《台語荒漠甘泉（全羅版）》

 | | | 轉寄

"Kàu-gia̍h ê un-tián"

作者 陳清俊 翻譯 2012.02.26

listen


Jī ge̍h jī-la̍k (Jī ge̍h jī-tsa̍p-la̍k ji̍t)

"Ū guá ê un, lí tsiū kàu-gia̍h;” (Ṳ Ko-lîm-tó:9)

Ū tsi̍t ji̍t, king-kè tsi̍t-ji̍t ê sin-khó͘ kang-tsok, guá teh sái tshia tńg khì tshù ê sî, tsa̍p-hun ê ià-siān, sim-tsîng ut-tsut, tsin bái. Hut-jiân thâu-nó͘ lāi tshut-hiān “Ū guá ê un, lí tsiū kàu-gia̍h.” Kàu tshù, tsiū hian khui sìng-king tshē tshut tsit kù uē, tshē tio̍h, guá huê-ìng kóng, “Tsú ah! khak-si̍t, guá ài lí-só͘-tong-jiân án-ni siūⁿ.” Guá tsik-sî suah tshiò tshut siaⁿ lâi.

Kàu tsit sî, guá tsiah liáu-kái A-pik-la̍h-hán hit ê “phak teh tshiò” ê ì-sù. (tsham-khó Tshòng-sè-kì 17:17) Tsit tsat sìng-king hō͘ it-tshè m̄-sìn ê, piàn-tsuè tsin hó tshiò. Tshì siūⁿ, tsi̍t bé tshuì-ta ê hî, tam-sim lim siuⁿ tsuē tsuí suah uē hō͘ hô ta khì. Hô beh tuì hî kóng, “tsīn-liōng, hòng-sim lim, guá ê tsuí kàu gia̍h lí lim.” Guá iā hóng-hut kìⁿ-tio̍h tsi̍t tsiah niáu-tshí, tī tuā-tē king-kè tshit nî ê hong-siu, iáu tam-sim bô kàu tsia̍h, uē gō sí. Tsit sî, Iok-sik tuì suè-tsiah niáu-tshí kóng, “Bián huân-ló, niáu-tshí ah, guá ê tshng-khò͘ niû-si̍t ū kàu gia̍h lí tsia̍h.” Guá iā koh siūⁿ tio̍h tsi̍t ê lâng khiā tī suaⁿ-tíng, tsū-giân tsū-gú, tuì ka-kī kóng, “Muí nî guá ho͘-khip hiah tsuē ê ióng-khì, guá tam-sim uē kā khong-khì tiong ê ióng-khì suh liáu-liáu.” Tuā-tē beh tuì i kóng, “Tsīn-liōng ho͘-khip ah, guá ê khong-khì ū kàu lí īng.”

Thiⁿ-pē ê kiáⁿ-jî ah, tsuè tsi̍t ê uí-tāi ū sìn-sim ê lâng! Sió-sió ê sìn uē tshuā lí ê lîng-hûn kàu thian-tông, uí-tāi ê sìn uē tsiong thian-tông tuà kàu lí lîng-hûn piⁿ. --- Tsarles H. Spurgeon

Tsú ê un-tián ū kàu tuā thang tuì-hù jīm-hô tuā tsōng-hóng, tshin-tshiūⁿ:
Uē hō͘ sim-lîng kiaⁿ-hiâⁿ ê tuā pho-lōng,
Uē hō͘ lán gông-ngia̍h ê tuā-hong,
Lâng só͘ buē thang khòng-tsè, thu̍t-jiân khí ê po̍k-hong.

Tsú ê un-tián ū kàu thang ìng-hù jīm-hô sió-sió sū-kiāⁿ, tshin-tshiūⁿ:
Khùn-jiáu lán tsiam, tshì tsha̍k tio̍h ê im-iáⁿ,
Báng-á-thâng ho͘ⁿ-ho͘ⁿ-kiò ê siaⁿ,
Tshia-lián kuāiⁿ-kuāiⁿ-háu lóng buē tiāⁿ. --- Annie Johnson Flint

Tī thian-kok ê gûn-hâng ū tuā phit ê tsûn-khuán, thìng-hāu lán ê sìn-sim khì niá. Thiⁿ-pē ê tsâi-hù uē thang hō͘ lí hòng-sim, bû-hān-liōng khì niá, khì the̍h.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org