《台語荒漠甘泉（全羅版）》

 | | | 轉寄

"Khuài-lo̍k"

作者 陳清俊 翻譯 2011.10.16

listen


Tsa̍p ge̍h tsa̍p-la̍k (Tsa̍p ge̍h tsa̍p-la̍k ji̍t)

“tsiū tio̍h pàng-hē ta̍k hō ê tāng tàⁿ, kap khuài-khuài tîⁿ-puâⁿ lán ê tsuē, īng tī lán thâu-tsîng ê lō͘-tsām,” (Hi-pik-lâi 12:1)

Tsin tsuē sū pún-sin pīng m̄-sī tsuē, tān-sī uē tsiong lán ê sim ap kah tāng-tāng-tāng, á-sī hō͘ lán hun-sim, tsiâⁿ-tsuè lán ki-tok-tô͘ sîng-tióng ê puāⁿ-kha-tsio̍h. Siōng bái ê tsîng-hîng sī sán-sing tsua̍t-bāng, á-sī kám-kak bô ǹg-bāng. Tse tîm-tāng ê sim khak-si̍t sī tāng-tàⁿ, tsiong lán ê sìng-kia̍t kap iú-iōng-kám khiú lo̍h-lâi.

Í-sik-lia̍t ê kiáⁿ-jî buē thang tsìn-ji̍p ìng-ún ê tē sī tuì mâi-uàn khai-sí, tshin-tshiūⁿ sìng-king kóng, “Í-sik-lia̍t tsìng-lâng huat uàn-giân” (Bîn-sò͘-kì 14:2). Khó-lîng khai-sí sī sió-khuá piáu-ta̍t tsi̍t ē uàn-thàn kap put-muá, tān-sī in kè-sio̍k lo̍h-khì, huat-tián tsiâⁿ-tsuè thiat-té ê puē-puān kap huí-bia̍t.

Lán tsua̍t-tuì m̄-thang ū huâi-gî Siōng-tè, huâi-gî I kú-tn̂g ê thiàⁿ kap sìn-si̍t. Lán nā kian-kuat bô huâi-gî, tshin-tshiūⁿ lán kuat-tuān m̄ huān-tsuē, in-uī li̍p-tiûⁿ kian-tīng, tsua̍t-tuì bô huâi-gî, tsiū Sìng-lîng uē lâi pang-tsān lán, hō͘ lán tuì Siōng-tè ū sìn-sim, tsuè-āu tit sìng-lī ê kuan-bián.

Lán siông-siông uē pua̍h-lo̍h tī giâu-gî, iu-lū ê si̍p-kuàn, Siōng-tè sī-m̄-sī uē pàng-sak lán, king-kè tsuē-tsuē khùn-lân lán ê hi-bāng tsiū sit-lo̍h khì lah. Lán tio̍h kū-tsua̍t hit tsióng lué-khì, bô khuài-lo̍k ê sim-tsîng! Hō͘ lán “lóng beh ū tuā hí-lo̍k” (Ngá-kok 1:2). Sīm-tsì lán bô kám-kak tio̍h khuài-lo̍k, iā tio̍h khò sìn-sim, khò kuat-ì, lia̍h hí-lo̍k tsuè tsin-si̍t, Siōng-tè tsiū beh tsiong hí-lo̍k tsin-tsiàⁿ hō͘ lán.

Mô͘-kuí siông-siông īng ê nn̄g tsióng kè-tì: thâu tsi̍t ê, sī hō͘ lán sit-khì ióng-khì, lán nā sit-tsì, án-ni tsiū sit-pāi lah, siōng-bô tsiām-sî lán buē-thang tuì ka-kī, tuì pa̍t-lâng ū pang-tsān. Tē jī tsióng, sī hō͘ lán siⁿ giâu-gî, īng tse lâi phò-huāi lán kap Siōng-tè sìn-sim ê liân-hê. Ài sió-sim, m̄-thang tiòng tio̍h kè. --- G.E.M.

Guá ài puê-ióng khuài-lo̍k ê sim! Khuài-lo̍k ê tsing-sîn hō͘ guá ê lîng tshù tī kuân ê uī, tì-kàu Sat-tàn m̄-káⁿ lâi kāng. Guá ê lîng ê si-hiân siū tio̍h tuì thiⁿ lâi ê tiān-la̍t ū ua̍h-la̍t, hō͘ mô͘-kuí ê tshiú-tsíng-thâu-á m̄-káⁿ lâi khap, i put-tik-put khì pa̍t só͘-tsāi. In-uī sim-lāi tshiong-muá Sìng-lîng ê huaⁿ-hí kap khuài-lo̍k, Sat-tàn íng-uán m̄-káⁿ lâi kiáu-jiáu. Guá ê pān-huat sī pī-bián iu-tshiû, tshin-tshiūⁿ siám-pī Sat-tàn tsi̍t-iūⁿ. Tān-sī guá pīng bô siông-siông tit-tio̍h sîng-kong. Ná tshin-tshiūⁿ mô͘-kuí, tng guá kám-kak “tsin ū lō͘-īng” ê sî, iu-tshiû tsiū lâi lah, i bīn-tuì-bīn ti̍t-ti̍t siòng, ti̍t kàu guá ê lîng piàn tshiⁿ-li̍k-sik.

Sū-si̍t, pi-ai hō͘ guá ê tsiu-uî sū-bu̍t lóng piàn khuán, tsing-sîn, sim-tì siū bâ-pì. Tuì sím-mi̍h sū lóng bô tshù-bī, tsiân-tô͘ o͘-o͘ àm-àm. Guá ê lîng sit-khì liáu it-tshè ê lîng-kám kap li̍k-liōng.

Ū tsi̍t uī lāu sìn-tô͘ án-ni kóng, “Tuà khuài-lo̍k ê sìn-sim hō͘ lán tsuè sū huaⁿ-huaⁿ hí-hí, khuài-lo̍k tshin-tshiūⁿ siⁿ nn̄g-ki si̍t, hō͘ lán uē kín-kín khuài-sok uân-sîng só͘ kau-tài ê kang. Iu-tshiû tú siong-huán, sī tsiong tsit nn̄g-ki si̍t tsián tiāu. Īng līng-guā tsi̍t ê phí-jū kóng, iu-tshiû hō͘ lán sū-hōng ê tshia la̍h lán, tsiū bé-tshiā tshin-tshiūⁿ tsá-ji̍t Ai-ki̍p tui-ping ê tshia la̍h lán, hām lo̍h tī Âng-hái, buē-tín buē-tāng, bô pān-huat koh lâi tsìn-tsîng.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org