《台語荒漠甘泉（全羅版）》

 | | | 轉寄

"Thìng-hau"

作者 陳清俊 翻譯 2011.07.10

listen


Tshit ge̍h tshue tsa̍p (Tshit ge̍h tsa̍p ji̍t)

"Guá kiò i, i iā bô ìn." (Ngá-ko 5:6)

Siōng-tè sù lán ū tuā ê sìn-sim, tsóng-sī, I siông-siông īng tn̂g sî-kan ê iân-tî lâi tshì-giām lán. Hō͘ I ê lô͘-po̍k ê siaⁿ sàng huê-kàu in ê hīⁿ-khang, ná tshin-tshiūⁿ siaⁿ kàu khong-tiong koh siū tuâⁿ tò-tńg, lóng bô huê-tap. Iā sìn-tô͘ kàu tī thian-tông ê mn̂g, phah mn̂g bô huê-ìng, ná tshin-tshiūⁿ mn̂g-tshuàⁿ siⁿ sian khui buē khui tsi̍t-iūⁿ. Iâ-lī-bí bat án-ni ai-kiò kóng, "Guá ê kî-tó hō͘ ba̍t-ba̍t ê hûn tsia-tio̍h, lóng bô ta̍t kàu Lí hia." (Ai-ko 3:44)

Siōng-tè tsin-si̍t ê sìng-tô͘ uē tn̂g-tn̂g thìng-hāu bô tit-tio̍h huê-tap, m̄-sī in-uī in ê kî-tó bô pik-tshiat, iā m̄-sī in-uī Siōng-tè bô tap-ìng in ê kî-tó. In ê thìng-hāu sī tsāi Siōng-tè teh tsiáng-kuân, I tsiàu "I hó ê sim-ì" (Hui-li̍p-pí 2:13) lâi kiâⁿ tāi-tsì. Nā-sī lán ū jím-nāi thìng-hāu uē hō͘ I huaⁿ-hí. I kiám-buē tsiàu I tiāⁿ-tio̍h ê ì-sù lâi tsuè tāi-tsì mah?

Kî-tó bô tsi̍t kù uē bô khì, bô tsi̍t kù kî-tó sī pe̍h-pe̍h kóng ê. Siōng-tè pīng buē bô huê-tap á-sī bô tsù-ì tio̍h lán ê kî-tó. Tāi-tsì bô huat-sing, m̄-sī in-uī siū kū-tsua̍t, siū hó͘-kuat, tsí sī iân-tshiân nā-tiāⁿ. --- Horatius Bonar

Tsú Ki-tok ê iân-tshiân sī tshì-giām lán ê sìn-sim, sī ài ka-kiông lán ê kî-tó. Lán sái tsûn tī pho-lōng teh tuā iô ê sî, I kè-sio̍k teh khùn, tsóng-sī tng tsûn teh-beh tîm lo̍h-khì ê sî, I it-tīng uē tshíⁿ khí-lâi. I buē khùn kè-thâu, in-uī I tsuè sū m̄-bat siuⁿ-bān. --- Alexander Maclaren

Iu-siong ê lîng ah! Tsīng-tsīng, bo̍h koh âu-kiò,
Tián-khui lí lāi-sim teh-beh ko͘-ta ê hio̍h,
Hō͘ I khuàⁿ-tio̍h lâi kng-tsiò;
Tán-thāi, o͘-àm ê kiaⁿ, tsua̍t-bāng ê sim teh tiô,
I ê tsû-ài kap thiàⁿ-sioh hō͘ lí khàu pìⁿ tshiò,
Tshiong-muá kng-bîng, ua̍h-khì, khuài-lo̍k, an-hioh.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org