《台語荒漠甘泉（全羅版）》

 | | | 轉寄

Tshiah-siù tô͘-iūⁿ

作者 陳清俊 翻譯 2007.05.06

listen








Gō͘ ge̍h la̍k ji̍t

"Iâ-hô-hua kap kìng-uì I ê lâng tshin-bi̍t." (Si-phian 25:14)

Siōng-tè ài I ê kiáⁿ-jî o̍h I hó-ì ê ò-pì. Piáu-bīn siōng, I kap lâng ê óng-lâi ná tshin-tshiūⁿ giâm-hat koh ún-muâ. Tsóng-sī ū sìn-sim ê lâng khuàⁿ uē tshut kóng, "Tse sī Siōng-tè ê ò-pì, lín só͘ khuàⁿ ê tsí-sī piáu-bīn, tsóng-sī guán khuàⁿ khah tshim-ji̍p, uē khuàⁿ tio̍h lāi-bīn ê ún-tsông ê ì-gī."

Ài tsai, suān-tsio̍h khòng ê piáu-bīn sī tsho͘-tsho͘, khuàⁿ buē tshut i ê kè-ta̍t. Siōng-tè ê huē-bō͘ tī khòng-iá khí khí-lâi, guā-piáu bô tông-hông, si̍t-tsè-siōng sī īng hái-káu phê khàm ê ná-tiāⁿ, tsi̍t-tiám-á iā khuàⁿ-buē tshut i lāi-bīn ê kuì-tiōng.

Tshin-ài ê pîng-iú, Siōng-tè só͘ sù lí ê lé-mi̍h, khó-lîng sī īng tsho͘-tsuá pau ê tin-kuì lé-mi̍h. M̄-bián tsāi-ì i ê pau-tsong, in-uī lí khak-si̍t tsai tī lāi-bīn ū jîn-ài, jîn-tsû, tì-huī tíng-tíng pó-kuì ê lé-mi̍h. Nā-sī lán hòng-sim lâi tsiap-siū I sàng lâi ê, siong-sìn I só͘ khǹg tī lāi-bīn ê hok-hūn, lán beh bîng-pi̍k Siōng-tè ê hó-ì ê ò-pì, sui-jiân lán iáu tī o͘-àm tiong ê sî. --- A. B. Simpson

Bô kàu tsuè-āu tsi̍t suàⁿ tsi̍t tsiam thîng-tsí,
Lí buē liáu-kái Siōng-tè ê tô͘-iūⁿ kap sim-ì,
Tī tshiah-siù-tsiá tô͘-iūⁿ tiong ê o͘-suàⁿ,
Kap kim-suàⁿ gûn-suàⁿ pîⁿ-pîⁿ ū tiōng-iàu ê ì-gī.

Tsi̍t ê lâng īng Tsú tsuè tiong-sim, i beh tsuè khuân-kíng ê tsú-lâng. Khuân-kíng ap-pik lí mah? Bô puah-khui, tse sī Tsō-bu̍t-tsú ê tshiú, tsiap-siū siū liap-tsō, bô tsó͘-tòng i ê tsìn-tián, tse sī siū hùn-liān. Khuân-kíng m̄-nā uē kā lí tsō-sîng suí-suí ê khì-bíng, iā sī kiòng-ìng lí ki̍k kuì-khì ê tsu-guân.

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw