《台語荒漠甘泉（全羅版）》

 | | | 轉寄

"Īⁿ-siōng"

作者 陳清俊 翻譯 2011.09.18

listen

Káu ge̍h tsa̍p-pueh (Káu ge̍h tsa̍p-pueh ji̍t)

“Nā bô bi̍k-sī īⁿ-siōng, peh-sìⁿ tsiū hòng-tshiòng; To̍k-to̍k tsip-siú lu̍t-huat ê, tsiū ū hok-khì.” (Tsim-giân 29:18)

Uī-tio̍h beh kìⁿ-tio̍h Siōng-tè, kap I só͘ beh hō͘ lán ê īⁿ-siōng, thìng-hāu Siōng-tè sī tsin tiōng-iàu ê. In-uī lán ê sim tshin-tshiūⁿ hip-siōng ê té-phìⁿ, tī Siōng-tè hia khah tn̂g ê sî-kan, tsiū khah tshim ê iáⁿ ìn tī té-phìⁿ lāi, khah tshim ê ìn-siōng. Siōng-tè ê īⁿ-siōng beh ìn tī lán ê sim, lán ài tsīng-tsīng kú-tn̂g tī Siōng-tè ê kha-tsîng. Lán ài tsai, tī bô pîng-tsīng ê ô͘-bīn sī buē thang huán-ìng iáⁿ tshut-lâi.

Lán beh ài kìⁿ tio̍h Siōng-tè, lán ê sing-ua̍h sī su-iàu an-lîng kap pîng-tsīng. Tuì I lâi ê īⁿ-siōng uē tuā-tuā íng-hióng lán ê it-sing, tshin-tshiūⁿ suí-suí ê si̍k-iông uē tuà hō͘ tshau-huân ê sim pîng-tsīng tsi̍t-iūⁿ. Kìⁿ tio̍h Siōng-tè it-tīng uē kái-piàn lán ê jîn-sìng.

Ngá-kok tī Ngá-phok ê tō͘-thâu kìⁿ-tio̍h Siōng-tè, kái miâ kiò Í-sik-lia̍t. Ki-tiân kìⁿ-tio̍h Siōng-tè ê tsìng-kù, luán-jio̍k piàn-tsuè ióng-kám ê tsiàn-sū. To-má kìⁿ-tio̍h Ki-tok liáu-āu, iû huâi-gî ê ha̍k-sing piàn-tsuè tiong-sim khiân-sîng ê sù-tô͘.

Tuì sìng-king sî-tāi kàu hiān-kim, iā ū tsin tsuē lâng kìⁿ-tio̍h Siōng-tè ê īⁿ-siōng. Tī tsa̍p-pueh sè-kì Ing-kok ê thuân-kàu-su sian-hong, Ui-lîm Khé-lí (William Carey), ū lâng kóng i sī “hiān-tāi thuân-kàu tsi pē”. I kìⁿ-tio̍h Siōng-tè liáu-āu, tsiū hòng-khì i ê phê-uê sai-hū ê kang, khì Ìn-tō͘ thuân-tō. Tāi-pi̍t Lí-bûn-su-tùn (David Livingston) kìⁿ-tio̍h Siōng-tè liáu-āu, pàng lo̍h i tī Ing-kok ê it-tshè, tsiâⁿ-tsuè thuân-kàu-su kap thàm-hiám-ka, tī tsa̍p-káu sè-kí kun-tè Tsú ê ín-tshuā, kàu Hui-tsiu siōng lāi-bīn ê tshim-suaⁿ nâ-lāi thuân-kàu. Sū-si̍t-siōng, iáu ū tsiūⁿ tshing ê lâng kìⁿ-tio̍h Siōng-tè, in kin-á-ji̍t tī thiⁿ-piⁿ hái-kak tsīn-la̍t ǹg sit-lo̍h ê lâng thuân ki̍p-sî ê hok-im. --- Dr. Pardington

Hiān-tsāi beh tī sim-lîng nih tshē tio̍h uân-tsuân ê siok-tsīng sī hui-siông ê hi-hán. In-uī Siōng-tè put-sî īng khin-khin suè-suè ê siaⁿ tuì lán kóng uē. Nā sī sè-kài ê siaⁿ-im piàn suè ê sî, lán tsiah uē thiaⁿ tio̍h Siōng-tè tuì lán kóng khin-khin ê siaⁿ. I kè-sio̍k tuì lán kóng-uē, sī in-uī lán ê bô-îng, tshiong-tshiong kông-kông ê sing-ua̍h pun khì lán ê sim, suah thiaⁿ buē tio̍h I tuì lán kóng ê siaⁿ. --- Frederick William Faber

Tī an-tsīng tiong, Tsú ah, tshiáⁿ kóng,
Guá thìng-hāu īⁿ-siōng,
Guá sim tsīng-tsīng teh su-sióng,
Teh ǹg-bāng tiong.

Tsú ah, tshiáⁿ kóng,
Tī an-tsīng ê sî-kong,
Tsú, guá ài kìⁿ Lí ê bīn-iông,
kám-siū tio̍h Lí ê li̍k-liōng.

Lí kóng ê uē-gí,
Sī sìⁿ-miā tsin-tsiàⁿ ì-gī.
Thiⁿ sù ê niû-bí,
Sim-lîng tit iúⁿ-tshī.

Po̍k-jîn teh thiaⁿ! Tshiáⁿ kóng-uē,
Tsú ah! m̄-thang tsīng-tsīng bô huê.
Guá lîng teh tán, teh tshē,
Lí sù ua̍h-miā ê uē.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org