《台語荒漠甘泉（全羅版）》

 | | | 轉寄

"Sìn-m̄-sìn"

作者 陳清俊 翻譯 2011.06.26

listen


La̍k ge̍h jī-la̍k (La̍k ge̍h jī-tsa̍p-la̍k ji̍t)

“Siat-sú ū-ê bô sìn, tsiū tsáiⁿ-iūⁿ? In ê bô sìn beh huè-bô Siōng-tè ê sìn-si̍t mah?” (Lô-má 3:3)

Guá siūⁿ guá it-sing ê muí tsi̍t ê pi-siong lóng thang kóng sī in-uī m̄-sìn só͘ tì ê. Nā-sī guá siong-sìn, kè-khì ê it-tshè siū sià-bián, hiān-kin guá muá-muá ū li̍k-liōng, tsiong-lâi muá ū hi-bāng, án-ni, guá kiám m̄-sī sî-sî hīng-hok khuài-lo̍k mah?

Sī, bī-lâi sī tshàn-lān ê, Siōng-tè sī sìn-si̍t ê. I ê tsin-lí íng bô kái-piàn, buē in-uī guá ê piàn-huà lâi kái-piàn. Guá m̄-sìn I ê ìng-ún lâi pua̍h-tó ê sî, I iā bô iô-tāng. I ê sìn-si̍t ná kuân-kuân ê suaⁿ khiā tiâu-tiâu, tsǹg kàu thiⁿ tíng hiah kuân-tuā, i ê tē-ki lóng tìng tī Siōng-tè ê tsio̍h-puâⁿ tíng, tshim, buē uē tshik-to̍k ê.

Gio̍k-san, pīng buē in-uī peh suaⁿ ê lâng ba̍k-tsiu hue, á-sī hûn-bū tsiū bô khì. --- James Smetham Lán nā in-uī bô sìn Siōng-tè ê ìng-ún suah sit-khì I ê tsiok-hok, kiám ū sím-mi̍h kî-kuài? Pīng m̄-sī kóng, nā ū sìn tsiū it-tīng tit-tio̍h Siōng-tè ê huê-tap, iā m̄-sī kóng, lán ê ló-li̍k tsiū it-tīng uē tit-tio̍h. Siong-sìn tsí sī pit-iàu ê tiâu-kiāⁿ, Siōng-tè ia̍h ū kuân thang kuat-tīng siúⁿ-sù ê kî-tha tiâu-kiāⁿ. --- Samuel Hart

Bô sìn ê lâng it-ti̍t mn̄g, “Tse án-tsuáⁿ khó-lîng?” Bô sìn ê lâng sim lāi lóng sī “án-tsuáⁿ?” Sìn-sim tsí ū tsi̍t ê huê-tap, sui-jiân ū tshing-tshing bān-bān ê “án-tsuáⁿ?” Tsi̍t ê huê-tap tsiū sī Siōng-tè pún-sin. --- C.H.M.

Lâng nā beh īng Siōng té ê kî-tó, lâi sîng-tsiū tsin tuā ê tāi-tsì, tsiū tio̍h ha̍h tī Tsú Iâ-so͘ só͘ kà-sī lán ê kî-tó. Tsí-iàu ū tsi̍t ê uân-tsuân sìn-sim ê lâng khiā khí-lâi, tsiū uē tsiong sè-kài ê li̍k-sú kái-piàn.

Lí sī-m̄-sī tsit ê lâng mah? Sūn-thàn Pē Siōng-tè ê tsí-ì kap I ê tsí-sī. --- A.E. McAdam

Bô sìn-sim ê kî-tó uē tsin-kín piàn-tsuè bô bo̍k-tik ê “pat-kó͘ bûn”, bô tsin-sim ê hi-ké. Ū sìn-sim ê kî-tó uē tit-tio̍h Siōng-tè ê tsi-tshî lán ê só͘ kiû. Tī it-sing tiong, ài sing liáu-kái kî-tó ê li̍k-liōng, tsiah tsin-si̍t lâi kî-tó. Tsin-si̍t ê kî-tó, ū-sî sī “tiām-tiām ê kuí-kù uē”, koh “thiⁿ-kap-tē”, koh “kè-khì kap tsiong-lâi” kóng “Amen!” tsiū kàu-gia̍h.

Tse sī Tsú Ki-tok kà lán kî-tó ê hong-sik. --- P.C.M.

Bô ū tāi-tsì īng kî-tó ta̍t buē tio̍h ê, tû-liáu bô ha̍h tī Siōng-tè ê tsí-ì.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org