《台語荒漠甘泉（全羅版）》

 | | | 轉寄

"Siong-sìn bô giâu-gî"

作者 陳清俊 翻譯 2012.04.01

listen


Sì ge̍h tshue-it (Sì ge̍h it ji̍t)

"I beh thâi-sí guá, guá bô thang ǹg-bāng." (Iok-pik-kì 13:15)
"In-uī guá bat guá só͘ sìn ê." (Ṳ Thê-mô͘-thài 1:12)

Guá buē giâu-gî,
Só͘ ū tńg-lâi ê tsûn lóng pháiⁿ-khì,
Guá siong-sìn Sìng-tshiú, íng buē sit-tshò, teh kà-sī,
Pháiⁿ-sū iā beh piàn tsuè iú-lī,
Sui-jiân tsûn phuà, lâu ba̍k-sái, hi-bōng sit-khì,
Guá iáu beh kóng, “Guá siong-sìn Lí.”

Guá buē giâu-gî,
Sui-jiân guá ê kî-tó bô tit-tio̍h thiaⁿ-kìⁿ,
Guá siong-sìn tse lóng sī hó-ì,
Sui-jiân tsin siong-pi,
Guá iáu kian-sìn tsìng-gī,
Kè-sio̍k huat kng tsiò bô tsí.

Guá buē giâu-gî,
Iu-siong ná hō͘ tsha̍p-tsha̍p-tih,
Mâ-huân sū ná phang kuáⁿ buē lī,
Guá siong-sìn ló͘-li̍k hiòng kuâiⁿ peh-khí,
Tsí-ū thong-kè thòng-khó͘, ai-thiàⁿ tsiah uē sìng-lī,
Tī si̍p-jī-kè ē, ai-kiû, sù tsû-pi
Siōng tuā ê sún-sit piàn tsuè khah tuā ê ik-lī.

Guá buē giâu-gî,
Sìn-sim ê tiàⁿ khak-tīng put-î,
Ná kian-kò͘ ê tsûn, hiòng tuā hong-íng sái khì,
M̄-kiaⁿ sit-pāi, ióng-kám hiòng sí-bông ê hái-ni̍h,
Sui-jiân jio̍k-thé kap lîng-hûn pun-lī,
Īng tsuè-āu tsi̍t khuì, hō͘ sè-kan-lâng thiaⁿ-kìⁿ,
Guá tuā-siaⁿ âu-kiò. “Guá bô giâu-gî.”

Tsi̍t uī tsin-ū king-giām ê tsuí-siú án-ni kóng, "Tī kiông-lia̍t ê po̍k-hong tiong, lán só͘ tio̍h tsuè ê sū, tsí-ū tsi̍t tiâu pó sìⁿ-miā ê lō͘: tsiū-sī tshē bó͘ tsi̍t ê uī-tì thîng tī hia bô suà uī." Tshin-ài ê ki-tok-tô͘, tse tsiū-sī lán só͘ pit-su tsuè ê sū.

Ū sî, tshin-tshiūⁿ sù-tô͘ Pó-lô, tú-tio̍h kiông-lia̍t po̍k-hong, bô thài-iông á-sī thiⁿ-tshiⁿ thang lâi pang-tsān kiâⁿ-tsûn. Tsit sî, lí tsí-ū su-iàu tsuè tsi̍t hāng sū, iā sī in-uī tsí-ū tsi̍t tiâu lō͘. Lí-tì buē pang-tsān lí, kè-khì ê king-giām iā buē tsí-tiám lí, liân kî-tó to buē an-uì lí. Tsí tshun tsi̍t tiâu lō͘, tsiū-sī tsiong lí ê sim-lîng tīng tsi̍t ê uī-tì, lâu tī hia.

Lí pit-su tsiong ka-kī pang tiàⁿ tī Tsú ê sin tsiūⁿ, jiân-āu put-kuán sī hong, lōng, tuā-tô, sih-ná, luî tân, àm-tsio̍h, tuā-íng, huāⁿ-tiâu-tiâu lí ê tsûn-tuā. Kian-kuat siong-sìn Siōng-tè ê sìn-si̍t, I ê li̍p-iok ìng-ún kap I tī Iâ-so͘ Ki-tok íng-uán ê thiàⁿ. --- Ritsard Fuller


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org