《台語荒漠甘泉（全羅版）》

 | | | 轉寄

"Siu-tsíng tshing-khì"

作者 陳清俊 翻譯 2012.02.19

listen

Jī ge̍h tsa̍p-káu (Jī ge̍h tsa̍p-káu ji̍t)

"kìⁿ-nā kiat ké-tsí ê, I tsiū siu hō͘ i tshing-khì, hō͘ i kiat ké-tsí koh khah tsuē." (Iok-hān hok-im 15:2)

Ū tsi̍t ê Tsú só͘ thiàⁿ ê kiáⁿ-jî, siông-siông tú-tio̍h khó͘-lān, kám-kak tsa̍p-hun ê oh lí-kái. Tī tsi̍t ê tshiu thiⁿ, i kiâⁿ kàu tsi̍t ê phû-thô-hn̂g, lóng bô tsíng-siu. Phû-thô-tîn suan kàu ta̍k só͘-tsāi, thô͘-kha iā sī tsa̍p-tsháu huat kah tsi̍t sì-kuè, kui ê hn̂g ná tshin-tshiūⁿ bô lâng kuán-lí. I tng teh siūⁿ gán-tsiân tsîng-kíng ê sî, hit ê thiⁿ-tíng ê tuā Hn̂g-ting suè-siaⁿ tī i ê hīⁿ-khang piⁿ kóng uē. I tsi̍t ē thiaⁿ liáu, put-tik-put kuáⁿ-kín ài kap lâng hun-hióng tsit ê pó-puè ê sìn-sit.

"Guá só͘ thiàⁿ ê kiáⁿ ah, lí kám-kak lí só͘ siū ê tshì-liān tsin tsuē mah? Uē kì-tit tsit ê phû-thô-hn̂g, tuì i lâi o̍h tsi̍t ê kong-khò. Hn̂g-ting tī phû-thô siu-sîng liáu, buē koh kiat ké-tsí ê sî, i tsiū thîng-tsí siu-tsíng phû-thô tsâng, thô͘-kha ê tsa̍p-tsháu iā pàng i khì. In-uī kiat ké-tsí ê tseh-kuì kè-khì lah, bô su-iàu koh hē kang-hu lōng-huì kang. Tuì lâng lâi kóng, lâng nā bô siū khó͘, lâng beh piàn-tsiâⁿ pha-hng, huì-bu̍t, bô lō͘-īng. Lí ài guá thîng-tsí tuì lí ê tsíng-siu mah? Tshut-tsāi lí khì mah?"

I muá-sim tit-tio̍h an-uì, tuā-siaⁿ kóng, "M̄-thang thîng-tsí tsíng-siu." --- Homera Homer-Dixon

Uē kiat ké-tsí ê tshiū-ki, siu-tsián, tsíng-siu,
Tsián liáu, khah gâu tuā, sìⁿ-miā koh hong-siu.
Sin íⁿ, sin hio̍h siu tsián-khì,
Bí-hó ê tsu-thài iā bô-khì;

Huaⁿ-hí ê ua̍h-miā sit-lo̍h, bí-lē siū tua̍t-khì,
Guān-bōng kui tī thô͘, siū-siong thiah-li̍h.
Huaⁿ-hí ah!
Sui-jiân guān-bōng, bōng-sióng, hi-bōng lóng siū-thiu,
Tse sī tshut tī Siōng-tè thiàⁿ ê sìng-tshiú.

Giâ-to hit ê un-jiû ê tshiú, īng tsián, īng kuah, īng siu,
Sī ài lí ê sìⁿ-miā koh khah tuā sîng-tsiū. --- Annie Johnson Flint


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org