《台語荒漠甘泉（全羅版）》

 | | | 轉寄

"Bô tī guá tsia"

作者 陳清俊 翻譯 2012.08.26

listen

Pueh ge̍h jī-la̍k (Pueh ge̍h jī-tsa̍p-la̍k ji̍t)

"Tshim-ian kóng, bô tī guá tsia." (Iok-pik 28:14)

Ū tsi̍t ê sú-ká, guá siūⁿ beh khì hái-siōng lú-iû, kiâⁿ-kàu hái piⁿ, hái-iûⁿ ná tshin-tshiūⁿ án-ni tuì guá kóng, “Bô tī guá tsia.” Hái-iûⁿ pīng buē-thang hō͘ guá só͘ siūⁿ ài tsuè ê. Guá koh siūⁿ “Bô tiāⁿ-tio̍h suaⁿ uē hō͘ guá tit-tio̍h hioh-khùn.” Guá tsiūⁿ suaⁿ. Keh tńg tsá-khí, guá só͘ ài khuàⁿ hit ê tsòng-kuan ê suaⁿ-be̍h, tsá-khí-sî ji̍t-tshut ê kong-hui, tsóng-sī guá bô tit-tio̍h muá-ì, suaⁿ kóng, “Bô tī guá tsia.”

Guá su-iàu ê sī Siōng-tè tshin-tshiūⁿ hái-iûⁿ tshim ê thiàⁿ, kap tshin-tshiūⁿ kuâiⁿ suaⁿ ê tsin-tō. I ê tì-huī ê kuâiⁿ tshim, m̄-sī hái ê tshim kap suaⁿ ê kuâiⁿ uē thang pau-iông, iā m̄-sī tsu-pó, n̂g-kim, pó-tsio̍h thang pí-phīng. Ki-tok tsiū-sī tì-huī, I sī lán tshim-tshim só͘ su-iàu. Lán lāi-sim ê put-an tsí-ū tuì I hō͘ lán íng-uán ê iú-gî kap thiàⁿ-thàng ê khé-huat lâi pîng-tsīng. --- Margaret Bottome

Guá ê sim tī hia!
Tī íng-uán ê suaⁿ, guá só͘ thiàⁿ ê, só͘ tuà ê tshù-the̍h,
Tī pik-ha̍p-hue, tsuí-sian-hue tiong,
Tī pe̍h-sik tuā Pó-tsō ê kong-hui ē,
Tsē tī tíng-bīn, Tsú ê tshiò-iông tiong,
Thâu-mn̂g huat-kng kim-sik tsíng-tsê,
I bô-piàn ê iông-māu koh-khah bí-lē ---
Guá ê tsâi-pó kap sim lóng tī hia hē!

Guá ê sim tī hia!
Bān-mi̍h sìⁿ-miā piàn-huà, tng kap Tsú tsuè-hé,
Siⁿ, sí, tī I ê kè-uē,
I un-hô, uí-tāi, un-jiû koh kong-gī,
Gâu khuan-iông, ū-la̍t tsín-kiù lâng ê pē,
I bí-hó sûn-kiat ê lîng, hō͘ thiⁿ-tíng khah tsòng-lē,
Hia sī guá kî-tó ài khì ê tē ---
Guá ê tsâi-pó kap sim lóng tī hia hē!

Lí buē thang tsiong tsi̍t tsiah ing-tsiáu kuaiⁿ tī tshiū-nâ lāi. Īng siōng bí-lē ê tsiáu-á uî tī i sin-piⁿ, tsō tsi̍t ê siū tī kuâiⁿ-kuâiⁿ ê siông-tshiū tíng hō͘ I hioh, koh kiò kî-thaⁿ ê tsiáu-á kiòng-ìng i tsin-tsuē tsia̍h-mi̍h. Tsóng-sī tsiah-ê i lóng bô ài. I só͘ ài ê sī tián-khui i ê si̍t pe kàu tī kuâiⁿ-kuâiⁿ ê A-lú-pí (Alpine) suaⁿ-gâi, ba̍k-tsiu ǹg i tsó͘-sian só͘ tuà tī suaⁿ-gâi tsio̍h-piah ê tshù, ū po̍k-hong háu, ū tsuí-tshiâng tshiâng lo̍h-lâi ê siaⁿ, thian-jiân im-ga̍k ê lāi-bīn.

Lán ê lîng-hûn iā khat-bōng tshin-tshiūⁿ ing-tsiáu pe kuâiⁿ-kuâiⁿ, tsí-ū hioh tī Bān-kó͘ Tsio̍h-puâⁿ tíng. I ê tsó͘-ke tsiū-sī thiⁿ-tíng ê tiûⁿ-só͘, sī Siōng-tè īng ko phín-tsit ê tsio̍h-puâⁿ só͘ tsō ê. Hui-hîng tī îng-huâ ê khong-tiong tsiū-sī íng-uán! “Tsú ah, Lí ta̍k sè-tāi tsuè guán khiā-khí ê só͘-tsāi.” (Si-phian 90:1) --- J.R.Macduff

“Guá ê ke sī Siōng-tè”, Ki-tok tshuā guá huê,
Guá am khǹg tī I ê tshiú-té,
I tuà guá kàu an-tsuân ê tē,
Tshuā guá I só͘ kiâⁿ kè,
Kap Siōng-tè khiā khí tī tsì-sìng lāi-té.
Tī I lāi-bīn huaⁿ-hí hó-sè,
Sìng ê só͘-tsāi, sîn-sìng ê ke,
Siōng-tè kiáⁿ-jî só͘ tuà tshù-the̍h.

“Guá ê ke sī Siōng-tè”, í-tsîng m̄-sī,
Mî-ji̍t ka-kī kiâⁿ, ka-kī khì,
Ǹg-bāng tī guá sim-lāi tshē tio̍h tsin-lí,
Só͘ tsuè lóng kui tī khang-khang bô-mi̍h,
Uân-tsuân sit-pāi, muá-sim kiaⁿ-hiâⁿ bô-pí,
Jiân-āu huat-kiàn, î-it ê tō-lō͘, Ki-tok tsiū-sī,
Guá pit-su kau tshut, uân-tsuân tuà-tī I,
Sī Siōng-tè án-ni tuì guá kóng-khí.

“Guá ê ke sī Siōng-tè”, hiān-tsāi an-sin ê só͘-tsāi,
Siōng-tè tuì-hù guá tshì-giām sing-ua̍h ê sè-kài,
Uî-luî pó-hō͘, bián siū po̍k-hong, hām-hāi,
I the̍h khì guá ji̍t-siông tāng-tàⁿ pi-ai,
Ah, bí-hó sîn-sìng ê uī, guá só͘ ài!
Siōng-tè kiáⁿ-jî an-tsuân bih ê só͘-tsāi,
Tsú, guá tiàm tī Lí, Lí tī guá sim lāi.
Tû Lí í-guā, pa̍t-mi̍h lóng bô ài.
Guá hioh tī siōng suí ê ke,
Guá ê lîng thang íng-uán khuàⁿ Pē,
Guá ê Siōng-tè, sī bān-ū, bû-só͘ put-tsāi.
Guá ê ke tsiū-sī Siōng-tè.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org