《台語荒漠甘泉（全羅版）》

 | | | 轉寄

"Iâ-so͘ iáu tshuā lō͘"

作者 陳清俊 翻譯 2011.07.31

listen


Tshit ge̍h sam-it (Tshit ge̍h saⁿ-tsa̍p-it ji̍t)

"I tsiū tsiàu i sim-lāi ê tsìng-ti̍t iúⁿ-tshī in; Koh īng i khiáu-biāu ê tshiú ín-tshuā in." (Si-phian 78:72)

Tng lí m̄-tsai beh suán tó tsi̍t tiâu lō͘ ê sî, tio̍h hō͘ Sìng-lîng ín-tshuā, kiû I kuaiⁿ só͘ ū ê lō͘ mn̂g, tsí lâu hit tiâu tsìng-khak ê lō͘ mn̂g khui. Kè-sio̍k kiâⁿ, sui-jiân bô Siōng-tè ti̍t-tsiap ê tsí-sī, in-uī I kiâⁿ tī lí ê thâu-tsîng, ū-sî uē kuaiⁿ lí só͘ beh ji̍p-khì ê mn̂g, tsóng-sī, bô guā-hn̄g, lí beh khuàⁿ-kìⁿ līng-guā tsi̍t ê mn̂g uī lí lâi khui, thang kiâⁿ ji̍p-khì. Lí beh khuàⁿ tio̍h ki-huē ê hô-liû, pí lí ê sióng-siōng khah khuah, lí thang khui pâng thang tī tsit ê hô sái-tsûn, in-uī tsit ê hô thàu kàu tuā hái.

Siōng-tè siông-siông īng khuân-kíng lâi tshuā lán jîn-sing ê lō͘-tô͘. Ū-sî, lán só͘ teh kiâⁿ ê lō͘ lóng-tsóng that sí-sí lah. Tsóng-sī tī ì-guā ê tsi̍t ê sió-sió ê tāi-tsì huat-sing, pa̍t lâng bô kám-kak tio̍h, tī ū sìn-sim ê lâng īng tsin lāi ê gán-kong uē khuàⁿ tshut i ê tiōng-iàu-sìng. Tsiah ê sū siông-siông īng bô siāng-khuán ê hong-sik lâi huê-ìng lán ê kî-tó. Tse m̄-sī tsháu-tú-khám, sī Siōng-tè tsioh khuân-kíng lâi tsí-sī lán. Īng khuân-kíng kā lán khui tshut tsi̍t tiâu lō͘, lán ná hó-táⁿ hiòng tsîng kiâⁿ, ná bîng-hián, uē ná tit koh-khah tsuē ê tsí-sī. Tshin-tshiūⁿ àm-sî khui tshia, ná uá-kūn to͘-tshī, khuàⁿ-kìⁿ ná khah tsuē ê ting-hé tsi̍t-iūⁿ. --- F.B. Meyer Ká-sú lí kiû Siōng-tè ín-tshuā, I uē ín-tshuā lí. Tān-sī lí nā m̄ siōng-sìn I, puàⁿ-sìn puàⁿ-gî ê sî, m̄-bián siáu-siōng I uē an-uì lí, uē kā lí ê bo̍k-piau tsí-sī lí. Nā-sī lí siong-sìn I, tī I ê tsí-sī, lí thang tuā-táⁿ hiòng tsîng, I uē tshuā lí kiâⁿ lo̍h-khì. --- Horace Bushnell

Sió-tsûn huâiⁿ-kè po̍k-hong tuā-íng ê hái,
Tuā-íng siàu lâi, kiông-hong tshè lâi,
O͘-àm tiong, ū àm-tsio̍h guî-hiám tē-kài,
Só͘-ū tsiah ê, Tuā tsûn-tiúⁿ lóng-tsóng tsai.

Ū-sî àm-bū lâi, só͘-ū ting-hé lóng hua khì,
M̄-tsai tse sió-tsûn beh tó-uī khì,
Tn̂g-tn̂g ê àm-mî, bô thang hioh ê sî,
Tuā tsûn-tiúⁿ bîng-pi̍k guá khak-sìn ê sim-ì.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org