《台語荒漠甘泉（全羅版）》

 | | | 轉寄

"Kiâⁿ thiⁿ-lō͘"

作者 陳清俊 翻譯 2011.05.08

listen


Gō͘ ge̍h tshue-pueh (Gō͘ ge̍h pueh ji̍t)

“Khuàⁿ ah, guá khuàⁿ-kìⁿ ū sì ê lâng, pīng bô siū-pa̍k, kiâⁿ tī hé-tiong, iā bô siū-siong;” (Tān-í-lí 3:25)

Sa-tik-la̍h, Bí-suah, A-pik-nî-ko siū hiat lo̍h tī hé-iô nih, lia̍t-lia̍t ê hé buē tsó͘-tsí in ê hîng-tōng, in-uī khuàⁿ-tio̍h in tī hé-tiong teh kiâⁿ-iû. Si̍t-tsāi kóng, hé sī in kiâⁿ ǹg bo̍k-tik-tē ê tsi̍t tiâu tō-lō͘. Tuì Ki-tok ê tsin-lí, lán tit-tio̍h an-uì, m̄-sī in-uī tse tsin-lí kà lán buē pi-siong ê tsū-iû, sī kà lán tuì pi-siong lâi tit tsū-iû.

Tshin-ài ê Tsú, tng o͘-àm jia-tà guá ê sî, hō͘ guá tsai, guá tsí-ū sī tsìn-ji̍p tsi̍t ê pōng-khang nā-tiāⁿ, tsin-kín tsiū uē thong-kè pōng-khang, huê-hok kàu kng-bîng.

Guá tsai, ū tsi̍t ji̍t, guá uē khiā tī Ká-ná suaⁿ tíng, thé-huē koh-ua̍h ê îng-iāu. Sī, Thiⁿ-pē ah, guá beh thé-giām koh-khah tsuē, beh king-kè Lí ê siū-tìng tī Kok-kok-tha ê suaⁿ tíng. Guá tsai o͘-o͘ àm-àm ê ìm-iáⁿ sī ǹg thian-tông ê tō-lō͘ ê tsi̍t-ê ìm-iáⁿ nā-tiāⁿ. Kà-sī guá, tsai guá peh suaⁿ ê bo̍k-tik sī in-uī Lí ê tshù sī tī hia. Án-ni, nā-sī kiâⁿ kè hé tiong, guá buē hō͘ iu-siong lâi siū siong. --- George Matheson

Lō͘ tsiah pháiⁿ kiâⁿ.
It-ti̍t teh peh kiā,
Bô hue, tsí-ū tshì-á, hong-iá,
Lóng sī o͘-im thiⁿ nā-tiāⁿ.
Tsóng-sī, guî-hiám ê sî, I khan guá kiâⁿ,
Kap I tâng-kiâⁿ, guá tsū-tsāi bô kiaⁿ.

Si̍p-jī-kè tsit khuán kang,
Ka-tsiah tòng buē-tiâu ê tāng,
Tuā koh tsho͘-tāng, mo͘h buē tín-tāng,
Iā bô kuan-sim ê lâng.
Tng I un-jiû mo͘ guá ê tshiú, guá tit ǹg-bāng,
I tsai, I liáu-kái, I kuan-sim guá ê khó͘-thàng.

Uī-hô iáu teh thî-khàu, kiaⁿ-hiâⁿ,
Si̍p-jī-kè, phāiⁿ khí-lâi kiâⁿ,
Tsi̍t-pō͘, tsi̍t-pō͘ ǹg thiⁿ siâⁿ,
Sī lán só͘ ài, só͘ tsai-iáⁿ.
Muí tsi̍t-pō͘ tit sin sìⁿ-miā,
Sī ū Tsú puê lán kiâⁿ.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org