《台語荒漠甘泉（全羅版）》

 | | | 轉寄

"Ki-tok lâi lah"

作者 陳清俊 翻譯 2011.12.25

listen


Tsa̍p-jī ge̍h jī-gō͘ (Tsa̍p-jī ge̍h jī-tsa̍p-gō͘ ji̍t)

"Lâng beh kiò I ê miâ tsuè Í-má-luē-lī; huan-i̍k tsiū-sī Siōng-tè kap lán tī-teh." (Má-thài 1:23)
"Hô-pîng ê Jîn-kun." (Í-sài-a 9:6)

Khong-tiong kua-siaⁿ, thiⁿ-tíng kng tshiⁿ,
Lāu-bú teh kî-tó, ing-jî suè siaⁿ teh hiⁿ,
Tshiⁿ kng-nah-nah, bí-lē thiⁿ-sài teh gîm-si,
Pik-lī-hîng ê bé-tsô, Kun-ông tshut-sì.

Kuí-nā nî tsîng, ū tsi̍t tiuⁿ siū lâng tsù-ì ê sìng-tàn khah-phìⁿ, i ê piau-tê sī "Ká-sú Ki-tok nā bô lâi-lîm". Tse sī kun-kù Kiù-tsú só͘ kóng ê uē, "Guá nā bô lâi". (Iok-hān 15:22) Khah-phìⁿ ê tô͘ sī tsi̍t ê bo̍k-su tī sìng-tàn-tsiat ê tsá-khí, tī i ê tsu-pâng khùn khì, bāng tio̍h Iâ-so͘ bô lâi ê sè-kài.

Tī i só͘ bāng kìⁿ ê, tī ka-kī ê tshù ni̍h sì-kuè kiâⁿ, piah-lô͘ tsîng bô tn̂g-be̍h-á, tshù lāi bô sìng-tàn-tshiū, mn̂g-tíng iā bô tshiⁿ-tshiⁿ âng-âng ê hue-hio̍h khuân. Koh bô Ki-tok lâi an-uì lán, lâi kó͘-lē lán, lâi tsín-kiù lán. Jiân-āu kiâⁿ tshut mn̂g, khuàⁿ bô lé-pài-tn̂g, bô tsiam-tsiam kuân-kuân ê tsing-thah. Tī i ê tsu-pâng só͘-ū kài-siāu Kiù-tsú ê tsu lóng bô khì lah.

I koh bāng tio̍h ū lâng lâi phah mn̂g, ài i khì khuàⁿ tsi̍t ê phuà-pīⁿ ê lāu-bú. Kàu uī, i ê pîng-iú teh khàu, i tsiū phah-khui Sìng-king, beh īng Siōng-tè ê uē lâi an-uì i, bô phah-sǹg, tsit pún Sìng-king tsí ū kū-iok, kàu "Má-la̍h-ki" nā-tiāⁿ. Bô hok-im, bô hi-bāng, bô kiù-un ê ìng-ún. I só͘ thang tsuè ê tsí-ū kap i ê pîng-iú, pîng-iú phuaⁿ-pīⁿ ê lāu-bú saⁿ-kap khuàⁿ-lâi khuàⁿ-khì nā-tiāⁿ.

Nn̄g kang āu, i khiā tī i ê kuan-bo̍k piⁿ tsú-tshî tsòng-lé, bô an-uì ê sìn-sik, bô koh-ua̍h ê îng-kng, iā bô thiⁿ-tíng só͘ tsún-pī ê só͘-tsāi tsit luī ê uē. Tsí ū "lí pún sī thô͘, taⁿ beh koh kui tī thô͘", kap i tn̂g-tn̂g ê íng-pia̍t. Tsuè-āu i thé-huē tio̍h Ki-tok bô lâi, tuā-siaⁿ háu tshut lâi, suah tshíⁿ khí-lâi.

Tng i tshíⁿ ê sî, tú-tú tī ē-kha lé-pài-tn̂g ū sìng-kua-tuī teh gîm si, i tshiong-muá huaⁿ-hí khuài-lo̍k, tsuè-hé tshut siaⁿ gîm:

Tshiáⁿ-lâi, tiong-sìn sìng-tô͘, Khuài-lo̍k, tik-ì hiòng-tsîng,
Tshiáⁿ lâi, tshiáⁿ lín lâi, huaⁿ-hí kàu Pik-lī-hîng,
Lâi, lâi tiâu-kìⁿ Tsú, thiⁿ-tíng Kun-ông tshut-sì, Tshiáⁿ lâi, tāi-ke kìng-pài I,
Guá Tsú Ki-tok.

Kim-ji̍t lán thang huaⁿ-hí khuài-lo̍k, in-uī Ki-tok í-king lâi lah. Kì-tit thiⁿ-sài só͘ pò "Guá pò lín tuā huaⁿ-hí ê hó siau-sit, hō͘ peh-sìⁿ lóng ū hūn, in-uī kin-á-ji̍t tī Tāi-pi̍t ê siâⁿ í-king uī-tio̍h lín siⁿ tsi̍t ê Tsín-kiù-ê, tsiū-sī Tsú Ki-tok." (Lō͘-ka 2:10~11).

I lâi, hō͘ tsiok-hok hong-hù,
Hō͘ tsiù-tsó͘ siau-tû.

Guān lán kuan-sim hiah-ê iáu buē sìn Tsú ê lâng, tī sìng-tàn-tsiat iau-buē tit hok-khì ê lâng. "Khì ah, lín khì tsia̍h puî ê mi̍h, lim tiⁿ ê bī; bô pī-pān mi̍h ê lâng, tio̍h pun hō͘ i; in-uī kin-á-ji̍t sī lán ê Tsú ê sìng-ji̍t." (Nî-hi-bí 8:10)


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org