《台語荒漠甘泉（全羅版）》

 | | | 轉寄

"An-tsīng tī Tsú bīn-tsîng"

作者 陳清俊 翻譯 2012.06.17

listen

La̍k ge̍h tsa̍p-tshit (La̍k ge̍h tsa̍p-tshit ji̍t)

"Tī in thâu-khak-tíng kiong-tshong ê tíng-bīn ū siaⁿ; in thîng ê sî, si̍t tsiū pàng lo̍h-lâi." (Í-se-kiat 1:25)

“In thîng ê sî, si̍t tsiū pàng lo̍h-lâi,” sī sím-mi̍h ì-sù? Lâng siông-siông mn̄g, guá án-tsuáⁿ tsiah uē thiaⁿ tio̍h Tsú ê siaⁿ-im? Hit ê pì-kuat tsāi-tī-tsia: tsiah ê “ua̍h-mi̍h” (Í-se-kiat 1:5) thiaⁿ-tio̍h siaⁿ-im … thîng ê sî, tsiong si̍t pàng lo̍h lâi.

Lán iā bat khuàⁿ tio̍h tsiáu-á hioh tī tshiū-ki tíng, tsóng-sī in ê si̍t iáu teh iô tsi̍t-ē, iô tsi̍t-ē. Tān-sī tī tsi̍t tsat kóng, “In thiaⁿ tio̍h siaⁿ-im, tsiū thîng lo̍h-lâi, si̍t iā pàng lo̍h lâi.”

Lí kiám bat tī Tsú ê bīn-tsîng tsē á-sī kuī ê sî, lí ê lîng ê si̍t iáu teh iô mah? Nā-sī án-ni, lí tī Siōng-tè ê bīn-tsîng tsiū bô tsin-tsiàⁿ ê an-tsīng.

Tsi̍t ê lâng bô kuí ji̍t tsîng kā guá kóng, “Guá uī tio̍h bó͘ tsi̍t hāng sū kî-tó, tsóng-sī iáu-buē tit-tio̍h huê-tap.” Tsiū-sī kóng, i bô an-tsīng lo̍h lâi thiaⁿ Siōng-tè ê uē tsiū lī-khui, tsiàu ka-kī ê siūⁿ-huat khì tsuè, kiat-kó tshòng kàu luān-tshau-tshau, to̍h ài koh tîng lâi.

Ah, lán lōng-huì juā-tsuē king-li̍k, in-uī lán kū-tsua̍t tsiong lán ê sim-lîng ê si̍t pàng lo̍h-lâi, buē thang tī Siōng-tè ê bīn-tsîng uân-tsuân an-tsīng lo̍h-lâi, tì-kàu sún-sit tsuē-tsuē ê sî-kan? Bi̍k-sióng lán tī I ê bīn-tsîng an-tsīng thìng-hāu I ê huê-tap só͘ tit-tio̍h ê an-tsīng, hio̍h-khùn kap pîng-an!

Liáu-āu, kàu-sî, lán beh “tsáu-lâi tsáu-khì, tshin-tshiūⁿ sih-nà teh sih.” (Í-se-kiat 1:14) iā ti̍t-tsiap khì “sîn só͘ beh khì ê só͘-tsāi.” (Í-se-kiat 1:20)

An-tsīng! Tsit-sî an-tsīng tiāⁿ-tiāⁿ!
Lîng só͘ buē bat thiaⁿ,
M̄ sī tsiáu-á-siaⁿ,
M̄ sī hong, íng á-sī tshiⁿ ê iáⁿ,
Sī tuì hn̄g-hn̄g Siōng-tè hia,
Hō͘ su-hiong ê lîng-hûn huaⁿ-hí bô pí,
Tī tsīng-tsīng ê sî, tsiah uē thiaⁿ-kìⁿ.

An-tsīng! Tsit-sî an-tsīng tiāⁿ-tiāⁿ!
Un-hô tiⁿ-bi̍t ê iáⁿ,
Bô thiaⁿ tio̍h jīm-hô kha-pō͘ siaⁿ,
Sī Iâ-so͘ só͘ tshē An-uì-tsiá,
Kà-sī I ê tsin-lí, sîn-sìng,
Tshiong-muá tī guān-ì thìng-hāu ê lîng,
Lí nā beh thiaⁿ I ê sìn-sit, kong-tsìng,
Tshin-ài ê sim-lîng! Ài an-tsīng!


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org