《台語荒漠甘泉（全羅版）》

 | | | 轉寄

"Hûn ê Kong-tshái"

作者 陳清俊 翻譯 2011.05.15

listen


Gō͘ ge̍h tsa̍p-gō͘ (Gō͘ ge̍h tsa̍p-gō͘ ji̍t)

“Taⁿ (ū hûn jia-tsa̍h), lâng bô khuàⁿ-kìⁿ kiong-tshong-lāi tshàn-lān ê kng; To̍k-to̍k hong tuì teh kè, tsiū hō͘ i tshing-tshái.” (Iok-pik-kì 37:21)

Sè-kài kíng-kuan ê suí ū tsi̍t tuā pō͘-hūn sī in-uī ū hûn. Thài-iông tshàn-lān, bí-lē ê nâ-thiⁿ, pīng buē thang kap piàn-huà bû-kiông, tsòng-lē ê hûn-tshái pí-phīng. Koh, nā m̄-sī ū hûn ê jia-pè, tē-kiû tsá-tsá tsiū tsiâⁿ-tsuè hong-huì loh.

Jîn-sing iā sī ài ū hûn lâi jia-pè, hō͘ lán tsing-sîn tsing-ing. Iā ài ū àm-mî ê o͘-àm tà lán. Put-kò ài tsai, bô ū hûn bô tài kong-tshái. Siōng-tè kóng, “Guá tsiong khīng khǹg tī hûn tiong.” (Tshòng-sè-kì 9:13). Lán nā tī hûn ê tíng-bīn khuàⁿ, sī khuàⁿ tio̍h hûn tī kong-hui ê ji̍t-kng tiong teh tín-tāng, ū pho-lōng ê suí. Gio̍k-san, A-lí-san ê khì-siōng piàn-huà bû-hān, tsòng-kuan ê kíng-tì tsiū-sī ū hûn ê tsham-ú.

Tsóng-sī, lán nā tuì ē-bīn khuàⁿ hûn, thài uē tsai, tī suaⁿ tíng hit-tsióng kíng-sik ê uí-tāi, kng-liōng neh? Hûn kâⁿ tio̍h muí tsi̍t tih ê hō͘-tsuí, iā kâⁿ ū kiān-khong ê iàu-sò͘, āu-lâi kiám m̄-sī lóng lo̍h ǹg tē mah?

Tshin-ài ê Siōng-tè ê kiáⁿ-jî! Ài tuì tíng-bīn lâi khuàⁿ lí ê pi-siong, huân-ló, m̄-sī tuì ē-bīn khuàⁿ. Sī tuì “Kap Ki-tok Iâ-so͘ tâng tsē tī thiⁿ nih” (Í-hut-só͘ 2:6) lâi khuàⁿ, lí tsiū kìⁿ-tio̍h tshái-sik suí-suí ê khīng tī thiⁿ tíng só͘ hián tshut ê bí-lē lah. Lí iā uē khuàⁿ-tio̍h Ki-tok iông-māu ê kong-hui. Tng lí tú-tio̍h hiah ê hûn ǹg lí ê jîn-sing tiong só͘ tâu lâi ê im-iáⁿ, tsiū uē sim-an lí-tik lah.

Uē kì-tit, hûn, lóng-sī tī Siōng-tè īng lâi tshing-kia̍t bān-mi̍h ê hong, ê tsîng-bīn î-tōng.

Guá m̄-tsai, uī-hô hut-jiân ū po̍k hong-hō͘,
Kiông-lia̍t sàu tī guá teh kiâⁿ ê lō͘,
Tsóng-sī guá tsai, Siōng-tè khuàⁿ guá ê kha-pō͘,
Guá thang sìn-khò I ê tsiáu-kò͘.

Guá buē thang suá-khui thâu-tsîng ê pò͘,
Hāi guá khuàⁿ buē-tio̍h tsîng-bīn ê lō͘,
Iā m̄-tsai beh tú-tio̍h ê, sī kng-bîng á-sī o͘-o͘,
Tān-sī guá sìn-khò I ē khuàⁿ-kò͘.

Guá bô la̍t thang khuàⁿ khah hn̄g,
Khuàⁿ kàu hô ê hit pîng ê tē-hng,
Tsóng-sī guá tsai, guá sio̍k I kú-kú tn̂g-tn̂g,
Só͘-í guá thang sìn-khò, tsìn-ji̍p lo̍k-hn̂g.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org