《台語荒漠甘泉（全羅版）》

 | | | 轉寄

"Tiām-Tiām ê li̍k-liōng"

作者 陳清俊 翻譯 2012.03.18

listen


Saⁿ ge̍h tsa̍p-pueh (Saⁿ ge̍h tsa̍p-pueh ji̍t)

"Lí lóng bô ìn mah?" (Má-khó 15:4)

Tī sìng-king tiong siōng ū khì-phik ê tsi̍t-bō͘ kíng, tsiū-sī lán ê Tsú siū sím-mn̄g ê sî it-ti̍t tsīng-tsīng bô ìng tsi̍t kù uē. I pún thang hián-tshut I sio̍k-thiⁿ ê lîng-li̍k, iā thang ū hé it-puaⁿ ê khuì-la̍t, lí-khì, lâi tsik-pī in, hō͘ in lóng phak-pài tī I ê kha-tsîng. Tsóng-sī I tsīng-tsīng bô huê tsi̍t kù, suah hō͘ in tsuè-tshut siōng pháiⁿ ê kiat-kó. I ê tsīng-tsīng ê li̍k-liōng, hián tshut Thiⁿ-pē sìng-kiat pîng-hô ê iûⁿ-ko.

An-tsīng ê li̍k-liōng hō͘ Thiⁿ-pē ū ki-huē uī lán kang-tsok, koh sù lán pîng-an. An-tsīng ê li̍k-liōng hō͘ lán thîng-tsí ūn-iōng kè-bô͘, thîng-tsí tsū-ngó͘ piān-hō͘, bô koh īng ka-kī ê tì-huī phuàⁿ-tuàn khì tshē-kiû tsiām-sî ê kái-kuat hong-huat. Huán-tńg, an-tsīng ê li̍k-liōng hō͘ Thiⁿ-pē pîng I buē hō͘ lâng sit-bōng ê sìn-si̍t kap thiàⁿ-thàng lâi kái-kuat lán só͘ siū ê khó͘-thàng, kap bû-tsîng tá-kik.

Ah! Lán siông-siông uī ka-kī ê bo̍k-piau, pó-hō͘ ka-kī lâi tá-kik lâng, suah tsó͘-gāi tio̍h Siōng-tè uī lán an-pâi beh tsuè hó koh suí ê kan-sia̍p. Guān Thiⁿ-pē sù lán muí tsi̍t lâng ū tsit tsióng an-tsīng ê li̍k-liōng, kap khiam-pi ê tsing-sîn. Tng lán tī sè-tsiūⁿ ê tsing-tsiàn, tshiong-thu̍t kè-liáu, pa̍t-lâng uē huâi-liām lán tshin-tshiūⁿ huâi-liām tsá-khí-sî ê lō͘-tsuí, ji̍t-tshut ê hiok-kng, pîng-hô ê liâng-hong, Kok-kok-thaⁿ ê iûⁿ-ko, un-jiû sìng-kiat thiⁿ-ni̍h ê Tsíⁿ-á (Hún-tsiáu) Iâ-so͘ tsi̍t-iūⁿ. --- A. B. Simpson

Hit ji̍t, Iâ-so͘ tan-to̍k khiā,
Lâng sim ná tsio̍h kian-tiāⁿ,
I kàu sè-kan tsuè kiù-sio̍k-tsiá,
Hit ji̍t I tsīng-tsīng khiā tī hia.

In tsuè ké kan-tsìng hām-hāi lâng,
Īng bô-tsîng soh khún-pa̍k ké-sàng,
Koh kā I hì-lāng,
I tsīng-tsīng bô kóng puàⁿ-hāng.

In phuì tshuì-nuā, khiú I thâu-tsang,
Thua I hiòng sai koh hiòng tang,
Tuì I bú-jio̍k, tshē-khang tshē-phāng,
I tsīng-tsīng bô kóng puàⁿ-hāng.

Pîng-iú, lí bat in-uī sió-khuá tāi-tsì
Huat phî-khì tòng-tsuè kong-gī,
Khó͘-náu, lâng tuì lí ê biáu-sī?
I beh tsīng-tsīng bô kóng puàⁿ-si. – L.S.P.

Guá kì-tit thiaⁿ kè "Ìn-tē-an (Indian) lâng ê sù-tô͘" Bîn-ne-só-tá (Minnesota) Tsú-kàu miâ-kiò Huí-po (Whipple) án-ni kóng, "Saⁿ-tsa̍p nî lâi, guá tī só͘ bô tông-ì guá ê lâng lâi tshē Ki-tok ê bīn."

Ū tsit khuán ê sim-huâi, lán tsiū ū li̍k-liōng thang jím-siū pa̍t-lâng ê ue̍h sim-kuaⁿ, bú-jio̍k, sún-hāi lán uī Ki-tok ê kiàn-tsìng ê sū. Lán ê Tsú lâi sè-kan m̄-sī beh huí-bia̍t lâng, sī beh tsín-kiù lâng. --- W.H. Griffith-Thomas


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org