《台語荒漠甘泉（全羅版）》

 | | | 轉寄

"Tik-sìng ū tshun"

作者 陳清俊 翻譯 2011.12.18

listen

Tsa̍p-jī ge̍h tsa̍p-pueh (Tsa̍p-jī ge̍h tsa̍p-pueh ji̍t)

"Huán-tńg tī tsiah ê lóng-tsóng ê sū, lán tuì thiàⁿ lán ê, tik-sìng kàu ū tshun." (Lô-má 8:37)

Hok-im, Siōng-tè ê un-sù sī tsin kî-biāu ê, uē tsiong ti̍k-jîn, tuì-ti̍k lán só͘-ū ê li̍k-liōng tsi̍p khí-lâi, huà-tsuè pang-tsān lán kiâⁿ ǹg thian-kok, khì kìⁿ Siōng-tè ê lō͘. Tse ná tshin-tshiūⁿ ing-tsiáu lī-iōng po̍k-hong ê li̍k-liōng tsiâⁿ tsuè i pe ǹg khong-tiong ê la̍t. Ing khiā tī kuân-kuân ê suaⁿ-gâi piⁿ tsīng-tsīng, khuàⁿ thiⁿ-sik teh àm, sih-nà teh sih, po̍k-hong teh kńg. Khuàⁿ tsún-tsún, tsiū ǹg kiông-hong pe khì, lī-iōng hong ê la̍t tsiong i ǹg khong-tiong pe kuân.

Siōng-tè iā ài I muí tsi̍t ê kiáⁿ-jî uē án-ni, "tik-sìng kàu ū tshun". Tsiong po̍k-hong-ú ê hûn piàn-tsuè sìng-lī ê tsiàn-tshia. "Tik-sìng kàu ū tshun" m̄-nā sī tsiàn iâⁿ, tsiong ti̍k-jîn phah pāi, koh uē tuì ti̍k-jîn lâi tit in ê niû-si̍t, in ê ta̍k-tsióng ê mi̍h. Tse sī tsit ê king-tsat tsin-tsiàⁿ ê ì-gī, m̄-nā phah-iâⁿ, koh ū tsiàn-lī-phín thang the̍h.

Tshin-ài ê ki-tok-tô͘, tng lí king-kè kiaⁿ-hiâⁿ thang-kiaⁿ ê khó͘-lān suaⁿ-kok āu, lí sī-m̄-sī ū tuà tio̍h tsiàn-lī-phín lī-khui mah? Tng lí siū siong, í-king teh-beh bô guân-khì ê sî, lí ū sìn-khò Siōng-tè, hō͘ lí tshut-khì ê sî pí lí ji̍p-lâi ê sî khah hong-sīng, hù-jū mah? Tsuè tsi̍t ê "tik-sìng kàu ū tshun" sī tuì ti̍k-jîn hia tit tsiàn-lī-phín, kui tī ka-kī, ti̍k-jîn só͘ beh īng tse lâi kong-kik lí ê mi̍h piàn tsuè lí ê, piàn-tsuè tuì lí ū lō͘-īng ê mi̍h.

Tī Ing-kok Bú-lâi-tùn, (Brighton, Ingland) ū tsi̍t uī Mō͘-un phok-sū (Dr. Mo͘n), ū tsi̍t ji̍t i hut-jiân sit-bîng, tshiⁿ-mî bô khuàⁿ-kìⁿ. I tuì Tsú kóng, " Tsú ah, guá tuì Lí tit-tio̍h sit-bîng, tse sī tsi̍t tsióng ê tsâi-lîng, kiû Lí pang-tsān guá, hō͘ guá uē īng tse lâi îng-iāu Lí. Tī Lí tsài-lîm ê sî, uē liân-pún tài-lī lâi siu-huê. (Má-thài 25:27). Āu-lâi tit-tio̍h Siōng-tè ê pang-tsān, i huat-bîng bông-jîn ê jī-bú, hō͘ tshing-tshing bān-bān ê bông-jîn uē thang tha̍k Siōng-tè ê uē, tit-tio̍h kiù-un ê tō-lí.

Siōng-tè bô tsiong Pó-lô ê "jio̍k-thé ê tshì" tû-khì, (Ṳ Ko-lîm-to 12:7) Tsú só͘ tsuè ê koh-khah hó, hō͘ Pó-lô khik-ho̍k tsit ki tshì, hō͘ tshì piàn tsuè i ê lô͘-po̍k. Tuà tshì ê sū-hōng, tuì jîn-luī ê kòng-hiàn pí tsē tī ông-uī (hióng-siū) ê sū-hōng khah uí-tāi.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org