《台語荒漠甘泉（全羅版）》

 | | | 轉寄

"Lâng teh tsuè, Thiⁿ teh tshiâu"

作者 陳清俊 翻譯 2011.07.17

listen


Tshit ge̍h tsa̍p-tshit (Tshit ge̍h tsa̍p-tshit ji̍t)

"Guá tī Guá khiā-khí ê só͘-tsāi beh tsīng-tsīng tsē teh khuàⁿ." (Í-sài-a 18:4)

Tse sī A-su̍t (Assyria) teh kong Kó͘-si̍t (Ethiopia) ê biô-siá. Tsit ê kiông koh tuā ê kun-tuī tsìn-kun khì, Siōng-tè bô tsó͘-tsí in, ná tshin-tshiūⁿ Siōng-tè ín-tsún in luān-lâi, Tsú tī I ê só͘-tsāi teh kuan-khuàⁿ. Kè-sio̍k ū thài-iông tsiò in, tān-sī tī “Siu-kuah ê tsìn-tsîng” tsit ê kiau-ngō͘ ê kun-tuī tsuân-jiân phah-pāi, tshin-tshiūⁿ lâng īng liâm-á siah khì phû-tô ki hiah-ni̍h iông-ì ê khuán.

Tse kiám m̄-sī tsi̍t pak tsin-suí Siōng-tē ê tô͘-uē mah? I tsīng-tsīng teh kuan-khuàⁿ. I ê tsīng-tsīng m̄-thang gō͘-huē tsuè I sī tông-ì á-sī ín-tsún. I put-kò sī teh tán I ê sî kàu, iā tsiū-sī hit ê pháiⁿ-ê ê kè-uē teh-beh sîng-kong ê sî, tsiah tshut-tshiú, hō͘ ti̍k-jîn siū tio̍h tsai-lān-sìng ê tuā-pāi. Siông-siông lán khuàⁿ tsit sè-kan, siâ-ok, pháiⁿ-lâng tik-ì, hó-lâng siū tsin-tsuē ê pik-hāi ê sî, ài kì-tit Siōng-tè só͘ kóng tsit kù kî-biāu ê uē “Guá tsīng-tsīng teh kuan-khuàⁿ.”

Siōng-tè ū bô-siāng-khuán ê khuàⁿ-huat, I ê uē tshiong-muá tì-huī. Uī-sím-mih Iâ-so͘ tsīng-tsīng teh khuàⁿ I ê ha̍k-sīng tī hong-ú-iā piàⁿ-miā teh kò-tsûn neh? Iâ-so͘ ê hó pîng-iú, Pik-tāi-nî ê Lia̍p-sat-lō͘ phuà-pīⁿ, sìⁿ-miā guî-ki̍p beh sí-khì, tsuè-āu, sí-khì iā bâi-tsòng tī bōng-nih. Tsi̍t-bō͘, tsi̍t-bō͘ thòng-khó͘ ê li̍k-tîng, Iâ-so͘ it-ti̍t teh tsīng-tsīng khuàⁿ. I uī-sím-mih beh án-ni tsuè neh? Iâ-so͘ tsí sī thìng-hāu hit ê siōng sik-tòng ê sî, tsuè tshut siōng iú-hāu ê tsok-uî.

Tsú sī-m̄-sī tuì lí tiām-tiām? Kî-si̍t I tsù-ì tio̍h muí tsi̍t hāng. I ê tshiú suî-sî teh pé lí ê hiat-me̍h, koh tsin bín-kám, liân sió-sió ê piàn-huà I iā tshâ uē tshut-lâi. Tī siōng sik-tòng ê sî-khik I tsín-kiù lí.

Put-lūn Tsú ài lán tsuè sím-mih, á-sī I tsuè tāi-tsì ná tshin-tshiūⁿ tsin bān, lán thang uân-tsuân ê khak-sìn, I sī tsi̍t ê bô tshiong-kông, bô lún-neh ê Kiù-tsú.

Iu-siong thòng-khò͘ ê lîng,
Thiⁿ-pē kóng, tsīng-tsīng, tio̍h tsīng-tsīng,
Ha̍k-si̍p an-tsīng tī I bīn-tsîng,
Tsiàu I ê tsí-ì kā uân-sîng.

Kî-tó ê lîng, tsīng-tsīng, tio̍h tsīng-tsīng,
I ìng-ún ê uē sī khak-tīng,
I ê tsiok-hok tsin hong-sīng,
Nāi-sim thìng-hāu tit un-tsîng.

Thìng-hāu ê lîng, tsīng-tsīng, tio̍h kiông-tāi,
Sui ū iân-tshiân, tio̍h sìn-jīm tán-thāi,
Bián giâu-gî, I teh an-pâi,
Bián kiaⁿ-hiâⁿ, I m̄-bat siuⁿ uàⁿ lâi.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org