《台語荒漠甘泉（全羅版）》

 | | | 轉寄

"Sìng-lîng tshiong-mua"

作者 陳清俊 翻譯 2011.08.07

listen


Pueh ge̍h tshue-tshit (Pueh ge̍h tshit ji̍t)

"Kî-tó suah, tsū-tsi̍p ê só͘-tsāi tuā tín-tāng; tsìng-lâng lóng siū Sìng-sîn tshiong-muá, hó táⁿ kóng Siōng-tè ê tō-lí. Sù-tô͘ īng tuā kuân-lîng kan-tsìng Tsú Iâ-so͘ ê koh-ua̍h; tsìng-lâng iā tit-tio̍h tuā un-tián." (Sù-tô͘ hîng-tuān 4:31,33)

Tī tsa̍p-pueh sè-kì bé, tsa̍p-káu sè-kì tsho͘, ū tsi̍t ê Uē-su (Welsh) ê bo̍k-su, miâ kiò-tsuè Í-būn-su (Tsristmas Evens), tī i ê ji̍t-kì ū án-ni siá:

“Tī bó͘ tsi̍t ê lé-pài ji̍t ē-po͘, guá khiâ bé khì hù iok, hut-jiân tī tsi̍t ê phian-phiah ê lō͘-tiong, guá ê sim-lîng tsin uì-kuâⁿ. Guá tsiū lo̍h bé, tsiong bé pa̍k teh tshiū-á piⁿ, tshē tsi̍t ê bô lâng kàu ê só͘-tsāi, tī hia huân-ló teh kiâⁿ-lâi kiâⁿ-khì. Kiám-thó ka-kī ê it-sing. Tī Siōng-tè ê bīn-tsîng, guá siong-sim, sit-sîn, iu-būn teh thìng-hāu, iok ū saⁿ tiám-tsing kú. Tsuè-āu guá kám-kak tio̍h ū I sià-bián ê thiàⁿ hō͘ guá sóng-khuài khí-lâi, guá iā tiông-sin tit-tio̍h Sìng-lîng ê kuàn-ak.

Ji̍t-thâu teh-beh lo̍h suaⁿ, guá kiâⁿ tò-tńg-khì hit tiâu lō͘, tshē tio̍h bé, khiâ bé khì hù iok. Tē jī ji̍t guá tī suaⁿ-phiâⁿ ǹg tsi̍t tuā tīn ê lâng káng-tō, tshiong-muá liáu sin ê li̍k-liōng, hùn-hing ê hé tsiū khai-sí thuàⁿ khui. Tsit ê íng-hióng ta̍t kàu tsuân Uē-su (Welsh).”

Tse kì-sū kái-sueh “tîng-thâu-siⁿ” ê tuā tāi-tsì, iā sī tsho͘-tāi sìn-tô͘ ê piau-kì. -- “Tng lín sìn ê sî, ū siū-tio̍h Sìng-lîng bô?” (Sù-tô͘ hîng-tuān 19:2)

Oh, Sìng-lîng tshiong-muá ê sing-ua̍h, lí ū bô?
Lí ê lîng ū tshiong-muá Sìng-lîng bô?
Tsuè tsi̍t ê Bān-ông ê kiáⁿ-jî, lí ū tit khuàⁿ-siú bô?
I ū tī lí ê lîng tsiáng-kuân bô?
Tī lí ê sin-tsiūⁿ ū hián tshut I ê hîng-siōng bô?

I ū, ná hái-íng, siông-siông tshing-khì lí ê lîng bô?
Siōng-tè ê lîng ū tī lí ê lāi-bīn bô?
I ū hō͘ lí sing-ua̍h ū ì-gī, bô-huân bô-ló bô?
I ū ín-tshuā lí, tsiok-hok lí, thiaⁿ lí ê kî-tó bô?
Lí ū sî-sî tuà Tsú ê hí-lo̍k, kàu ta̍k só͘-tsāi bô?

I ū sî-sî khik-khik tī lí ê sin piⁿ bô?
I ū hō͘ lí lîng-li̍k, kap lí saⁿ-kap tī-teh bô?
Lí ū tsuân-sim khò Si̍p-jī-kè ê un-tián kap li̍k-liōng bô?
I ū kà-sī lí, hō͘ lí sū-sū tit sîng-kong bô?
I ū kan-tsìng îng-iāu ê Sìng-kiáⁿ hō͘ lí bô?

I bat īng thiⁿ-nih ê hé tshing-khì lí bô?
Lí ū tsiong I tsuè tāi-sing, tsuân-sim thiàⁿ I bô?
Lí ū kam-guān sū-hōng I, uī I lâi hi-sing bô?
Lí ê lim-tsia̍h ū ha̍p tī I ê tsí-ì bô?
Lí ū tsīn-la̍t phah-piàⁿ tsun-siú I ê ho͘-tiàu bô?

Lí ê tsū-su, tham-sim, I ū kā lí tháu-pàng tshut lâi bô?
Lí ū tshiat-tshiat khì an-uì hiah ê su-iàu pang-tsān ê hiaⁿ-tī bô?
Tsuè Ki-tok ê tsing-ping, lí ū kú-tn̂g kàu-gia̍h ê lîng-li̍k bô?
Tī Tsú ê ǹg-bāng, Lí ū khak-sìn, íng buē piàn bô?
Lí ū nāi-sim, khiam-pi, un-jiû kap sìng-kiat bô?

Khó-lîng oh! Lí í-king ū tshiong-muá Sìng-lîng ê sing-ua̍h,
Siōng-tè ê îng-kng tī lí ê lîng lāi-bīn íng-tuà,
Lí sìⁿ-miā ê hong-hō͘ lóng beh suah,
Lí it-sing ū Siōng-tè ê lîng tshiong-muá,
Tī lí ê lāi-bīn, Tsú ê tsí-ì íng-uán-ua̍h.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org