《台語荒漠甘泉（全羅版）》

 | | | 轉寄

"Tshut-ji̍t lo̍h-hō͘ sī Tsú só͘ tiāⁿ"

作者 陳清俊 翻譯 2012.01.08

listen


Tsiaⁿ ge̍h tshue pueh. (It ge̍h pueh ji̍t)

“Guá beh hō͘ in kap Guá ê suaⁿ sì-uî ê só͘-tsāi tsiâⁿ-tsuè hok-khì ê guân-thâu; Guá ia̍h beh tsiàu-sî lo̍h-hō͘; beh ū si hok-khì ê tuā-hō͘.” (Í-se-kiat 34:26)

Hiān-tsāi sī sím-mi̍h sî-kuì? Sī tsin-kú bô hō͘ mah? Á-sī lí bat king-giām kè khòng-hān bô hō͘ ê ji̍t mah? Hit-sî só͘ su-iàu ê, sī ki̍p-sî ê hō͘. “Lí ê ji̍t-tsí tsáiⁿ-iūⁿ, lí ê khuì-la̍t iā beh án-ni.” (Sin-bīng-kì 33:25) Siōng-tè sī uē tī lán ê ji̍t-tsí ni̍h siông-siông sù ki̍p-sî ê hō͘ lâi hō͘ lán ê li̍k-liōng ná ji̍t-tsí ê tsuē.

Siōng-tè só͘ sù ê hok-hō͘ (hok-khì ê hō͘) sī saⁿ liân-suà. Tsú sù tit-kiù ê un-tián, sù tióng-tuā ê un-tián, sù kiān-khong ê un-tián, ū ua̍h-miā kuài-lo̍k ê un-tián. Lán tshin-tshiūⁿ ko͘-ta ê tshiū-ba̍k, thián-khui lán ê hio̍h lâi tsiap-siū Tsú só͘ sù ê ki̍p-sî, liân-sio̍k ê kam-lîm hō͘-tsuí. (Tsarles H. Spurgeon)

Sim-kuaⁿ khiam-pi pàng hō͘ kē,
Siōng-tè un-hō͘ tuā muá kè.

Tsú ah, Lí uē tsiong tse bái-bái tshì-á tsâng (Sian-jîn tsiúⁿ) lâi khui tshut suí-suí ê hue. Guān Lí iā uē án-ni sú-iōng guá lâi tsiâⁿ Lí ê kang. Iok-pik tī khó͘-lān ê hō͘ liáu-āu tit-tio̍h hok-khì ê ji̍t-kng, iā buē thang liáu-kái tsi̍t-ê hō͘ kap ji̍t-kng ê liân-tài kuan-hē; guán iā m̄-tsai. Nā-sī Lí kā guán kóng, Lí ê si̍p-jī-kè kā guán kóng, Lí ê thòng-khó͘ tsiâⁿ-tsuè suí ê bián-liû. Guán iā ài tī khùn-lân tiong, o̍h, tuì Lí ê thòng-khó͘ ê si̍p-jī-kè lâi tik-sìng tsiâⁿ-tsuè guán suí ê kuan-bián. (George Matheson)

Hong-sīng ê ua̍h-miā ài ū ji̍t-thâu, iā ài ū hō͘-tsuí.

Tsháu-ba̍k pha̍k kah n̂g-n̂g, lian-lian, suî-suî,
Ài ū hûn jia̍h, lâi pó tsi̍t-si-á khuì;
Tsi̍t tih lō͘-tsuí iā pó-kuì,
Su-iàu ba̍t-hûn tuà tshiong-tsiok lō͘-tsuí,
Hō͘ bô-miā tsháu-ba̍k piàn tshiⁿ-tshuì.

Siāng-khuán, jîn-sing ê tso-gū,
Tshì-liān lō͘-tsuí phang, tiⁿ, koh hong-hù;
Té tī puâⁿ ni̍h tsió-tsió, buē ìng-hù,
Tshin-tshiūⁿ àm-mî tsuí-ia̍h, thàu-tsá lō͘, bū,
Ùn tsi̍t-ê, tsiū bô koh ū.

Lân-tit tú-tio̍h tshì-liān ê o͘-im,
Thàu-ji̍p sim-lîng sip-sip, tshim-tshim;
Siōng-tè ê huat-tsik, sìⁿ-miā uāⁿ sin-hîng,
Tshuì-ta lo̍k-tô só͘ king-kè ê tē-kìng,
Piàn tsuè ua̍h-ua̍h siōng-suí ê bí-kíng.

Ta̍k pái ba̍t-hûn lâi-lîm,
Pó-lô ê phuē, pó-puè ná tsin kim;
Hûn-hō͘ tuà tsiok-hok ji̍p lán sim,
Lú tha̍k lú uē sìn-jīm,
“Tāi-tsì kàu, lóng sī hó,” Bián kiaⁿ bián kìm!
Si lâi gîm.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org