h. Lí siūⁿ Siōng-tè ê hn̂g nih tsí-ū kiâⁿ kap khiā ê lâng mah? M̄-sī, hn̂g lāi iáu ū só͘-tsāi hō͘ lâng thang tsē. Tshin-tshiūⁿ Ing-bûn tiong ê tōng-sû, ū saⁿ tsióng, --- tsú-tōng, pī-tōng, koh ū put-tōng, tsiū-sī tiong-sìng ê. Tsú-tōng ê lâng sī tī tsiàn-tiûⁿ tsiàn-tàu kàu ji̍t-lo̍h, pī-tōng ê lâng teh kuan-khuàⁿ, teh pò-kò tsiàn-tàu ê tsìn-tián ê, put-tōng ê lâng sī tsē teh, hioh-khùn, iā teh thìng-hāu, bô tsuè sím-mi̍h.

Tsit ê tsîng-hîng, lí m̄-thang siūⁿ kóng lí hōng sak tī tsi̍t kak. Kî-si̍t, sī Ki-tok tshin-sin tuì lí kóng, "tsē tī tsia." Lí tī hn̂g-lāi ê uī sī Siōng-tè ti̍k-pia̍t lâu ê, m̄-nā-sī teh tng-tán beh án-tsuáⁿ sú-iōng ê só͘-tsāi. Siōng-tè tuà sè-kan lâng, tsuē-tsuē lâng bô tsuè uí-tāi ê kang-tiâⁿ, bô hū tsin tuā ê tsik-jīm. In ê kang-tsok tsiū-sī "tsûn-tsāi", sī put-tōng, sī tiong-sìng ê. In bô tit-tio̍h tuā sìng-lī, iā bô tshin-tshiūⁿ Pí-tik, Ngá-kok, kap Iok-hān siū tsù-ba̍k, tsí sī tsīng-tsīng tsē tī iân-sia̍h tiong.

Tsóng-sī Iâ-so͘ sī ū tsù-ì tio̍h in. Tuì in só͘ huat-tshut ê phang-bī, in ê bí-lē, I tsiū tsin huaⁿ-hí khuài-lo̍k. In sing-ua̍h tshin-tshiūⁿ kok tiong ê sió-hue, tī tsûn-tsāi, khó-ài ê kian-tshî, tsiū muá Tsú ê sim-ì, hô-pit ke-thiⁿ bâi-uàn, huah put-pîng.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org