《台語荒漠甘泉（全羅版）》

 | | | 轉寄

"Kut-la̍t, Tsia̍h la̍t"

作者 陳清俊 翻譯 2011.07.03

listen


Tshit ge̍h tshue saⁿ (Tshit ge̍h saⁿ ji̍t)

"Hit ê luê-hn̂g beh iā-tsíng-ê, kiám-sī siông-siông teh luê mah?" (Í-sài-a 28:24)

Tī jua̍h-thiⁿ tú-tú khai-sí ê tsi̍t ji̍t, guá kiâⁿ kàu tsi̍t ê só͘-tsāi, ū tsi̍t-phiàn pîⁿ-pîⁿ ba̍t-ba̍t, tshiⁿ-tshiⁿ-tshiⁿ ê tsháu-po͘, tshin-tshiūⁿ tsi̍t-tè li̍k-sik ê tuā tē-thán pho͘ teh, Tsin-suí tsin hó-khuàⁿ. Kak-á, ū tsi̍t-tsâng tuā-tuā tsâng ê tshiū, tíng-bīn ū sǹg-buē-uân ê tsiáu-á, tshiùⁿ tshut bí-lē hó-thiaⁿ ê im-ga̍k, koh ū nn̄g saⁿ tsiah ê gû tó tī tsháu-po͘ teh hioh-khùn. Iā ū n̂g-hue, tsí-hue tsin-tsuē tsng-sik tī tsháu -nih ê tuā tē-thán. Tsit ê kíng-tì, si̍t-tsāi suí bô pí. Guá kú-kú khiā teh hia, lâi him-sióng tsit ê Siōng-tè só͘ tsō tshut-lâi tsiah-ni̍h bí-lē ê kíng-sik.

Tē jī ji̍t, guá koh kiâⁿ kàu hia, guá tsin sit-bāng, hit ê bí-lē ê kíng-sik í-king bô khì ah. Hit phìⁿ li̍k-sik ê tuā tsháu-po͘, piàn tsuè kuân-kuân kē-kē ê thô͘ lîng. Tsi̍t ê tsò-sit-lâng īng thih-gû tsi̍t-ji̍t ê kang-hu tsiū tsiong tsit ê tsháu-po͘ tsau-thak liáu-liáu, phò-huāi kàu buē khuàⁿ tit. Thih-gû iáu thîng tī kak-á thâu. Tshiⁿ-tshiⁿ ê tsháu-po͘ pìⁿ tsuè n̂g-n̂g ê thô͘ lîng, n̂g-hue, tsí-huē lóng bô-khì lah, liân tsiáu-á iā tshun bô kuí tsiah tī thô͘-kha teh tshē thâng lâi tsia̍h. Guá siong-sim kóng, "Lâng thài uē tsiah-ni̍h tsân-jím lâi phò-huāi tsit ê bí-lē ê kíng-tì ah?"

Āu-lâi guá ê ba̍k-tsiu hō͘ tsi̍t-siang bû-hîng ê tshiú lâi puah-khui, ná tshin-tshiūⁿ khuàⁿ tio̍h tsi̍t-phìⁿ ê tiū-tshân, kiat tsin-tsuē ê tshik-á muá-muá tī tiū-suī tíng. Hong bî-bî-á tshe, tiū-hn̂g ná pho-lōng teh iô, tsi̍t-pho tsi̍t-pho ê tōng-tsok si̍t-tsāi suí, pí khí tsháu-po͘, sī koh khah suí, ū tōng-tsok tshin-tshiūⁿ tiān-iáⁿ teh ián suí ê kíng-tì. Koh ū siu-kuah siu-sîng ê huaⁿ-hí.

Ah, Lán ê uí-tāi ê tsò-sit-lâng, lán ê Tsú, tsiong lán suí-suí ê sim-tiân phò-huāi, piàn-tsuè pháiⁿ-khuàⁿ n̂g-n̂g ê sim-thô͘, siū thòng-khó͘. Bô-kú tsiū ū koh khah suí ê kíng-sik tshut-hiān, koh ū siu-sîng ê huaⁿ-hí, khuài-lo̍k.

Tsú lê-tshân, tī guá ê sim-lîng lê tsi̍t-tiâu tsi̍t-tiâu tshim-tshim ê hûn, guá uī-sím-mi̍h beh kiaⁿ-hiâⁿ? Guá tsai, I m̄-sī bô-lí-kái ê tsò-sit-lâng. I ê bo̍k-tik sī beh un-un khûn-khûn ê iā-tsíng koh beh hong-hong hù-hù ê siu-sîng. --- Samuel Rutherford


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org