《台語荒漠甘泉（全羅版）》

 | | | 轉寄

"Khuàⁿ-tiōng ka-kī ê luán-jio̍k "

作者 陳清俊 翻譯 2012.04.08

listen


Sì ge̍h tshue-pueh (Sì ge̍h pueh ji̍t)

"Só͘-í guá uī-tio̍h Ki-tok lia̍h tsiah ê luán-jio̍k, khiàm-kheh, khún-tio̍k, khùn-pik tsuè huaⁿ-hí; in-uī guá luán-jio̍k ê sî, huán-tńg ū khuì-la̍t." (Ṳ Ko-lîm-to 12:10)

Tíng-bīn ê king-bûn nā-sī ti̍t-tsiap ê huan-i̍k sī án-ni: “Guá uī tio̍h Ki-tok ê iân-kò͘, tsiū lia̍h bô khuì-la̍t, siū bú-jio̍k, tú-tio̍h huān-lān, hông kuáⁿ-tio̍k, ji̍p tsua̍t-kíng lóng tsuè huaⁿ-hí, in-uī guá sím-mi̍h sî bô khuì-la̍t, sím-mi̍h sî tsiū uē ná tsà-io̍h hiah kiông-bíng.” Beh hián-tshut siūⁿ buē kàu ê li̍k-liōng.

Beh thé-giām tio̍h Siōng-tè ê li̍k-liōng ū kàu īng ê pì-kuat, tsiū-sī tng lán pún-sin, lán ê khuân-kíng lóng kiâⁿ kàu bô lō͘ ê tē-pō͘. Tī tsit tsióng tē-pō͘, lán buē uī ka-kī ê khùn-lân, á-sī siū bô kong-pîng ê tuì-thāi khì kiû lâng ê tông-tsîng, in-uī tsiah ê sū su-iàu khah tuā ê tsiok-hok tsiah ū khó-lîng, só͘-í lán beh gióng-bōng Siōng-tè, bîng-pi̍k tse guân-lâi sī Siōng-tè tī lán sin-tsiūⁿ tsuè-kang ê tsìng-kù. – A. B. Simpson

So͘-keh-lân tshut-miâ ê thuân-tō-su George Matheson, I nn̄g-luí ba̍k-tsiu sit-bîng, bô khuàⁿ-kìⁿ, bat án-ni kóng, “Guá tshin-ài ê Siōng-tè, guá uī-tio̍h guá ê muî-kuì hue kám-siā Lí tshiau-kè tsi̍t tshing pái, khiok m̄-bat uī-tio̍h guá ê tshì (tsí sit-bîng) lâi kám-siā lí tsi̍t pái. Guá it-hiòng khuàⁿ-tiōng guá só͘ pē ê si̍p-jī-kè só͘ beh tit-tio̍h siúⁿ ê uī, khiok bô siūⁿ tio̍h si̍p-jī-kè pún-sin tsiū-sī guá hiān-tsāi ê îng-kng.”

“Tsú ah, kiû Lí kà-sī guá uī guá ê si̍p-jī-kè lâi huaⁿ-hí, kà-sī guá bîng-pi̍k tshì ê kè-ta̍t, tsí-tiám guá jû-hô tuì thòng-khó͘ ê lō͘ pê kàu Lí ê bīn-tsîng, hō͘ guá bîng-pi̍k guá sī thong-kè guá ê ba̍k-sái khuàⁿ-tio̍h guá ê tshái-khīng.”

Khó-lîn ê lâng khuàⁿ buē tio̍h,
Tshiⁿ-kng tshiò thàu-kè píⁿ-pik tshiū ê hio̍h.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org