《台語荒漠甘泉（全羅版）》

 | | | 轉寄

"Tio̍h khí-lâi"

作者 陳清俊 翻譯 2012.03.11

listen

Saⁿ ge̍h tsa̍p-it (Saⁿ ge̍h tsa̍p-it ji̍t)

"Iâ-hô-hua ê lô͘-po̍k Mô͘-se sí liáu-āu, Iâ-hô-hua huan-hù Lùn ê kiáⁿ Iok-su-a, tsiū-sī kun-suî Mô͘-se ê kóng, Guá ê lô͘-po̍k Mô͘-se sí liáu lah; taⁿ lí tio̍h khí-lâi, kap tsìng peh-sìⁿ kè tsit ê Iok-tàn, khì Guá só͘ siúⁿ-sù Í-sik-lia̍t lâng ê tuē." (Iok-su-a 1:1,2)

Tsang lí tú-tio̍h tuā pi-siong thòng-khó͘ ê sū, hiān-tsāi lí tshù-lāi ná khang-khang. Lí tsiàu kám-tsîng, beh hòng-khì it-tshè, tsua̍t-bāng teh tsē, bô sím-mi̍h guān-bōng. Lí m̄-thang siū-tio̍h tse iú-hi̍k, in-uī lí sī tī tsiàn-tàu ê tsiân-suàⁿ, guî-hiám suî-sî beh kàu, tiû-tû tia̍p-á-kú iā beh siong-tio̍h Tsú ê kang-tiâⁿ ê tsìn-hîng. Pa̍t-lâng ê sing-ua̍h iā beh in-uī lí ê tiû-tû siū sún-hāi. Tsit-sî bô-tit thîng teh, liân pi-siong iā sī ke ê.

Tsi̍t uī tshut-miâ ê tsiong-kun kóng ka-kī tshin-sin tú-tio̍h ê pi-thiàⁿ ê kò͘-sū. I ê kiáⁿ sī tsi̍t uī phàu-ping uì-kuaⁿ, tng ti̍k-jîn huat-tōng kong-kik ê sî, i sī sut-niá tsuân-su tsìn-kong, teh tshiong-kè tsiàn-tiûⁿ tui-kong ê sî, thu̍t-jiân khuàⁿ tio̍h tsi̍t uī tsiàn-sí ê phàu-ping kun-kuaⁿ tó tī hia, i tsi̍t-khuàⁿ tsiū tsai sī i ê kiáⁿ. Tsiong-kun pē-kiáⁿ kám-tsîng tshim, tsiàu lí, ing-kai kuī tī kiáⁿ-jî sin-si lâi ai-siong, tsóng-sī tsik-jīm só͘ tì, i pit-su kè-sio̍k tsìn-kong. I tsí ū tsim tsi̍t-ē tsiū kín-kín lī-khui, kè-sio̍k tsip-hîng i ê jīm-bū.

Tī hûn-bōng piⁿ siong-sim tuā khàu, íng-uán buē thang tit huê í-king sit-khì pó-kuì ê kū thiàⁿ, koh-khah m̄-bián siūⁿ kóng, tuì siong-sim tit-tio̍h sím-mi̍h tsiok-hok. Pi-siong só͘ tsō-sîng ê, sī tshim-tshim ê siong-hûn khik tī siū-siong ê sim, buē buē-kì-tit ê kò͘-sū. Tāi-tsì kè-liáu, sim-tsîng bô koh khó-lîng kap í-tsîng siāng-khuán. Nā-sī īng tsiàⁿ-bīn ê thāi-tō͘ lâi jím-siū pi-siong, m̄-nā hō͘ lán koh-khah sîng-si̍k, iā uē tuì pa̍t-lâng koh-khah ū tông-tsîng kap thiàⁿ-sim. Tsin-tsiàⁿ, bô pi-siong, á-sī siū-khó͘ ê lâng sī tsin khó-lîn. Tī lán thâu-tsîng ê khuài-lo̍k (Hi-pik-lâi 12:2) hō͘ lán ê pi-siong piàn kng-bîng, tshin-tshiūⁿ ji̍t-thâu tuì hûn-ni̍h tsiò lo̍h-lâi ê tshàn-lān. Siōng-tè hō͘ lán tsiàu só͘ tiāⁿ-tio̍h ê bo̍k-piau ióng-kám tsìn-hîng, sī tsuè lán siōng tsin, siōng hong-hù ê an-uì. Nā-sī tsē teh siong-pi, hō͘ lán ê sim-tsîng ná hām-lo̍h tī koh-khah o͘-àm ê kíng-kài, lán ê li̍k-liōng beh ná sit-khì. Só͘-í pàng-hē iu-siong, sìn-khò Siōng-tè ê ho͘-tiàu, lán beh koh-khah kng-bîng, lán ê lîng-li̍k koh-khah kiông-tuā. -- J.R. Miller

Tsū-su uī ka-kī lâu ba̍k-sái,
Kiat-kó sī siū tsuē kap siong-hāi.
Lí só͘ uī guán tsún-pī ê, sī uí-tāi,
Pí guán só͘ siūⁿ ê khah si̍t-tsāi.

Pó-puè îng-iāu ê mi̍h,
Siūⁿ beh ka-kī tsiàm-iú, beh sit-khì.
Nā-sī khîⁿ-tiâu I ê tshiú, tit tsin-lí,
Tsiàu I ê tsí-ì,
Beh ū pîng-an, tiⁿ-bi̍t ê huaⁿ-hí,
Beh ū hí-lo̍k lîng-li̍k ê iû buah lí. -- Helen Hunt Jackson


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org