《台語荒漠甘泉（全羅版）》

 | | | 轉寄

" Ìng-ún "

作者 陳清俊 翻譯 2011.10.23

listen
Tsa̍p ge̍h jī-saⁿ (Tsa̍p ge̍h jī-tsa̍p-saⁿ ji̍t)

“kìⁿ-nā thok I ê lô͘-po̍k Mô͘-se só͘ ìng-ún ê hó-uē, bô tsi̍t-kù lo̍k-khong., ” (I Lia̍t-ông-kì 8:56)

Ū tsi̍t kang, lí beh bîng-pi̍k, tī lán jîn-sing tiong, Siōng-tè tuì lán só͘ kóng “m̄”, muí-pái lóng ū I ê lí-iû. Āu-lâi, I iā uē pó͘-siúⁿ lán. Tng Siōng-tè ê tsú-bîn kî-tó bô tit-tio̍h huê-tap suah huân-ló iu-tshiû ê sî, siông-siông lán beh khuàⁿ tio̍h I īng koh-khah tuā ê gán-kong lâi huê-ìng! Siông-siông lán só͘ tsai sī tsi̍t tiám-tiám-á nā-tiāⁿ, kàu āu-lâi tsiah tit-tio̍h tsuân-pō͘ ê khé-sī.

Nā-sī Siōng-tè ìng lán ê kiû-kiò,
Thiⁿ nâ sik, thài-iông phó͘-tsiò,
Tī thâu tsîng ū pîⁿ-tháⁿ lō͘-tô͘,
Pe-tsiáu tshiùⁿ-kua phuāⁿ lán kiâⁿ-lō͘,
Iā ū lō͘-piⁿ iá-hue phang-kòng-kòng,
Koh ū khue-tsuí thang lim tsin tshing-sóng,
Khuài-lo̍k, khah tsuē ê khuài-lo̍k, tī lán ê tō,
Nā-sī Siōng-tè thiaⁿ lán ê kî-tó,

Ká-sú Siōng-tè bô tap-ìng lán ê kî-kiû,
Thiⁿ ba̍t-hûn àm-àm, tsin iu-tshiû,
Iā ū tsio̍h-thâu tòng tī lán lō͘-tsiūⁿ,
Koh ū kiông-hong hân-khì tsǹg lán ê kha-tshiú.
Tsóng-sī, tshin-ài ê, lō͘ ê tsīn-bé sī lán ê ke,
Tsiah ê lóng sī Thiⁿ-pē buâ-liān lán ê,
Tshuā lán tsìn-ji̍p thiⁿ tíng hó tē,
Ká-sú Siōng-tè bô tap-ìng lán só͘ kiû ê,

Nā sī ū sìn-sim, lán buē tshiong-pông tsuè tāi-tsì, sī “nāi-sim thìng-hāu I” (Si-phian 37:7). Nā ài tit-tio̍h tsuân-jiân ê kái-sueh, sī Iâ-so͘ Ki-tok tsài-lîm ê sî! Ū sím-mi̍h sî, Siōng-tè tsiong tsi̍t lâng ê mi̍h the̍h khì, āu-lâi bô ka-pē tsiok-hok i mah? I kiám sī kan-ta kin-á-ji̍t tsuè tāi-tsì nā-tiāⁿ? Tû liáu lán tse suè-suè ê sè-kài, I kiám bô koh kuan-sim kî-thaⁿ ê tāi-tsì mah? Lán kè-sin liáu-āu, I kiám m̄-sī teh kang-tsok mah? Hûn-bōng ê mn̂g kiám sī thàu kàu íng-uán ê o͘-àm, á-sī íng-uán ê tiām-tsīng mah?

Sīm-tsì lán ê su-sióng hān tī kim-sing ê sî, Siōng-tè iā buē īng khó͘-lān lâi tshì lán, tû-hui I tsún-pī beh sù lán koh-khah tuā ê lé-mi̍h kap tsiok-hok. Tsai-iáⁿ án-ni thìng-hāu ê lâng, uē tī Siōng-tè ê un-huī tiong tit-tio̍h tuā-tuā ê sîng-tióng.

Sng-seh kàng-lo̍h hong-kông,
Suaⁿ-ni̍h hûn-bū bông-bông-bông,
Suí hue siā khì, tiau-bông,
Tshân-iā lòng-khòng-khòng,
Thiàⁿ-thàng ê Pē suè-suè ê siaⁿ kóng,
“Tse lóng sī tshut-tī Guá ê tshiú só͘ tshòng”
Tng lí buē tàng liâu-bōng,
Sìn-khò tsiū tit hok-khì siong-thong.

Tsin tsuē ê khó͘-thàng,
Sit-lo̍h muí tsi̍t hāng,
Nn̄g-tshiú khang-khang,
Thâu-mn̂g pe̍h tshang-tshang,
Hit sî, kì-tit Thiⁿ-pēê thiàⁿ-thàng,
I ióng-iú sè-kài bān-hāng,
Tng lí siūⁿ buē thàng,
Tsí-iàu sìn-khò tsiū ū hó-khang.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org