《台語荒漠甘泉（全羅版）》

 | | | 轉寄

"An-tsīng tiong ê siaⁿ-im"

作者 陳清俊 翻譯 2012.01.15

listen

Tsiaⁿ ge̍h tsa̍p-gō͘ (It ge̍h tsa̍p-gō͘ ji̍t)

"Hit mî Iâ-hô-hua tuì i (Í-sat) tshut-hiān." (Tshòng-sè-kì 26:24)

Siōng-tè ǹg Í-sat hián-hiān iā sī i khì Pia̍t-sī-pa hit tsi̍t kang. I ê hián-hiān sī ngó͘-jiân ê mah? Lí siong-sìn I hián-hiān ê sî-kan uē huat-sing tī jīm-hô tsi̍t àm, bô it-tīng sī hit tsi̍t àm mah? Lí nā án-ni siūⁿ, tsiū tshò lah. Uī-sím-mi̍h Siōng-tè beh tī i kàu Pia̍t-sī-pa ê hit àm hián-hiān? Í-sat tī kū ê só͘-tsāi, mâ-huân ê sū tsin tsuē, uī tio̍h bô tsin tiōng-iàu ê tsuí-tsíⁿ, kap tsāi-tē ê bo̍k-iûⁿ-lâng saⁿ-tsiⁿ, siông-siông saⁿ-tsiⁿ. Tshiong-thu̍t sui-jiân suah, i ê sim iû-guân bô pîng-an. Só͘-í i kuat-tīng lī-khui hia, khì tsi̍t ê sin ê uī. Tī sin ê só͘-tsāi, tiāⁿ-tio̍h beh tuà lo̍h-lâi, tsit mî, Siōng-tè ê tsí-sī lîm-kàu i. Siōng-tè beh tī i sim-lîng an-tsīng lo̍h-lâi ê sî ǹg i kóng-uē, bô tī i tshau-huân ê sî kóng. Tsi̍t ê lâng tī sim-sîn an-tsīng lo̍h-lâi ê sî, tsiah uē thiaⁿ-tio̍h I ê siaⁿ. Í-sat tī sim-lîng an-tīng ê sî-khik thiaⁿ-tio̍h Siōng-tè ê siaⁿ, i ê an-tsīng ê mî tsiâⁿ tsuè i tit tio̍h kng tsiò ê mî.

Guá ê lîng ah, lí ū siūⁿ kè tsit ê uē: “lín tio̍h tiāⁿ-tiāⁿ, tio̍h tsai Guá sī Siōng-tè;” (Si-phian 46:10) Sim huân ê sî thiaⁿ buē tio̍h Siōng-tè huê-ìng lí ê kî-kiû. Ū juā-tsuē pái lí ê huê-ìng lóng ài tán tsin kú ah? Lí ê sim thiaⁿ buē tio̍h, tng teh tuā-siaⁿ kiû-kiò, teh tân luî-kong, teh tē-tāng, tī hé-ian jia̍t-jia̍t teh to̍h ê sî. It-tān tsiah ê siaⁿ-im lóng bô khì, lí ê tshiú iā bô khì lòng hit ê thih-mn̂g, teh kuan-sim pa̍t-lâng suah buē-kì-tit ka-kī ê huân-ló ê sî, só͘ teh kú-kú tán-thāi ê huê-ìng tshut-hiān lah. Guá ê lîng ah, an-tsīng lo̍h-lâi, tsiap-siū lí ê sim só͘ khat-bō͘ ê, kiám-tsió tuì ka-kī pún-sin ê kuan-sim, tsiong kò-jîn ê huân-ló hē tī Siōng-tè ê tsè-tuâⁿ tíng. Hit-àm Siōng-tè beh hián-hiān. I ê tshái-khīng sī tī tuā-tsuí thè khì tsiah tshut-hiān, lí ê tiām-tsīng beh thiaⁿ tio̍h íng-íng uán-uán ê im-ga̍k.

Tan-to̍k kiâⁿ jîn-sing sió-tō,
Sim tsīng-tsīng bô-huân bô-ló.
Tsin tsuē sū kî-biāu koh ò-pì,
Buē bat ū lâng kóng-kò.

Lâng tsuē, sū tsa̍p lâi sim huân,
Tit-tio̍h sī khang-khang, bô uân-tsuân.
Giâ-thâu khuàⁿ kuân,
Un-hô sìng-ga̍k teh thuân.

Huân-huân luān-luān lō͘ pàng hō͘ lâng,
Sim-kíng kong-bîng, bô kiaⁿ-lâng.
Khuah-tuā hái-iûⁿ kng-liōng sàng,
In-uī thài-iông kng tuì tíng kàng. --- V. Stsoffel


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org