《台語荒漠甘泉（全羅版）》

 | | | 轉寄

"Hi-bōng"

作者 陳清俊 翻譯 2011.09.25

listen

Káu ge̍h jī-gō͘ (Káu ge̍h jī-tsa̍p-gō͘ ji̍t)

“Guá beh tuì Siōng-tè, guá ê tsio̍h-puâⁿ, kóng, Lí siáⁿ-sū buē-kì-tit guá? Guá siáⁿ-sū in-uī tuì-ti̍k ê ap-pik, iu-būn lâi kiaⁿ ah?” (Si-phian 42:9)

Tshin-ài ê sìn-tô͘, “Siáⁿ-sū iu-būn lâi kiaⁿ ah?” Lí kiám tsai lí uī-sím-mi̍h siông-siông iu-būn, ai-siong, bô khuài-lo̍k ê guân-in mah? Lí uī-sím-mi̍h sim lāi siông-siông huân-ló neh? Sáⁿ-mi̍h lâng kóng o͘-àm sī kè buē uân ê? Sím-mih lâng kóng tang-thiⁿ sī liân-liân suà-suà put-tsīn ê ping-seh, sīm-tsì sī ná lâi ná tuā, ná kiông-lia̍t ah?

Lí kiám m̄-tsai o͘-àm mî kè liáu tsiū-sī lê-bîng, khòng-hān liáu tsiū ū hō͘-tsuí, tang-thiⁿ kè liáu sī tshun-thiⁿ mah? Só͘-í, ài ū hi-bōng! Íng-uán ê hi-bōng, Siōng-tè íng-íng buē hō͘ lí sit-bōng. --- Tsarles H. Spurgeon

Pí guá só͘ hi-bōng khah hó ê jîn-sing,
Pí guá só͘ kìng-uì khah hó ê lîng;
Phuà-tshuì ê kang I siu-tsíng,
Ba̍k-sái piàn tshái-khīng.
Hái-iûⁿ tiong, tshiong-muá kiông-hong tuā íng,
Guá ê Tsú an-jiân pîng-tsīng;
Tī hong-iá kan-khó͘ lō͘ tsìn-tsîng,
Tiàm-tī I ê thiàⁿ, guá thang tit an-lîng.

Tû-khì sè-tsiūⁿ ê pó-khì,
Hián-tshut sē-iok thiàⁿ-thang kong-gī;
Thàng-thiàⁿ ê sim siū siong beh sí,
I ê phang-ko bô m̄ i-tī.
Kuán-kàu īng un-jû tsin-lí,
Īng tì-huī, khó-giām kap kà-sī,
Ti̍t kàu hiah ê sio̍k I ê lîng-hûn kui ǹg I,
Bô koh khò sè-siōng ê jīm-hô mi̍h.

Tshuā guá tī khuàⁿ buē-tio̍h ê lō͘,
Só͘ m̄-bat ê tsiân-tô͘,
Uan-khiau, tshòng ti̍t; khi-khu, siu pîⁿ,
Ū Tsú tī sin piⁿ,
O-ló I sù tsang-tshiū ê khì-bī,
Hong-bō͘ ū kam-tsuâⁿ tī lō͘ nih.
Ū hé-thiāu tī àm-mî,
Ū hûn-thiāu tī ji̍t-sî.

Tī siōng ut-tsut ê ji̍t-tsí,
Thiàⁿ ê ìng-ún sù huaⁿ-hí;
Huê-thâu khuàⁿ kè-khì,
Tsai tsiong-lâi suí bô pí,
Tshin-tshiūⁿ Kim-àng lāi ū má-ná,
Ia̍h ū khui hue ê kuái-á,
Tsú ê lu̍t-huat hē iok-kuī,
Siōng-tè li̍p-iok tsuè pó-huī.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org